Author: Julbaz

Կառավարության նիստից հետո ճեպազրույցում լրագրողներից մեկը վարչապետ Նիկոլ Փաշինյանից հետաքրքրվեց, թե Հայաստանն ինչ քայլեր է արել ԱՄՆ նախագահ Դոնալդ Թրամփի՝ Իրանի հետ կապված այն հայտարարությունից հետո, որում նշված էր, որ «քաղաքակրթություն կվերանա»:

«Այդ հայտարարությունից ժամուկես հետո հրավիրվել է ԱԽ ընդլայնված նիստ, որտեղ իրադրությունը քննարկվել է, և Ձեր ասած բոլոր հարցերը քննարկվել են: Այո, այդ նիստի մասին հրապարակում չի եղել: Ընդհանրապես, ես Ձեզ ասեմ, պարզապես մենք լուսաբանում ենք ԱԽ հերթական նիստերը: ԱԽ ընդլայնված ձևաչափով ես, եթե սուտ չասեմ, տենց ամիս չկա, որ մենք 5-6 նիստ չանենք, բացարձակապես տենց ամիս չկա: Վերջին մի ամսվա ընթացքում էլ մենք տասնյակ նիստեր ենք արել, որոնց մի մասը լուսաբանել ենք, մյուս մասը չենք լուսաբանել, որովհետև դրա անհրաժեշտությունը ենք տեսել:

Փորձել ենք այդ հայտարարությունը գնահատել, մեր դիվանագիտական կապուղիներով մեր ունեցած տեղեկատվությունը գնահատել և այլն: Այսինքն՝ այդ աշխատանքի մեծ մասը գաղտնիության ռեժիմում է տեղի ունենում, բայց բովանդակությունն էլ ամբողջությամբ գաղտնի է: Այսքանը կարող եմ ասել: Ես երեկ գրառմամբ ողջունել եմ և հիմա էլ ողջունում եմ հրադադարի շուրջ պայմանավորվածությունը, և ես նաև երկու երկրների ղեկավարությանը ճանաչելով՝ համոզված եմ, որ ամեն ինչ կարվի խաղաղ հանգուցալուծման համար և ուզում եմ նաև շնորհակալություն հայտնել նրանց, երկու կողմերին հրադադարի համաձայնությունը ձեռք բերելու համար, որովհետև պատկերացնում եմ, թե դա ինչքան դժվար է տրվել»,- նշեց վարչապետը:

Եվրոպական միության դիվանագիտության ղեկավար Կայա Կալասը հայտարարել է, որ Իսրայելի հարվածները Լիբանանին դուրս են գալիս ինքնապաշտպանության սահմաններից և սպառնալիքի տակ են դնում հրադադարը։ Այս մասին նա գրել է X սոցիալական հարթակում։

«Լիբանանին հակամարտության մեջ ներքաշել է «Հեզբոլլահ»-ը, բայց Իսրայելի ինքնապաշտպանության իրավունքը չի արդարացնում այդքան լայնածավալ ավերածությունները: Իսրայելի հարվածներն անցյալ գիշեր սպանել են հարյուրավոր մարդկանց. բարդ է պատճառաբանել, որ նման կոշտ գործողությունները մտնում են ինքնապաշտպանության մեջ: Իսրայելի գործողությունները լուրջ լարվածության են ենթարկում Իրանի և Միացյալ Նահանգների միջև հրադադարը, որը պետք է տարածվի Լիբանանի վրա», – գրել է նա։