Author: Julbaz

«էկոԼուր» տեղեկատվական ՀԿ-ն ահազանգ էր ստացել Մեղրի համայնքի բնակիչներից, որ Հյուսիս-հարավ ճանապարհի շինարարական աշխատանքների ընթացքում քարեր են լցվել Մեղրի գետի կիրճ մի քանի հատվածներում՝ փակելով գետի հունը։ Հաշվի առնելով գարնան վարարումները՝ հնարավոր են հեղեղումներ։ Էկոլուրին ուղարկել են լուսանկար, որն արված է Մեղրի-Քաջարան ավտոճանապարհից՝ Լիճք բնակավայր չհասած հատվածում։

Էկոլուրը մարտի 3-ին ահազանգը փոխանցել է ՀՀ բնապահպանության և ընդերքի տեսչական մարմին։ Ի պատասխան տեսչական մարմնի Սյունիքի տարածքային բաժնի պետ Նարեկ Դավթյանը հայտնել է․ «ՀՀ բնապահպանության և ընդերքի տեսչական մարմնի Սյունիքի տարածքային բաժնի աշխատակիցներն այցելել են Մեղրի համայնք, Մեղրի գետի երկայնքով ուսումնասիրություն են կատարել: Այցելության պահին Մեղրի գետը մաքրված էր քարերից»։

Մարտ 26, 2026 at 16:26

«Բնապահպանի տուն» քաղաքացիական նախաձեռնությունը մարտի 21-ին ֆեյսբուք սոցիալական ցանցում տարածեց տեսանյութ այն մասին, որ «Դիլիջան» ազգային պարկի և Դիլիջանի համայնքային տարածքում կատարվել են մեծաքանակ ծառահատումներ։

ՀՀ շրջակա միջավայրի նախարարության Էկոպարեկային ծառայության պետական անտառների, անտառային հողերի և բնության հատուկ պահպանվող տարածքների ռիսկերի կառավարման վարչության պետ Սևակ Մարկոսյանն Էկոլուրին հայտնեց, որ ծառահատումներն իրականացվել են «Դիլիջան» ազգային պարկի տարածքից դուրս,  տվյալ տարածքն ամբողջությամբ գտնվում է Դիլիջան համայնքի կազմում։

Նա նշեց, որ դեպքի մասին տեղեկանալով իրականացրել են նախնական ուսումնասիրություն։ Այնուհետև, մարտի 23-ին գրություն են ստացել ՀՀ քննչական կոմիտեի Տավուշի մարզային քննչական վարչության Դիլիջանի քննչական բաժնի կողմից, որ դեպքի առթիվ հաղորդում է տրվել, որում նշվել է ապօրինի հատված 100 ծառի մասին։  «Ստեղծվել է  խումբ, որում ներառված էր նաև էկոպարեկային ծառայության Դիլիջանի  տեղամասի պարտականություններ կատարողը, նաև եղել են ներկայացուցիչներ «Բնապահպանի տուն» կազմակերպությունից, Բնապահպանության և ընդերքի տեսչական մարմնից։ Տեղում կատարված ուսումնասիրություններով պարզվել է, որ այդ տարածքն ամբողջությամբ համայնքային տարածք է և դուրս է «Դիլիջան» ազգային պարկի տարածքից։ Քարտեզներով, կոորդինատներով համադրում են կատարել, և պարզվել է, որ ազգային պարկի սահմաններից դուրս է գտնվում։ Այսինքն, այն չի հանդիսանում «Դիլիջան» ազգային պարկի տարածք»,-  ասաց Սևակ Մարկոսյանը։

Մարտ 26, 2026 at 17:44