Category: ABCNews

Մարոկկոյի թագավոր Մոհամեդ VI-ի որոշմամբ Տիզնիտ-Դախլա ավելի քան 1055 կմ երկարությամբ մայրուղին անվանակոչվել է ԱՄՆ նախագահ Դոնալդ Թրամփի պատվին․ այդ մասին գրում է РИА Новости-ն՝ վկայակոչելով MAP լրատվական գործակալությանը։

Ինչպես գրում է MAP պետական գործակալությունը, թագավորը Թրամփին ուղղված նամակում նշել է, որ որոշումը պայմանավորված է 2020 թվականին նրա վարչակազմի կողմից Արևմտյան Սահարայի նկատմամբ Մարոկկոյի ինքնիշխանության ճանաչմամբ։

Մոհամեդ VI-ի խոսքով՝ մայրուղին ռազմավարական նշանակություն ունի՝ միացնելով Մարոկկոյի հյուսիսն ու հարավը, նաև Եվրոպան և Աֆրիկյան մայրցամաքը։

MAP-ի տվյալներով՝ Թրամփը հուլիսի 26-ին շնորհակալություն է հայտնել Մարոկկոյի թագավորին այդ որոշման համար և հայտնել, որ հույս ունի մոտ ապագայում անցնել մայրուղու ամբողջ երկայնքով։

Օգոստոսի 2-ին շղթայական ավտովթար է տեղի ունեցել Երևանում՝ Նուբարաշեն-Մասիս ավտոճանապարհի 5-րդ կմ հատվածում․ բախվել են «Nissan», «Opel» և «Գազել» մակնիշի բեռնատարը․ գրում է shamshyan.com-ը։

Վթարի հետևանքով մեկ մարդ տեղափոխվել է հիվանդանոց, ևս մեկ տուժած տեղում ստացել է բուժօգնություն, սակայն հրաժարվել է հոսպիտալացումից։

Բախման հետևանքով «Nissan»-ը դուրս է եկել երթևեկելի հատվածից և բախվել դիզվառելիքի համար նախատեսված երկաթե բաքին, որն էլ իր հերթին հարվածել է ճանապարհի թույլատրելի հատվածում կայանված ավտոբուսին։

Նախագահ Վահագն Խաչատուրյանի հրամանագրով Նիկոլ Փաշինյանը նշանակվել է Հայաստանի Հանրապետության վարչապետի պաշտոնում։

Հիշեցնենք՝ այսօր Փաշինյանը հայտարարեց Կառավարության հրաժարականի մասին, ինչից հետո իշխող «Քաղաքացիական պայմանագիր» խմբակցությունն առաջադրեց նրան վարչապետի պաշտոնում։

Հորմուզի նեղուցի վերաբացման վերաբերյալ ավելի վաղ տարածված տեղեկությունները կեղծ են․ գրում է իրանական Fars գործակալությունը՝ հղում անելով աղբյուրներին։

Լրատվականի փոխանցմամբ՝ նեղուցում սահմանափակումները կպահպանվեն այնքան ժամանակ, քանի դեռ շարունակվում են ԱՄՆ-ի «թշնամական գործողությունները»։

Նշվում է, որ նավերի անցումը թույլատրվում է միայն հատուկ սահմանված երթուղիներով և Իրանի Իսլամական հեղափոխության պահապանների կորպուսի (ԻՀՊԿ) ռազմածովային ուժերի համաձայնությամբ։

ԱԺ 9-րդ գումարման Ազգային ժողովը կունենա 105 պատգամավոր. «Քաղաքացիական պայմանագիր» կուսակցությունը կունենա 64 մանդատ, «Ուժեղ Հայաստանը»՝ 29, իսկ «Հայաստան» դաշինքը՝ 12 մանդատ։

Խորհրդարանում չեն լինի «Բարգավաճ Հայաստան» կուսակցության անդամները, որոնց բացակայությունը, Գագիկ Ծառուկյանի կարծիքով, զգալու են շատերը։
Նոր խորհրդարանում չի լինի նաև «Պատիվ ունեմ» խմբակցությունը։

Նախորդ գումարման խորհրդարանը տեսավ Արցախի վերջին պատերազմն ու բռնազավթումը, սահմանազատումը՝ Տավուշում։ Եղան հարյուրավոր բանավոր հարց ու ելույթներ, օրենսդրական նախաձեռնություններ, հայտարարության նախագծեր, 160-ից ավելի գործուղում։ Բացի այդ՝ 600 միլիոն դրամից ավելի պարգևավճար ստացան պատգամավորները․ իսկ ընտրողները դրանից բացի տեսան սկանդալներ, հայհոյանքներ, վեճեր։

Խորհրդարանի նախկին դեմքերից շատերը իրենց տեղում են՝ նոր պաշտոններով։ Օրինակ՝ ՔՊ-ականներից Ռուբեն Ռուբինյանը ԱԺ նախագահի թեկնածու է, Վահագն Ալեքսանյանը՝ փոխնախագահի։  ԱԺ-ում ՔՊ-ականների աթոռներին կլինեն Նազելի Բաղդասարյանը՝ Նիկոլ Փաշինյանի նախկին խոսնակը, Արայիկ Հարությունյանը՝ Կառավարության աշխատակազմի նախկին ղեկավարը, Վիլեն Գաբրիելյանը, որ 8-րդ գումարման պատգամավորի մանդատից զրկվել էր Գյումրիում սկանդալային միջադեպից հետո։

Ընդդիմադիր «Հայաստան» կուսակցությունների դաշինքը 8-րդ գումարման խորհրդարանում 28 պատգամավոր ուներ, 9-րդին՝ 16-ով պակաս։ Երկու նոր անուն ունի դաշինքը․ Սևակ Խաչատրյանն ու Մեսրոպ Մանուկյանը։

Ընդդիմադիր ուժերի շարքում «Ուժեղ Հայաստան» կուսակցությունների դաշինքն է որպես նոր ուժ նոր դեմքերով; Կուսակցության երկրորդ համար Արամ Վարդևանյանն է նախկինում խորհրդարանում պատգամավոր եղել «Հայաստան» խմբակցության ցուցակով։

Ի տարբերություն նախորդ գումարմանը՝ ՔՊ-ն խորհրդարանում չունի Սահմանադրական մեծամասնություն։

«Ուժեղ Հայաստան» խմբակցության՝ ԱԺ փոխնախագահի թեկնածուն Արամ Վարդևանյանն է․ այս մասին «Ազատության» հետ զրույցում հայտնել է խմբակցության ղեկավար Նարեկ Կարապետյանը։

Կարապետյանի խոսքով՝ որոշումը կայացվել է՝ հաշվի առնելով Վարդևանյանի փորձը և պրոֆեսիոնալիզմը։

ԱԺ նախագահի թեկնածու Ռուբեն Ռուբինյանը հայտարարել է, որ հասարակության շրջանում ձևավորվել է ընկալում, ըստ որի՝ խորհրդարանը դարձել է «անարդյունավետ բանավեճերի, փոխադարձ վիրավորանքների և անհարկի լարվածության» հարթակ։

Նրա խոսքով՝ վտանգ կա, որ 9-րդ գումարման Ազգային ժողովն այդ առումով կարող է չտարբերվել կամ նույնիսկ ավելի վատը լինել։

«Ես ուզում եմ առաջարկել, որ մենք միասին կոտրենք այս նախախնամությունը կամ անեծքը․ ես, բնականաբար, այնքան միամիտ չեմ, որ կարծեմ՝ կարող ենք հենց հիմա բոլորս պայամանավորվել․ «եկեք բարեկիրթ լինենք, եկեք չվիրավորենք իրար» և այլն։

Դա կլինի պատրանք, «խաղաղություն աշխարհին»-ի պես կենաց։ Ես առաջարկում եմ հասկանալ պատճառը՝ ինչու՞ է վերջին տարիներին ձևավորվել այսպիսի մշակույթ։ Ես ունեմ իմ տարբերակը և իմ առաջարկած լուծումը, ամենևին չհավակնելով վերին ատյանի ճշմարտություն լինելու դերին, հրավիրում եմ ձեզ քննարկման, եթե պատեհ կհամարեք։

Ես առաջարկում եմ, և համարում եմ այս օրը զրոյական կետ՝ իմ և ձեր հարաբերություններում և ընդհանրապես, զրոյական կետ խորհրդարանական հարաբերություններում։ Ընդունել կոնսենսուս՝ բարեկիրթ, սուր, շատ սուր, բայց բարեկիրթ բանավեճ միմյանց միջև և կառուցողական խորհրդարանական աշխատանք»,- ասել է նա։

Նրա գնահատմամբ՝ 2018 թվականից հետո խորհրդարանում անհանդուրժողականության մթնոլորտ է ձևավորվել, քանի որ ընդդիմությունը «չի ընդունել ժողովրդի կայացրած ընտրությունը»։

ՀՀ Սահմանադրության 158–րդ հոդվածի համաձայն՝ նորընտիր Ազգային ժողովի առաջին նստաշրջանի օրը Կառավարությունը հրաժարական է ներկայացում. այդ մասին ուղերձի ընթացքում հայտարարել է  Նիկոլ Փաշինյանը։

«Այս պայմաններում մինչև նոր կառավարության ձևավորումը կառավարության անդամները շարունակում են կատարել իրենց պարտականությունները, իսկ հաջորդիվ Սահմանադրության 149-րդ հոդվածի համաձայն՝ ՀՀ նախագահը նորընտիր ԱԺ-ի լիազորությունների ժամկետը սկսելուց հետո անհապաղ վարչապետ է ներկայացնում խորհրդարանական մեծամասնության ներկայացրած թեկնածուին»,- ասել է Փաշինյանը։

Նրա խոսքով՝ խորհրդարանական մեծամասնությունը կներկայացնի վարչապետի թեկնածուին, և համապատասխանաբար տեղի կունենա նշանակում՝ ՀՀ Սահմանադրության 148-րդ հոդվածի համաձայն։

ԱԺ 9-րդ գումարման առաջին նիստը մեկնարկեց լարված մթնոլորտում․ ՀՀ նախագահ Վահագն Խաչատուրյանի ելույթից հետո «Ուժեղ Հայաստան» խմբակցության պատգամավոր Նարեկ Կարապետյանը հարցրեց՝ որտե՞ղ է կաթողիկոսը։

Հիշեցնենք, որ պատմության մեջ առաջին անգամ Վեհափառը նոր գումարվող խորհրդարանի առաջին նիստին հրավիրված չէ։

Կարապետյանի հնչեցրած հարցը կրկնեցին նաև ընդդիմադիր այլ պատգամավորներ, իսկ նիստը նախագահող Կնյազ Հասանովը հորդորեց չխանգարել։

Ընդդիմադիր «Ուժեղ Հայաստան» և «Հայաստան» խմբակցությունները նախագահի ելույթից հետո չծափահարեցին, իսկ երբ Կնյազ Հասանովն ընթերցում էր պատգամավորների երդման տեքստը, ոտքի կանգնեցին։

Այսօր իր աշխատանքներն է սկսում ՀՀ ժողովրդի ազատ կամարտահայտությամբ ձևավորած նոր ազգային ժողովը․ ՀՀ 9-րդ գումարման ԱԺ-ի 1-ին նստաշրջանի ելույթի ընթացքում հայտարարել է նախագահ Վահագն Խաչատուրյանը։

«Այս խորհրդարանի գործունեության արդյունքները չափվելու են ոչ միայն ընդունված օրենքների քանակով, այլև դրանց որակով, հանրային ազդեցությամբ և պետության երկարաժամկետ զարգացմանը բերված նպաստով․ ՀՀ քաղաքացիներն այս դահլիճից ակնկալում են հասուն քաղաքականություն, պատասխանատու օրենսդրություն և այնպիսի բանավեճ, որի առանցքում կլինի ոչ թե քաղաքական հակադրությունը, այլ պետական մտածողությունը»,- ասել է նա։

Նա ընդգծել է, որ ԱԺ-ում գաղափարների մրցակցությունը պետք է վերածվի պետական լուծումների, իսկ  քաղաքական տարաձայնությունները՝ ավելի լավ որոշումների։