Author: Julbaz

Բրյուսելում ՀՀ ԱԳ նախարար Արարատ Միրզոյանը հանդիպում է ունեցել Եվրոպական հանձնաժողովի փոխնախագահ, ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասի հետ, հայտնում է ՀՀ ԱԳՆ մամուլի ծառայությունը։

Զրուցակիցները քննարկել են ՀՀ-ԵՄ գործընկերության ռազմավարական օրակարգի հետևողական կյանքի կոչման հարցեր:

Հանգամանալից անդրադարձ է կատարվել մայիսին Երևանում կայանալիք ՀՀ-ԵՄ գագաթնաժողովի բովանդակային նախապատրաստման հարցերին. ընդգծվել է ՀՀ քաղաքացիների համար շոշափելի արդյունքների ապահովմանն ուղղված ծրագրերի իրականացման շուրջ համաձայնությունը:

Արարատ Միրզոյանը և Կայա Կալասը քննարկել են ժողովրդավարական դիմակայունության շարունակական ամրապնդմանն ուղղված նախաձեռնությունները, որոնք ՀՀ-ԵՄ արժեքահեն գործընկերության և ռազմավարական օրակարգի կարևոր մաս են կազմում: Այս համատեքստում համաձայնություն է ձեռք բերվել ժողովրդավարական գործընթացներին աջակցության նպատակով առկա հստակ մեխանիզմների շարունակականության և արդյունավետության ապահովման շուրջ:

Բերման է ենթարկվել «Ուժեղ Հայաստան» կուսակցության անդամ Գոհար Ղումաշյանը, այս մասին ֆեյսբուքյան եթերում հայտնել է «Ուժեղ Հայաստան» կուսակցության անդամ, փաստաբան Գոհար Մելոյանը՝ հավելելով, որ Ղումաշյանը մանկահասակ երեխա ունի։ «Սա վախերի հերթական դրսևորումն է»,- նշել է փաստաբանը։

«Նախընտրական ծրագրում եկեղեցու վերաբերյալ այդպիսի թեզ ամրագրելը հակասահմանադրական է: Երկրի իշխանությունը նման գործառույթով օժտված չէ»,- դատական նիստից հետո լրագրողների հետ զրույցում ասել է Մայր Աթոռի դիվանապետ Արշակ Սրբազանը՝ անդրադառնալով ՔՊ-ի նախընտրական ծրագրում ընդգրկված դրույթին, որով նախատեսվում է Հայաստանյայց Առաքելական Սուրբ Եկեղեցու փաստացի պետի հեռացում, Կաթողիկոսական տեղապահի ընտրություն, Հայաստանյայց Առաքելական Սուրբ Եկեղեցու Կանոնադրության ընդունում և Ամենայն Հայոց Կաթողիկոսի ընտրություն:

«Այն, որ «Քաղաքացիական պայմանագիր» կուսակցությունը նախընտրական ծրագրում այդպիսի դրույթ է ընդգրկել, ինքնին խոսում է այն մասին, որ ինչպես նախընթաց ծրագրում ընդգրկված թեզերը չեն իրագործվել, նույնը և սա չեն կարող իրագործել: Ես սրա մեջ ուրիշ ուղերձ էլ եմ տեսնում, ուղիղ տեքստով ասում են՝ ովքեր Եկեղեցու հետևորդներ, դավանող են, մեզ մի՛ ընտրեք»,- հավելել է Սրբազանը: