ԱՄՆ Զինված ուժերի շտաբների պետերի միացյալ կոմիտեի նախագահ, գեներալ Դեն Քեյնը վերջին շաբաթներին կոչ է անում ելք փնտրել Իրանի հետ պատերազմից, քանի որ կարծում է, որ հետագա ռազմական էսկալացիան կարող է բացասական հետևանքներ ունենալ, միայն ավիահարվածները բավական չեն լինի նախագահ Դոնալդ Թրամփի հայտարարած նպատակներին հասնելու համար, հայտնել է CNN-ը՝ հղում կատարելով աղբյուրներին։
Հեռուստաալիքի տվյալներով՝ Քեյնը հակամարտությունից «ելք» գտնելու անհրաժեշտությունը քննարկել է ԿՀՎ տնօրեն Ջոն Ռեթքլիֆի, պետքարտուղար Մարկո Ռուբիոյի և փոխնախագահ Ջեյ Դի Վենսի հետ։ Գեներալը նաև առանձին հանդիպումներ է անցկացրել Թրամփի այլ ազդեցիկ խորհրդականների հետ՝ ԱՄՆ նախագահի հետ ռազմական տարբերակների քննարկումից առաջ դիրքորոշումները համաձայնեցնելու համար։
CNN-ի աղբյուրները նշել են, որ Քեյնը ձգտում է վարչակազմին ներկայացնել հետագա էսկալացիայի հասանելի տարբերակների սահմանափակումներն ու ռիսկերը, այդ թվում նաև նրանց, որոնք չեն նախատեսում ամերիկյան ցամաքային զորքերի ուղարկում Իրան։
Թրամփն ավելի վաղ բազմիցս ցույց է տվել, որ չի ցանկանում ներգրավել ցամաքային զորքեր՝ հույս ունենալով Թեհրանի հետ համաձայնության հասնել ավիահարվածների միջոցով։ Սակայն Քեյնը և վարչակազմի այլ ներկայացուցիչներ մասնավոր զրույցներում քիչ հավանական են համարում, որ միայն ռմբակոծությունները կստիպեն Իրանին ընդունել Վաշինգտոնի պայմանները։
«Ավիացիան իր սահմաններն ունի», — ասել է Քեյնը հուլիսի վերջին Կոնգրեսում անցկացված բաց լսումների ժամանակ։
CNN-ի տվյալներով՝ Քեյնը և մյուս բարձրաստիճան պաշտոնյաները զգուշությամբ են վերաբերվել նաև հուլիսի վերջին Իրանի դեմ նոր լայնածավալ հարվածներ հասցնելու ծրագրին։ Նրանց անհանգստացնում էին հետագա էսկալացիայի հնարավոր հետևանքները։ Ի վերջո, Թրամփը հրաժարվել է գործողությունն իրականացնելուց Մերձավոր Արևելքում դաշնակիցների հետ բանակցություններից հետո, որոնք նրան զգուշացրել էին տարածաշրջանի էներգետիկ ենթակառուցվածքին Իրանի պատասխան հարվածների սպառնալիքի մասին։
Եվս մեկ գործոն է ամերիկյան զինամթերքի պաշարների կրճատումը։ CNN-ի աղբյուրներն ավելի վաղ հայտնել էին, որ որոշ առանցքային սպառազինությունների պաշարները հասել են վտանգավոր ցածր մակարդակի։ Սա վերաբերում է, մասնավորապես, բարձր ճշգրտության հրթիռներին և հակաօդային պաշտպանության միջոցներին, որոնք անհրաժեշտ են ոչ միայն ամերիկյան ուժերին, այլև Վաշինգտոնի դաշնակիցներին։
Հեռուստաալիքի տվյալներով՝ Քեյնը առնվազն երկու վերջին հանդիպումների ընթացքում Թրամփին զգուշացրել է սպառազինությունների պաշարների կրճատման մասին։ Միևնույն ժամանակ, գեներալը նախագահին հասկացրել է, որ ամերիկյան զինված ուժերը կարող են հսկայական վնաս հասցնել Իրանին, եթե այն որոշի սկսել նոր լայնածավալ գործողություն։
CNN-ի աղբյուրները նշել են, որ Քեյնը զգուշորեն է կառուցում հարաբերությունները Թրամփի հետ և փորձում է նախագահի հետ բացահայտ առճակատման մեջ չմտնել։ Հանրային մակարդակում նա շարունակում է նախագահին ներկայացնել հասանելի ռազմական տարբերակները՝ միաժամանակ մասնավոր զրույցներում մատնանշելով դրանց հնարավոր հետևանքները։
Դեռ պատերազմն սկսվելուց առաջ Քեյնը նախազգուշացնում էր, որ երկարատև արշավը կարող է լրջորեն սպառել ամերիկյան սպառազինությունների պաշարները, այդ թվում՝ այն պաշարները, որոնք անհրաժեշտ են Իսրայելին և Ուկրաինային աջակցելու համար։ Այժմ, հակամարտության մեկնարկից գրեթե վեց ամիս անց, ամերիկյան զինվորականները որոշ զինամթերքների պաշարները գնահատում են «վտանգավոր ցածր»։
Միևնույն ժամանակ, CNN-ի տվյալներով, Քեյնը հանդես չի գալիս պատերազմի անհապաղ դադարեցման օգտին և ընդունում է, որ ԱՄՆ-ը կարող է զգալիորեն ուժեղացնել Իրանի դեմ հարվածները։ Սակայն նա և վարչակազմի մյուս ներկայացուցիչները կարծում են, որ հետագա էսկալացիան՝ առանց վերջնական արդյունքի հստակ պատկերացման, կարող է արդյունավետ չլինել։
Այդ պատճառով Վաշինգտոնում որոնում են հակամարտությունից դուրս գալու այնպիսի տարբերակ, որը Թրամփին թույլ կտա պատերազմի ավարտը ներկայացնել որպես քաղաքական հաղթանակ՝ չփակելով Իրանի հետ դիվանագիտական համաձայնության հնարավորությունը։ CNN-ը հնարավոր առաջին քայլերից մեկը համարում է Հորմուզի նեղուցի բացման շուրջ պայմանավորվածությունը։
