Category: News.am

Հիդրոօդերևութաբանության և մոնիթորինգի կենտրոնը ներկայացրել է Երևանում մթնոլորտային օդի որակը հուլիսի 29-ից օգոստոսի 4-ը։

Փոշու պարունակությունը գերազանցել է սահմանային թույլատրելի կոնցենտրացիան․

-Կենտրոնում՝ գրեթե ամբողջ շաբաթ,

-Արաբկիրում՝ հուլիսի 29-30-ը և օգոստոսի 2-ին,

-Նոր Նորքում՝ հուլիսի 30-ին,

-Շենգավիթում չի գերազանցել։

Ազոտի երկօքսիդի պարունակությունը գերազանցել Է սահմանային թույլատրելի կոնցենտրացիան․

-Կենտրոնում՝ հուլիսի 31-ին և օգոստոսի 2-4-ը,

-Նոր Նորքում՝ հուլիսի 29-31-ը, օգոստոսի 2-ին և 4-ին,

-Արաբկիրում և Շենգավիթում չեն գերազանցել։

Ծծմբի երկօքսիդի պարունակությունը չի գերազանցել սահմանային թույլատրելի կոնցենտրացիան։

Ռուսական զորքերը օգոստոսի 8-ի գիշերը բալիստիկ հրթիռներով հարված են հասցրել Կիևին, հայտնում է ՌԲԿ-Ուկրաինան։

Ուկրաինայի մայրաքաղաքում հնչել է վեցից ութ պայթյուն, հարձակման հետևանքով տուժել է չորս մարդ, հայտնել են Կիևի քաղաքապետ Վիտալի Կլիչկոն, Կիևի քաղաքային ռազմական վարչակազմը և Ուկրաինայի արտակարգ իրավիճակների պետական ծառայությունը։

Կիևում օդային տագնապ է հայտարարվել հրթիռային հարվածից մոտ մեկ րոպե առաջ։ Ավելի ուշ այն չեղարկվել է։

Նախնական տվյալներով՝ Գոլոսեևսկի շրջանում բռնկվել են ավտոտնակներ և ոչ բնակելի շինություններ։ Օբոլոնսկի շրջանում հրդեհ է առաջացել ձեռնարկության տարածքում, որտեղ բռնկվել են վառելիքի պահեստարանները։

Դեպքի վայրերում աշխատում են արտակարգ ծառայությունները, որոնք վերացնում են հարձակման հետևանքները։

Դրանից մեկ օր առաջ՝ օգոստոսի 5-ին, Կիևը նույնպես ենթարկվել է հրթիռների և անօդաչու թռչող սարքերի զանգվածային հարձակման։ Այդ ժամանակ զոհվել է մեկ մարդ, ավելի քան 20-ը վիրավորվել են։ Հարվածի տակ են հայտնվել, մասնավորապես, «Էպիցենտր», ROZETKA և «Նովա պոչտա» ընկերությունների օբյեկտները։

Օգոստոսի 1-ի գիշերը Կիևի վրա ռուսական հարվածի հետևանքով զոհվել է ինը մարդ, ևս 33-ը վիրավորվել են, այդ թվում՝ չորս երեխա։ Փրկարարներն ավարտել են վթարափրկարարական աշխատանքները օգոստոսի 2-ին։ Ընդհանուր առմամբ նրանց հաջողվել է փրկել 105 մարդու։

Անցյալ տարի աշխատանքից ազատված դաշնային դատախազ Ուիլ Ռոզենցվեյգը դատի է տվել ԱՄՆ արդարադատության նախարարությանը՝ մեղադրելով գերատեսչությանը իր խոսքի ազատության սահմանադրական իրավունքը խախտելու մեջ՝ նախագահ Դոնալդ Թրամփի մասին քննադատական հայտարարությունների պատճառով, հաղորդել է Associated Press-ը։

Ռոզենցվեյգը նշել է, որ իրեն ազատել են 2025 թվականի սեպտեմբերին՝ Medicare բժշկական ծրագրերի հետ կապված բազմամիլիոնանոց խարդախության գործի մեկնարկից ընդամենը երկու շաբաթ առաջ։ Նրա վարկածով՝ պատճառ են դարձել նրա անձնական բլոգում տեղադրված գրառումները, որոնք հրապարակվել էին նրա դաշնային դատախազ դառնալուց դեռ շատ առաջ։

Բլոգը, որն ազատման պահին ավելի քան վեց տարի չէր թարմացվել, պարունակում էր հրապարակումներ ճանապարհորդությունների, սպորտի և այլ ոչ քաղաքական թեմաների մասին, ինչպես նաև Թրամփի և այլ քաղաքական գործիչների հասցեին քննադատական արտահայտություններ։

Ըստ հայցի՝ համացանցում մեծ լսարան ունեցող պահպանողական քաղաքական մեկնաբան Նաթալի Ուինթերսը հրապարակել է Ռոզենցվեյգի հին քաղաքական գրառումների սքրինշոթները՝ նրան անվանելով «Թրամփի երդվյալ ատող»։ Նա նաև հրապարակել է նրա LinkedIn-ի էջի սքրինշոթը և նշել արդարադատության նախարարության ղեկավարներին։

Հրապարակումից երեք ժամ չանցած՝ Ռոզենցվեյգը ստացել է աշխատանքից ազատվելու մասին ծանուցմամբ էլեկտրոնային նամակ, որը ստորագրված էր այն ժամանակվա գլխավոր դատախազ Փեմ Բոնդիի կողմից։ Այդ պահին նա ընտանիքի հետ գտնվում էր քաղաքից դուրս և նշում էր հրեական Ռոշ հա-Շանա տոնը։

Ռոզենցվեյգը հինգ տարի աշխատել է դաշնային դատախազ Մայամիում։ Հայցում նրա փաստաբանները նրան ներկայացնում են որպես բարձր որակավորում ունեցող աշխատակից, որը բազմիցս ստացել է դրական գնահատականներ և պարգևներ։ Աշխատանքից ազատելուց քիչ առաջ նրան նույնիսկ հայտնել էին, որ աշխատանքի բարձր արդյունքների համար իրեն կտրամադրեն հատուկ կայանատեղի։

Հայցում Ռոզենցվեյգը պահանջում է վերականգնել իրեն պաշտոնում, վճարել աշխատավարձն աշխատանքից ազատվելուց հետո անցած ժամանակահատվածի համար և անօրինական ճանաչել արդարադատության նախարարության որոշումը։

Նրա փաստաբանները հայտնել են, որ գերատեսչությունը դատախազին ազատել է դատական գործընթացի նախօրեին՝ Թրամփի մասին քննադատական արտահայտությունների պատճառով, որոնք նա արել էր տարիներ առաջ որպես մասնավոր քաղաքացի։

ԱՄՆ արդարադատության նախարարությունը հրաժարվել է մեկնաբանել հայցը՝ հղում կատարելով շարունակվող դատական վարույթին։

Կատարում և Քուվեյթում ամերիկյան ռազմական բազաների դեմ գրոհներ իրականացնելու ժամանակ իրանցի օդաչուները չեն օգտագործել GPS, իներցիոն նավիգացիոն համակարգեր և ռադիոկապի միջոցներ, հայտնել է Իրանի ՌՕՈւ փոխհամակարգող, բրիգադի գեներալ Մասուդ Ջաֆարին, հաղորդել է Mehr-ը։

Նրա խոսքով՝ իրանցի օդաչուները սովոր են աշխատել պատժամիջոցների պայմաններում և վարժվել են կատարել մարտական առաջադրանքներ առանց GPS-ի և իներցիոն նավիգացիոն համակարգերի (INS)՝ օգտագործելով քարտեզներ և նավիգացիայի հիմնական մեթոդներ։

Ջաֆարին գործողության գլխավոր առավելություններից մեկը համարել է ինքնաթիռների կողմից որևէ էլեկտրոնային ազդանշանի բացակայությունը։ «Մենք ոչ մի ազդանշան չենք արձակել, անգամ ռադիոհաղորդումներ կամ այլ էլեկտրոնային ազդանշաններ ինքնաթիռներից», — հայտնել է գեներալը։

Նա պատմել է մարտի 2-ին Կատարում գտնվող ամերիկյան Էլ-Ուդեյդ ավիաբազայի դեմ իրականացված գործողության մասին, որտեղ սովորաբար տեղակայվում է մոտ 10 հազար ամերիկացի զինծառայող։ Նույն օրը Իրանի ռազմաօդային ուժերի F-5 կործանիչները հարվածել են Քուվեյթում գտնվող Էլ-Ադիրի բազային, որն օգտագործվում է ամերիկյան զինվորականների կողմից։

Ջաֆարիի խոսքով՝ Իրանի դեմ ամերիկա-իսրայելական ագրեսիայի առաջին օրերին հակառակորդը, հավանաբար, չէր սպասում, որ Իրանի ռազմաօդային ուժերը կհամարձակվեն նման գործողության։

Գեներալը նաև հայտնել է, որ Քուվեյթում ամերիկյան բազայի գրոհից հետո ԱՄՆ հակաօդային պաշտպանության համակարգը բերվել է բարձր պատրաստվածության վիճակի։ Նրա պնդմամբ՝ դաշնակիցների հարվածի հետևանքով խոցվել են երեք ամերիկյան F-15E Strike Eagle կործանիչներ։

Ջաֆարին հայտնել է, որ Սու-24 կործանիչ-ռմբակոծիչներով չորս օդաչու Շիրազում գտնվող շահիդ Դովրանի անվան ավիաբազայից օդ են բարձրացել՝ Էլ-Ուդեյդը գրոհելու համար։ Նրանցից մեկի՝ բրիգադի գեներալ Մաջիդ Քազեմիի մարմինը, վերջերս տեղափոխվել է Իրան։ Եվս երեք օդաչուների ճակատագիրը մնում է անհայտ։

Մեկ տարի առաջ այս օրը՝ 2025 թվականի օգոստոսի 8–ին նախագահ Դոնալդ Թրամփի նախաձեռնությամբ եւ մասնակցությամբ Վաշինգտոնում՝ Սպիտակ տանը, հրավիրված եռակողմ հանդիպման արդյունքում Հայաստանի եւ Ադրբեջանի միջեւ խաղաղություն հաստատվեց։ Այս մասին գրել է ՀՀ վարչապետ Նիկոլ Փաշինյանը։

«Հիմա արդեն օգոստոսի 8-ի հանդիպումն անվանում ենք Խաղաղության գագաթնաժողով, իսկ այնտեղ իմ եւ Ադրբեջանի նախագահի ընդունած համատեղ հռչակագիրը, որ որպես վկա ստորագրեց նաեւ ԱՄՆ նախագահը, Խաղաղության հռչակագիր։ Այս անվանումները լիարժեք արտահայտում են այն արդյունքը, որ բերեց 2025 թվականի օգոստոսի 8-ը։ Հայաստանի եւ Ադրբեջանի միջեւ հաստատված խաղաղությունը տեսանելի եւ զգալի է բոլորին։

2026 թվականի հունիսի 7-ի խորհրդարանական ընտրություններում Հայաստանի քաղաքացիները ոչ միայն վստահության քվե տվեցին խաղաղությանը, այլեւ տեր կանգնեցին խաղաղությանը։ Սա, իհարկե, չի նշանակում, թե խաղաղության օրակարգի իրացման ճանապարհին վերջնական հանգրվանի ենք հասել։

2025 թվականի օգոստոսի 8-ին Վաշինգտոնում երեք ղեկավարների ներկայությամբ Հայաստանի եւ Ադրբեջանի ԱԳ նախարարների կողմից նախաստորագրված «Հայաստանի եւ Ադրբեջանի միջեւ խաղաղություն եւ միջպետական հարաբերություններ հաստատելու մասին համաձայնագիրը» սպասում է իր ստորագրմանն ու վավերացմանը, Հայաստանի եւ Ադրբեջանի միջեւ սահմանազատումը դեռ պետք է տեղի ունենա, մեզ բոլորիս շատ հուզում եւ անհանգստացնում է մեր հայրենակիցների՝ Ադրբեջանում անազատության մեջ լինելը։

Բայց ակնհայտ է, որ 2025 թվականի օգոստոսի 8-ը սահմանագիծ է, եւ Հայաստանի Հանրապետության պատմությունը կարող ենք բաժանել դրանից առաջի եւ դրանից հետոյի։ 2025 թվականի օգոստոսի 8-ից առաջ մեր պետությունը փակուղու մեջ էր, իսկ 2025 թվականի օգոստոսի 8-ից հետո մեր առաջ բացվել են անծայրածիր հեռանկարներ, որոնցից օգտվել-չօգտվելը կախված է մեր հավաքական կամքից, մեր իմացությունից ու աշխարհն ու մեր պատմությունը սովորելու մեր ընդունակությունից։

Հենց սրանում է Վաշինգտոնի խաղաղության գագաթնաժողովի մեծագույն քաղաքական եւ սոցիալ-հոգեբանական արդյունքը․ մեր պատմության ղեկը կրկին հայտնվել է մեր ձեռքում։ Սա չի նշանակում, թե ճանապարհը կատարյալ է եւ առանց վտանգների, սա նշանակում է, որ մեր որոշումներն են մեր հետագա ճակատագիրը կանխորոշող առաջնային գործոնը, ու սա պատմական շրջադարձ է։

Նախորդող շրջանը եւ Ազգային ժողովի ընտրությունների արդյունքները գալիս են համոզելու՝ մենք կարող ենք, մենք ի վիճակի ենք՝ որպես պետություն եւ ժողովուրդ, տե՛ր կանգնել մեր ճակատագրին, եւ սրա համար ուզում եմ շնորհակալություն հայտնել բոլորիդ ու յուրաքանչյուրիդ, Հայաստանի Հանրապետության սիրելի՛ քաղաքացիներ։

Վաշինգտոնի Խաղաղության գագաթնաժողովի կարեւորագույն արդյունքներից է «Թրամփի ուղի հանուն միջազգային խաղաղության եւ բարեկեցության» (TRIPP) նախագիծը, որը ոչ միայն Հայաստանի ապաշրջափակմանը վերջ է դնելու շատ մոտ ապագայում, ոչ միայն դառնալու է Հայաստանի ու տարածաշրջանի տնտեսության առանցքը, այլեւ օգնելու է, որ Հայաստանն ու Ադրբեջանն իրար սկսեն ընկալել ոչ թե որպես խոչընդոտ, այլ որպես ճանապարհ, որպես դրացի։ Առաջիկայում մենք կսկսենք TRIPP նախագծի գործնական իրականացումն ու սա դառնալու է տարածաշրջանային ու միջազգային մեծ իրադարձություն։

Սիրելի՛ ժողովուրդ, Հայաստանի Հանրապետության սիրելի՛ քաղաքացիներ,

Հայաստանի եւ Ադրբեջանի հակամարտության էջը փակված է, խաղաղությունը հաստատված է, եւ այն ահա ձեր աչքի առջեւ է, ձեր կյանքն է ու առօրյան։ Որեւէ խաղաղություն հաստատելը հեշտ չէ, հեշտ չի եղել նաեւ մեր խաղաղության հաստատումը։ Բայց ցանկացած խաղաղությունը փլուզելն ու ի չիք դարձնելը չափազանց հեշտ է ,եւ դա կարելի է անել շատ արագ, ու հարց է` այդ պարագայում կհաջողվի արդյոք 35 տարի անց նորից հաստատել խաղաղություն։

Այսօր շատերը՝ ոմանք նպատակադրված, ոմանք էլ ակամա, գործում են խաղաղությունը փլուզելու տրամաբանությամբ, եւ այս գործունեությունը երբեմն քողարկվում է բարեհունչ կամ «հայրենասիրական» ծխածածկույթի ներքո։ Ուզում եմ ասել առանց սեթեւեթանքի՝ խաղաղությունն անշրջելի դարձնելու համար անհրաժեշտություն է «Լեռնային Ղարաբաղի հայերի վերադարձի» եւ «Ադրբեջանից հայ փախստականների վերադարձի» իրավունքի մասին, իսկ Ադրբեջանում «Արեւմտյան Ադրբեջանի եւ արեւմտաադրբեջանցիների վերադարձի» իրավունքի մասին խոսույթները չշարունակելը։

Սա հարց է, որը թե՛ Հայաստանում, թե՛ Ադրբեջանում հասցեագրելու անհրաժեշտություն կա՝ հանուն մեր սերունդների խաղաղ համակեցության իրավունքի։ Սա է այն իրավունքը, որ մենք այսօր պետք է առարկայացնենք եւ հետապնդենք, եւ պետք է կարողանանք հաղթահարել սրան հակասող որեւէ խոսույթ։

Ես նախագահ Թրամփին շնորհակալություն եմ հայտնում այս խաղաղության հաստատման գործում իր ներդրած անուրանալի ջանքի համար։

Հայաստանի ժողովրդին շնորհավորում եմ օգոստոսի 8-ի առիթով։

Ադրբեջանի ժողովրդին շնորհավորում եմ օգոստոսի 8-ի առիթով։

Վերջապես ունենք մի օր, որ խաղաղեցնում եւ ոչ թե բորբոքում է մեզ։

Եւ թող խաղաղությամբ ննջեն հակամարտության բոլոր զոհերը։ Այլեւս երբեք։

Կեցցե՛ խաղաղությունը։

Իսրայելն ու Լիբանանը համաձայնեցրել են այն երկրների ցանկը, որոնք կարող են զինծառայողներ ուղարկել՝ վերահսկելու լիբանանյան «Հեզբոլլահ» շարժման զինաթափումը ԱՄՆ-ի միջնորդությամբ կնքված համաձայնագրի շրջանակում, հաղորդում է Reuters գործակալությունը։

Այժմ վերջնական ընտրությունը պետք է կատարի Վաշինգտոնը, հայտնել է լիբանանցի պաշտոնյան։

Reuters-ի զրուցակիցը չի բացահայտել, թե որ երկրներն են ընդգրկվել ցանկում և որքան են դրանք։ Ավելի վաղ լիբանանցի պաշտոնյան և երկու օտարերկրյա դիվանագետներ գործակալությանը հայտնել էին, որ Իսրայելն ու ԱՄՆ-ը հնարավոր մասնակիցների շարքից բացառել են Ֆրանսիային։

Ցանկը կազմվել է Լիբանանի և Իսրայելի ներկայացուցիչների միջև Հռոմում ԱՄՆ դեսպանատանը տեղի ունեցած բանակցությունների ընթացքում։ Կողմերը քննարկել են հունիսի 26-ի համաձայնագրի իրականացումը, որը Իսրայելի զորքերի փուլային դուրսբերումը Լիբանանի հարավից կապում է «Հեզբոլլահի» զինաթափման հետ։ Վերջին պայմանի կատարումը պետք է վերահսկի երրորդ մասնակիցը։

«Հեզբոլլահը» համաձայնագրի կողմ չէ և հրաժարվում է հրաժարվել իր զինանոցից։

Լիբանանցի պաշտոնյայի խոսքով՝ ԱՄՆ-ն այժմ կարող է համաձայնեցված ցանկից ընտրել մեկ կամ մի քանի երկիր։ Միևնույն ժամանակ կողմերը դեռ պետք է որոշեն օտարերկրյա ուժերի թվաքանակը, նրանց աշխատանքի կարգը և լիբանանյան բանակի հետ փոխգործակցության ձևաչափը։

Բեյրութը նախկինում մերժել էր զինաթափման անկախ վերահսկողների կարգավիճակով մասնավոր պահնորդական ընկերություններ ներգրավելու առաջարկը։ Պաշտոնյայի խոսքով՝ այժմ խոսքը բացառապես պետական կառույցների մասին է։

Քննարկվում է նաև օտարերկրյա զինծառայողների տեղակայման հարցը։ Տարբերակներից մեկը նախատեսում է նրանց ներառել Լիբանանում ՄԱԿ-ի ժամանակավոր ուժերի (UNIFIL) կազմում, որոնց մանդատը լրանում է տարվա վերջում։ Դրա համար կպահանջվի ՄԱԿ-ի Անվտանգության խորհրդի նոր բանաձև։ Լիբանանցի պաշտոնյայի խոսքով՝ ԱՄՆ-ն և Իսրայելն առաջին անգամ պատրաստ են դիտարկել այդպիսի տարբերակ, ինչը նա առաջընթաց է անվանել։

Միևնույն ժամանակ կողմերին չի հաջողվել համաձայնության գալ հաջորդ շրջանի վերաբերյալ, որից պետք է դուրս գան իսրայելական զորքերը։ Լիբանանն առաջարկել է դրանք դուրս բերել Բինթ-Ջբեյլից և Խիյամից՝ երկրի հարավում գտնվող երկու խոշոր բնակավայրերից, որոնք լրջորեն տուժել են իսրայելական ավիահարվածներից և ցամաքային գործողություններից։

Բանակցությունների հաջորդ փուլը նախատեսված է սեպտեմբերի սկզբին։

Ամերիկայի Միացյալ Նահանգների Յուտա նահանգում խոշոր անտառային հրդեհի մարմանը մասնակցող ուղղաթիռը կործանվել է։ Օդանավում եղել են երկու մարդ, նրանց վիճակը դեռևս անհայտ է, հաղորդում է CBS News-ը՝ հղում անելով ԱՄՆ դաշնային իշխանություններին։

Կործանումը տեղի է ունեցել ուրբաթ օրը Ռիչֆիլդ քաղաքի շրջանում՝ Սոլթ Լեյք Սիթիից մոտ 260 կմ հարավ։ ԱՄՆ Տրանսպորտի անվտանգության ազգային խորհրդի նախնական տվյալներով՝ ուղղաթիռը հրդեհաշիջման աշխատանքների ընթացքում կործանվել է հեռավոր վայրում՝ դեռևս անհայտ հանգամանքներում։

Դեպքի վայր են ժամանել արտակարգ ծառայությունները։ Քննությամբ կզբաղվեն ԱՄՆ Դաշնային քաղաքացիական ավիացիայի վարչությունը և Տրանսպորտի անվտանգության ազգային խորհուրդը։ Քննիչները պետք է Ռիչֆիլդ հասնեն շաբաթ երեկոյան, սակայն կործանման վայր մուտքը կարող է դժվարացած լինել մոտակայքում շարունակվող հրդեհի պատճառով։

Ուղղաթիռը Ֆիշլեյք ազգային անտառի տարածքում բռնկված հրդեհի մարմանը ներգրավված յոթ օդանավերից մեկն էր։ Հրդեհը սկսվել էր հուլիսի 27-ին՝ կայծակի հարվածից հետո։

Ուրբաթ օրվա դրությամբ հրդեհի տարածքը հասել էր մոտ 428 քառ. կմ-ի, իսկ կրակը հաջողվել էր տեղայնացնել ընդամենը 19%-ով։ Տարերքի դեմ պայքարին մասնակցում են ավելի քան 600 հրշեջներ։ Հրդեհի պատճառով տարհանվել են հարակից շրջանների բնակիչները, ոչնչացվել է առնվազն վեց շինություն։

Ուրբաթ օրը հրշեջների աշխատանքի պայմանները մնում էին ծայրահեղ բարդ․ օդերևութաբանները նախազգուշացնում էին քամու կտրուկ պոռթկումների, չոր բուսականության, բարձր ջերմաստիճանի, ինչպես նաև չոր ամպրոպների և կայծակի նոր հարվածների հավանականության մասին։ Տարածաշրջանում գործում էին հրդեհային ծայրահեղ վտանգի նախազգուշացումներ։

Ներկայումս Յուտայում մոլեգնում են ութ խոշոր անտառային հրդեհներ՝ ավելի քան 134 հազար հա ընդհանուր մակերեսով։ Երկարատև երաշտը, որոշ շրջաններում ձյան ռեկորդային սակավ քանակը, անոմալ շոգի ժամանակաշրջանները և ուժեղ քամին նպաստում են կրակի տարածմանը Յուտայում և ԱՄՆ-ի մյուս արևմտյան նահանգներում։

Սաուդյան Արաբիայի հետախուզության ղեկավար Խալիդ ալ-Հմեյդանը այցելել է Բաղդադ և Իրաքի վարչապետ Ալի ազ-Զայդիի հետ քննարկել տարածաշրջանային անվտանգության իրավիճակը՝ թագավորության վրա հնարավոր հարձակումների նախապատրաստման մասին հաղորդումների ֆոնին, հայտնում է Al Arabiya.

Հանդիպման արդյունքներով կողմերը պայմանավորվել են շարունակել տեղեկատվության և հետախուզական տվյալների փոխանակումը։ Ալ-Հմեյդանը նաև Իրաքի վարչապետին է փոխանցել Էր-Ռիյադ այցելելու նորացված հրավերը։

Նախօրեին Սաուդյան Արաբիայի բարձրաստիճան աղբյուրը հայտարարել էր, որ Էր-Ռիյադը ունի «մի քանի վստահելի հետախուզական տվյալներ» այն մասին, որ յեմենական հութիները, իրաքյան զինված խմբավորումները և Իրանի Իսլամական հեղափոխության պահապանների կորպուսը համակարգում են գործողությունները Սաուդյան Արաբիայի դեմ հարձակումներ նախապատրաստելու համար։

Էր-Ռիյադը նախկինում բազմիցս մեղադրել էր Իրանի կողմից աջակցվող իրաքյան զինված խմբավորումներին թագավորության տարածքի վրա հարձակումներ իրականացնելու մեջ։ Անցյալ ամիս Սաուդյան Արաբիան ԱՄՆ-ի հետ համատեղ հարվածներ էր հասցրել՝ ի պատասխան խմբավորումների հարձակումների, որոնք իրականացվել էին Իրաքի տարածքից։

Իրաքի վարչապետը հաստատել է, որ Բաղդադը թույլ չի տա երկրի տարածքն օգտագործել այլ պետությունների վրա հարձակումների համար։ Ազ-Զայդիի խոսքով՝ այս հարցում Իրաքի դիրքորոշումը մնում է անփոփոխ։

Կողմերը պայմանավորվել են շարունակել համակարգումն ու հետախուզական տեղեկատվության փոխանակումը՝ հնարավոր հարձակումները կանխելու և երկու երկրների անվտանգությունն ամրապնդելու համար։

ԱՄՆ նախագահ Դոնալդ Թրամփը հայտարարել է կենսական նշանակության օգտակար հանածոների արդյունահանման և մարտկոցների բաղադրիչների արտադրության ոլորտի նախագծերին 3 մլրդ դոլար հատկացնելու մասին, հայտնում է Reuters։

Վաշինգտոնը հույս ունի այս կերպ մեծացնել ներքին արտադրությունը, ամրապնդել ազգային անվտանգությունը և նվազեցնել կախվածությունը չինական մատակարարումներից։

«Մենք Ամերիկային վերադարձնում ենք աշխարհի հանքային գերտերության իր օրինական տեղը», — հայտարարել է Թրամփը ԱՄՆ Պետդեպարտամենտում հանքարդյունաբերական ընկերությունների ղեկավարների, ներդրողների և կրթական հաստատությունների ներկայացուցիչների հետ հանդիպման ժամանակ։

Հայտարարված փաթեթի շրջանակում ԱՄՆ պաշտպանության նախարարությունը 1,4 մլրդ դոլարի պայմանական վարկ կտրամադրի լիթիում-իոնային մարտկոցների բաղադրիչներ արտադրող Sila Nanotechnologies ընկերությանը։

Եվս 400 մլն դոլար նախատեսված է սկանդիումի հանքավայր մշակող ավստրալական Sunrise Energy Metals-ի համար, իսկ 150 մլն դոլար՝ մագնիսներ արտադրող Niron Magnetics-ի համար։

ԱՄՆ արտահանման-ներմուծման բանկը նաև 58 մլն դոլար կտրամադրի Westwater Resources, Global Advanced Metals և 5E Advanced Materials ընկերություններին՝ կենսական նշանակության օգտակար հանածոների հետ կապված նախագծերի համար։

Թրամփը հայտարարել է, որ նման ռեսուրսներն անհրաժեշտ են ժամանակակից զենքերի, ավտոմեքենաների և այլ ռազմավարական արտադրանքի արտադրության համար։

Նրա խոսքով՝ ԱՄՆ-ը պետք է այս նյութերը արդյունահանի, վերամշակի և արտադրի երկրի ներսում։

Կենսական նշանակության օգտակար հանածոները հատուկ կարևորություն են ձեռք բերել ամերիկյան պաշտպանական արդյունաբերության համար Իրանի հետ երկարատև պատերազմի ֆոնին։

Reuters-ի տվյալներով՝ հակամարտության հինգ ամիսների ընթացքում ամերիկյան զինված ուժերը ծախսել են բարձր ճշգրտության հրթիռների և հակաօդային պաշտպանության կալանիչների զգալի պաշարներ։ Պենտագոնի և Կոնգրեսի ներկայացուցիչները նախազգուշացնում են, որ որոշ պաշարների վերականգնումը կարող է տարիներ տևել՝ սահմանափակ արտադրական հզորությունների պատճառով։

Հազվագյուտ հողային տարրերը, վոլֆրամը, գերմանիումը և սկանդիումը օգտագործվում են բարձր ճշգրտության հրթիռների, կործանիչների, զրահապատ տեխնիկայի, ինֆրակարմիր տվիչների և այլ ժամանակակից սպառազինության արտադրության մեջ։

Միաժամանակ Թրամփի վարչակազմը փորձում է կրճատել ԱՄՆ-ի կախվածությունը Չինաստանից, որը գերիշխող դիրք ունի բազմաթիվ ռազմավարական հանքանյութերի արդյունահանման և վերամշակման ոլորտում։ Սպիտակ տուն վերադառնալուց հետո Թրամփը սկսել է նման ռեսուրսների 12 մլրդ դոլարի ռազմավարական պաշարի ձևավորումը և ընդլայնել պետական աջակցությունը այն ընկերություններին, որոնք մշակում են ամերիկյան հանքավայրեր և վերամշակող ձեռնարկություններ։

Եվս 100 մլն դոլար ԱՄՆ էներգետիկայի նախարարությունը կուղղի երկրի 14 հավատարմագրված հանքային դպրոցներում կրթական ծրագրերի զարգացմանը։ Գերատեսչությունը հաշվարկում է երկու տարվա ընթացքում կրկնապատկել հանքարդյունաբերության ոլորտի հետ կապված շրջանավարտների թիվը։ Պենտագոնը լրացուցիչ 80 մլն դոլար կհատկացնի ամերիկյան երեք հանքային դպրոցների նախագծերին։

Վաշինգտոնը մասնագետների պատրաստման համակարգի զարգացումը համարում է Չինաստանի հետ մրցակցության պայմաններից մեկը, որն ունի մասնագիտացված համալսարանների լայն ցանց և զբաղեցնում է առաջատար դիրքեր ռազմավարական հանքանյութերի համաշխարհային շուկայում։

«Ժողովուրդ» օրաթերթը գրում է. ««Ժողովուրդ» օրաթերթը նկատել է, որ Ազգային ժողովի նորընտիր նախագահ Ռուբեն Ռուբինյանը խորհրդարանում արդեն մի քանի հստակ փոփոխություն է իրականացրել։ Առաջինը, ըստ «Ժողովուրդ» օրաթերթի դիտարկումների, նա ամեն ինչ անում է, որպեսզի խորհրդարանում ընդդիմադիրների հետ իրավիճակը չլարվի։ Ցանկացած սուր խոսքից հետո Ռուբինյանը երկկողմանի նկատողություն է անում, պարտադիր հիշեցնում է պատգամավորներին պահպանել բարեկրթության կանոնները։ Արդյունքում՝ նախագահության առաջին գրեթե վեց օրերի նիստերն անցել են առանց ծեծկռտուքի և լուրջ միջադեպերի։

Դրան զուգահեռ փոխվել է նաև խորհրդարանում լրագրողների մուտքի և ելքի կազմակերպումը։ Պետական պահպանության ծառայության աշխատակիցներն այլևս չեն գործում այնպիսի լարված ռեժիմով, ինչպես նախկին նախագահ Ալեն Սիմոնյանի պաշտոնավարման շրջանում։ Գրեթե բոլոր մուտքերի մոտ նախկինում ՊՊԾ աշխատակիցները մշտապես սպասում էին հնարավոր հրահանգների։

Ուշագրավ է նաև Ռուբինյանի վարքագիծը խորհրդարանի միջանցքներում։ Նա հիմնականում շրջում է ընդամենը մեկ անվտանգության աշխատակցի ուղեկցությամբ։ Մինչդեռ նախկին նախագահ Ալեն Սիմոնյանը, որպես կանոն, խորհրդարանում տեղաշարժվում էր չորս-հինգ հոգու ուղեկցությամբ, և նրա յուրաքանչյուր մուտք կամ ելք ուղեկցվում էր նկատելի իրարանցմամբ։

Ռուբինյանի ներկայությունը խորհրդարանում այժմ աչքի է ընկնում ավելի համեստ ու չցուցադրական մոտեցմամբ․ նա թիմակիցների հետ շփվում է առանց ավելորդ լարվածության և անվտանգության ընդգծված ցուցադրության։

Թե այս գործելաոճը որքան ժամանակ կպահպանվի, ժամանակը ցույց կտա»։

Առավել մանրամասն թերթի այսօրվա համարում