Author: Julbaz

Երևանի նախկին քաղաքապետ, «Նոր ուժ» կուսակցության վարչապետի թեկնածու Հայկ Մարությանի ֆեյսբուքյան գրառումը․ «Սիրելի ժողովուրդ, Հայոց ցեղասպանության 111-րդ տարելիցն է։
     Մեր սուրբ նահատակների հիշատակը ոգեկոչելով հանդերձ, այսօր ստիպված ենք նորից արձանագրել մի քանի պարզ ճշմարտություն՝ հակադարձելու համար գործող իշխանության ուրացման ամոթալի փորձերին։
     Խաղաղությունը բոլորիս ցանկությունն է, և իրական ու ամուր խաղաղությունը կգա միայն անկեղծ, անկաշկանդ և փոխադարձ հարգանքի վրա հիմնված երկխոսության պայմաններում։
     Առանց հանցանքի ընդունման չի կարող լինել վստահություն, որ այն չի կրկնվելու։ Ասվածի ապացույցը մենք քանիցս տեսել ենք։
     Շարունակվող ժխտողականությունն ու հայատյացության դրսևորորումները խաղաղ համակեցության ձգտման մասին չեն վկայում։
     Արժանապատիվ հաշտությունն ու բարիդրացիությունը հնարավոր են, բայց ոչ երբեք՝ կեղծիքի և անորոշության պայմաններում։
     Թող մեր սուրբ նահատակները բարեխոս լինեն մեր երկրի ու ժողովրդի համար։
     Աստված մեզ պահապան»։

ՀՅԴ Հայաստանի Գերագույն մարմնի նախկին անդամ Արթուր Եղիազարյանը ֆեյսբուքյան իր էջում գրում է․ «Ես լավ կարծիք չեմ կարող ունենալ մի անձի մասին, որը գնում է ազգականի թաղմանը, իսկ նույն օրվա երեկոյան, էքստազի մեջ ընկած՝ պարում ծանոթի կազմակերպած խնջույքին։
     Նույնը նաև՝ ապրիլի 24-ին Ծիծեռնակաբերդ բարձրացողի, որն ապրիլի 25-ին տժժալու է Հանրապետության Հրապարակում ու Ամիրյան փողոցում։
     Չգիտեմ… յուրաքանչյուրի բարոյական նկարագիրը սկսում է հայելու առջև սեփական աչքերի մեջ նայելուց…»: