Սան Մարինոյի Eccentrica ընկերությունը ներկայացրել է Lamborghini Diablo-ի ժամանակակից տարբերակը՝ սուպերմեքենան վերածելով բաց V12 ռոդսթերի՝ միաժամանակ պահպանելով բնօրինակ միջինաշարժիչային ճարտարապետությունը, հայտնում է Autocar-ը։
Ռեստոմոդը ստացել է ամբողջովին նոր ածխապլաստիկե թափք, իսկ պողպատե տարածական շրջանակն ամրացվել է կարբոնե տարրերով։
Կառավարման բարելավման համար լայնացրել են հետագիծը՝ միաժամանակ ընդգծելով Diablo-ի բնորոշ համամասնությունները։ Ինժեներները նաև վերամշակել են աերոդինամիկան, որպեսզի օդային հոսքերը շրջանցեն սրահը և ավելի քիչ անհանգստացնեն վարորդին ու ուղևորին։
Բնօրինակ 5,7 լիտրանոց մթնոլորտային V12-ը արդիականացվել է․ շարժիչը զարգացնում է 542 ձիաուժ։ Հզորությունը փոխանցվում է հետևի անիվներին վեցաստիճան մեխանիկական փոխանցման տուփի միջոցով։
Մինչև 100 կմ/ժ ռոդսթերը արագանում է 3,8 վայրկյանում՝ ցուցանիշ, որը համադրելի է ժամանակակից սպորտային ավտոմեքենաների հետ։
Նախագիծը ղեկավարել է Lamborghini-ի նախկին տեխնիկական տնօրեն Մաուրիցիո Ռեջանիին, որը նախկինում պատասխանատու էր Huracán-ի և Aventador-ի մշակման համար, ինչպես նաև մասնակցել է Gallardo-ի և Murciélago-ի ստեղծմանը։
Eccentrica V12 Roadster-ի հանրային դեբյուտը կկայանա օգոստոսի 14-ին ԱՄՆ-ում Monterey Car Week-ի շրջանակում անցկացվող The Quail միջոցառման ընթացքում։ Ակնկալվում է, որ ավտոմեքենայի արժեքը կգերազանցի 1 մլն եվրոն։ Ընդ որում, ռեստոմոդի համար հիմք հանդիսացող Diablo-ի գինը, կախված տարբերակից, կարող է հասնել մոտ 585 000 եվրոյի։