Author: Julbaz

Իրավապահները ընտրակաշառքների հարցով գործելու են շատ խիստ․ անկախ նրանից կգործեք բաց կապով, թե աղունիկով․ Սիմոնյան

Ապրիլի 28-ի ցերեկը, 29-30-ը, մայիսի 1-3-ը առանձին շրջաններում սպասվում է կարճատև անձրև և ամպրոպ, տեղ-տեղ հնարավոր է կարկուտ: Ապրիլի 29-ի գիշերը լեռնային շրջաններում տեղումները կլինեն թաց ձյան տեսքով։ Քամին՝ հարավարևմտյան,2-5 մ/վ, ամպրոպի ժամանակ սպասվում է նաև քամու ուժգնացում՝ 16-20 մ/վ արագությամբ։

Օդի ջերմաստիճանը ապրիլի 28-ի և 29-ի ցերեկը աստիճանաբար կնվազի ևս 2-3 աստիճանով, ապրիլի 30-ին և մայիսի 1-3-ը աստիճանաբար կբարձրանա 5-9 աստիճանով։

Երևանում ապրիլի 28-ին՝ կեսօրից հետո, 29-30-ին՝ գիշերը և կեսօրից հետո, մայիսի 1-3-ը՝ երեկոյան ժամերին, սպասվում է կարճատև անձրև և ամպրոպ, ամպրոպի ժամանակ սպասվում է նաև քամու ուժգնացում՝ 16-19 մ/վ արագությամբ։

Ամփոփվել է հանրակրթական ուսումնական հաստատությունների տնօրենների հավակնորդների համար նախատեսված «Կրթության կառավարում և առաջնորդություն» յոթամսյա վերապատրաստման ծրագրի հերթական փուլը։ Ծրագրի մասնակիցները ստացել են հավաստագրեր։ Այս մասին տեղեկացնում են ԿԳՄՍՆ-ից:

Ծրագիրն իրականացվում է ՀՀ կրթության, գիտության, մշակույթի և սպորտի նախարարության և «Այբ» կրթական հիմնադրամի համագործակցությամբ:

Միջոցառմանը մասնակցել է ԿԳՄՍ նախարարի տեղակալ Արաքսիա Սվաջյանը, «Այբ» կրթական հիմնադրամի գործադիր տնօրեն Վահե Գաբրիելյանը, «Հ․ Հովնանյան» ընտանեկան հիմնադրամի ղեկավար Կորյուն Խաչատուրյանը, վերապատրաստող փորձագետները, ծրագրի մասնակիցները։

Ողջունելով ներկաներին՝ ԿԳՄՍ նախարարի տեղակալ Արաքսիա Սվաջյանը նշել է, որ իրականացված համատեղ աշխատանքն ուղղված է հանրակրթության ոլորտում դպրոցի կառավարման դժվարությունները հաղթահարելուն: Նա ընդգծել է, որ վերջին շրջանում տնօրենների հավակնորդները, որոնք մասնակցում են թափուր հաստիքների մրցույթին, ավելի պատրաստված են ներկայանում՝ հիմքից պատկերացնելով խնդիրները, ինչը, ըստ նրա, ուսուցչական փորձի, ներսից խնդիրները դիտարկելու արդյունք է. «Մեզ համար կարևոր է՝ ուսուցիչները, որոնք աշխատել կամ աշխատում են դպրոցում և իրենց մեջ նկատում են առաջնորդական հատկություններ, նախաձեռնողականություն, սկսում են հավատալ, որ կարող են այս գործընթացով անցնել և դառնալ կառավարիչ»:

Արաքսիա Սվաջյանը շնորհակալություն է հայտնել մասնակիցներին՝ ցուցաբերած հետաքրքրության, մասնագիտական զարգացման շարունակականության, ինչպես նաև գործընկերներին՝ հաջող համագործակցության համար՝ նշելով, որ փորձը ցույց է տալիս՝ միայն բովանդակային ծրագիր և լավ դասավանդողներ ունենալը բավարար երաշխիք չեն պատրաստված հավակնորդ լինելու համար, և այսօրինակ վերապատրաստումներն ամբողջացնում են հավակնորդների պատրաստվածությունը:

Նա բոլոր մասնակիցներին բարի ընթացք է մաղթել՝ հույս հայտնելով, որ նրանց հետ կհանդիպեն արդեն հարցազրույցների փուլում:

«Մենք խորապես գնահատում ենք ուսուցիչների և դպրոցների տնօրենների դերը Հայաստանում կրթության որակը բարելավելու գործում և մեր առաքելությունն ենք համարում նրանց օժանդակելը: Կրթության կառավարման և առաջնորդության վերապատրաստման ծրագրերը «Այբ» հիմնադրամը նախաձեռնում և իրագործում է հենց այս տեսլականով: Սա պարզապես անհատների վերապատրաստման ծրագիր չէ, սա ծրագիր է մարդկանց համար, որոնք, լիահույս ենք, իսկապես վերափոխելու են իրենց դպրոցները մասնավորապես, կրթությունը՝ ընդհանրապես»,- ասել է «Այբ» կրթական հիմնադրամի գործադիր տնօրեն Վահե Գաբրիելյանը:

Դասընթացը մեկնարկել է 2025 թ․ սեպտեմբերին և շարունակվել մինչև 2026 թ․ ապրիլը: Վերապատրաստման մասնակիցները հնարավորություն են ունեցել ձեռք բերելու դպրոցի զարգացման ծրագրի մշակման և դրա որակի գնահատման հմտություններ, զարգացնելու կրթական կառույցի ռազմավարական կառավարման գիտելիքներն ու կարողությունները։

Ծրագրի մասնակցելու հայտ է ներկայացրել 298 մասնակից, որոնցից ընտրվել է 60-ը: Աշխատանքներն իրականացվել են 2 խմբով՝ համակցված ձևաչափով, ընդհանուր տևողությունը (2 խմբի պարագայում) 252 ժամ, որից 143 ժամն առկա, 109 ժամը՝ առցանց:

«Կրթության կառավարում և առաջնորդություն» վերապատրաստման ծրագիրը մշակել է և իրականացրել է «Այբ» կրթական հիմնադրամը՝ միջազգային գործընկերոջ՝ Լոնդոնի համալսարանական քոլեջի Կրթության ինստիտուտի (UCL IOE) հետ համագործակցությամբ: Դասընթացի հերթական փուլն իրականացվել է «Հ․ Հովնանյան» ընտանեկան հիմնադրամի ֆինանսավորմամբ:

Դասընթացի նախորդ փուլն իրականացվել էր ՅՈՒՆԻՍԵՖ-ի գործընկերությամբ:

ԱԺ «Քաղաքացիական պայմանագիր» խմբակցության պատգամավոր Հասմիկ Հակոբյանը «Ֆեյսբուք»-ի իր էջում անդրադարձել է Արման Թաթոյանի քաղաքական որոշումներին։

«Պարզվում է՝ Արման Թաթոյանը, հիմնադրելով «Միասնության թևեր» քաղաքական նախաձեռնությունը, որի հիման վրա գրանցել է «Միասնության թևեր» կուսակցությունը, որոշել է չանդամակցել կուսակցությանն ու մնալ անկուսակցական:

Ինձ համար դժվար է հասկանալ՝ ինչու է մարդը հիմնադրում մի բան, որին պաշտոնապես չի անդամակցում:

Արդյո՞ք սա փորձ չէ քաղաքականության մեջ լինելով՝ մնալ քաղաքականացվածությունից դուրս, թե՞ սա անվստահության դրսևորում է սեփական թիմի հանդեպ ու պատասխանատվությունից խուսափում»,- գրել է նա:

Ապրիլի 27-ին Մեծ Բրիտանիայի
թագավոր Չարլզ III-ը և նրա տիկինը այցելել են Վաշինգտոն՝ 2007 թվականից ի վեր առաջին
անգամ։

ԱՄՆ նախագահ Դոնալդ Թրամփը
ի նշան ողջույնի թփթփացրել է Մեծ Բրիտանիայի թագավոր Չարլզ III-ի ուսին՝ խախտելով թագավորական
արարողակարգը: Այս մասին գրում է բրիտանական Daily Mail թերթը։

Սպիտակ տուն թագավորական
զույգի պետական այցի առաջին օրը տեղի է ունեցել չգրված կանոնից շեղում, ըստ որի՝ չպետք
է առաջինը ունենալ ֆիզիկական շփում թագավորական ընտանիքի անդամի հետ, գրում են բրիտանական
լրատվամիջոցները։

Մարմնի լեզվի փորձագետ Ջուդի Ջեյմսի խոսքով՝
թագավորական ուսին դիպչելը կարծես նաև քաղաքական ժեստ էր Սպիտակ տան ղեկավարի
կողմից։ Դրան նախորդել է ԱՄՆ նախագահի ֆիրմային ձեռքսեղմումը (որպես կանոն, նա
իրեն է ձգում դիմացինի ձեռքը)։

Բրիտանական թագավորի՝ 2007 թվականից ի վեր առաջին պետական
​​այցը կտևի մինչև ապրիլի 30-ը։ Չարլզ III-ը և թագուհի Կամիլան Վաշինգտոն են ժամանել չորսօրյա այցով՝ ԱՄՆ անկախության 250-ամյակի կապակցությամբ։

2017 թվականի համեմատությամբ 2025 թվականին գիտության
ֆինանսավորումն աճել է շուրջ 2.8 անգամ՝ կազմելով 185 տոկոս աճ։ Գիտության ոլորտում
գրանցվել է նաև աշխատավարձերի զգալի բարձրացում՝ մինչև 300 տոկոս և ավելի։ Այս մասին
ԳԱԱ-ում գիտական հանրության հետ հանդիպման ժամանակ հայտարարել է վարչապետ Նիկոլ Փաշինյանը։

Կառավարության ղեկավարը նշել է նաև, որ քննարկման
ընթացքում իր համար բացահայտվել են զարմանալի նոր փաստեր, որոնք, նրա համոզմամբ, կարող
են ազդեցություն ունենալ հետագա քաղաքականությունների մշակման վրա։ Այս համատեքստում
նա անդրադարձել է նաև ԳԱԱ նախագահ Աշոտ Սաղյանի ելույթին։

ԳԱԱ նախագահը հիշեցրել էր, որ նախորդ հանդիպումներից
մեկի ընթացքում վարչապետը հարց էր բարձրացրել՝ ինչու որոշ գիտական ուղղություններով
Հայաստանը չի փորձում դառնալ առաջատար։ Նրա խոսքով՝ դրա համար նախ անհրաժեշտ է ունենալ
ժամանակակից նյութատեխնիկական բազա, ինչպես նաև՝ համապատասխան ցանկություն և բարձր
մասնագիտական կարողություններ։

«Առաջինը ապահովվում է Կառավարության կողմից, իսկ
երկրորդը կախված է մեզանից։ Կկարողանա՞նք իրականացնել՝ կկարողանանք, եթե հարցին մոտենանք
բարձր պատասխանատվությամբ՝ բացառելով «գլուխ գովելու»  սինդրոմը, որը բավական խոր արմատներ ունի մեր հասարակությունում և գիտական
միջավայրում»,– նշել էր ԳԱԱ նախագահը։

Վարչապետ Փաշինյանը, անդրադառնալով այս դիտարկմանը,
ասել է. «Երբ խոսում էիք գլուխ գովելու մոտեցման և որակավորման խնդիրների մասին, մտածեցի՝
գուցե սխալվում եմ, բայց, կարծես, առաջին անգամ եմ ԳԱԱ շենքում նման ձևակերպումներով
ելույթ լսում։ Սա կարևոր փոփոխություն է, որովհետև նախ պետք է փոխվեն մեր մտածողությունն
ու լեզվամտածողությունը։

Այս առումով ուզում եմ նշել, որ երբեմն ինձ անհանգստացնում
է, երբ ասում են՝ Կառավարությունը աջակցում է գիտությանը, որովհետև այդ ձևակերպումը
որոշակի հեռավորություն է ստեղծում Կառավարության և գիտության միջև։ Մենք գիտությանը
պարզապես չենք աջակցում․ գիտության զարգացումը մեր պետական քաղաքականությունն է։ Մենք
չենք պատկերացնում, որ կա պետություն և առանձին՝ ինչ-որ հեռավորության վրա գտնվող գիտություն,
որին պետք է աջակցել։ Գիտության զարգացումը մեր քաղաքականության անբաժանելի մասն է,
և դա ունի հստակ հիմնավորում։ Մենք չենք պատկերացնում պետության զարգացում առանց գիտության
զարգացման, ինչպես նաև գիտության զարգացում՝ առանց կրթության զարգացման»։

Փաշինյանի խոսքով՝ պետության զարգացումը նախ և առաջ
ենթադրում է տնտեսության զարգացում։ Նա ընդգծել է, որ գիտությունը նաև տնտեսություն
է, քանի որ դրա արդյունավետ կառավարումն ու գիտությանը հատկացվող միջոցների նպատակային
օգտագործումը կարևոր գործիքներ են բազմաթիվ խնդիրների լուծման համար։

«Երբ խոսում ենք պետության զարգացման մասին, պետք
է հասկանալ, որ գիտության զարգացումը մեզ համար առանձին ոլորտ չէ։ Կներեք, բայց գիտության
զարգացումը ինքնին առանձին իմաստ չունի։ Հարց է առաջանում՝ գիտությունը զարգանա՝ ինչի՞
համար։ Մեզ համար գիտության զարգացումը հենց պետության զարգացման հիմքն է»,– եզրափակել
է վարչապետը։

Սննդամթերքի անվտանգության տեսչական մարմինը հայտնում է, որ ռուսական մամուլում տարածված տեղեկությունների ֆոնին «Ջերմուկ» հանքային ջրի որոշ խմբաքանակների իրացման հնարավոր կասեցման վերաբերյալ ՌԴ պատկան մարմիններից պաշտոնական որևէ հաղորդագրություն չի ստացել, և ներկայումս քայլեր են ձեռնարկվում իրավիճակը պարզաբանելու ուղղությամբ։

«Համաձայն ռուսական և հայկական մամուլում տարածված տեղեկությունների՝ ռուսական պետական «Անկեղծ նշան» (Честный знак) մակնշման համակարգն արգելափակել է «Ջերմուկ Գրուպ» ՓԲԸ արտադրության «Ջերմուկ» ապրանքանիշի՝ 2026 թվականի փետրվարի 17-ին և մարտի 5-ին արտադրված խմբաքանակների իրացումը: Ըստ հրապարակումների՝ կասեցման հիմքը Ռուսաստանի Դաշնության սպառողների իրավունքների պաշտպանության և մարդու բարեկեցության վերահսկման դաշնային ծառայության՝ «Ռոսպոտրեբնադզորի» գրությունն է «պարտադիր չափորոշիչների խախտումների» մասին։

ՀՀ սննդամթերքի անվտանգության տեսչական մարմինը ՌԴ համապատասխան պատկան մարմիններից՝ «Ռոսպոտրեբնադզորից» կամ «Ռոսսելխոզնադզորից» (ՌԴ անասնաբուժական և բուսասանիտարական վերահսկողության դաշնային ծառայություն), պաշտոնական որևէ տեղեկություն՝ գրություն, խնդրո առարկայի վերաբերյալ առայժմ չի ստացել:

Ձեռնարկվում են միջոցներ իրավիճակը պարզաբանելու և համապատասխան քայլեր ձեռնարկելու ուղղությամբ:

Արդյունքները կհրապարակվեն»,- ասվում է հաղորդագրությունում: