Օգոստոսի 6-ին ՆԳ նախարար Արփինե Սարգսյանն այցելել է Արմավիրի մարզ՝ ամփոփելու ՆԳՆ ոստիկանության 2026 թվականի առաջին կիսամյակի աշխատանքը։
Ներկա էին Ոստիկանության պետ-ՆԳ նախարարի տեղակալ Կամո Ցուցուլյանը, ՆԳ նախարարության և Ոստիկանության ղեկավար կազմի ներկայացուցիչներ։
Քրեական ոստիկանության Արմավիրի մարզային վարչության պետը ներկայացրել է անցած վեց ամսվա ընթացքում կատարված աշխատանքը։ Հաշվետու ժամանակահատվածում գրանցվել է հանցագործության 370 դեպք՝ 131-ով ավելի նախորդ տարվա նույն ժամանակահատվածի համեմատ։ Աճել են մարդու դեմ ուղղված հանցագործությունները, նվազել՝ սեփականության դեմ ուղղվածները։ Արձանագրվել է հաստատված սպանության 3, սպանության փորձի 4 և ավազակության 5 դեպք, որոնք բացահայտվել են։ Ապօրինի պահվող զենք-զինամթերքի հայտնաբերման և առգրավման ուղղությամբ իրականացվել է շուրջ 40 խուզարկություն։
Աճել են հասարակական անվտանգության, հասարակական կարգի և բնակչության առողջության դեմ ուղղված հանցագործությունները, ինչը հիմնականում պայմանավորված է Պարեկային ծառայողների կողմից առանց վարորդական իրավունքի տրանսպորտային միջոց վարելու դեպքերի հայտնաբերմամբ։
Համայնքային ոստիկանության Արմավիրի բաժնի կողմից գրանցվել է հանցագործության 787 դեպք, բացահայտվել՝ 752-ը կամ 95,6 տոկոսը։ Տնտեսական գործունեության դեմ ուղղված հանցագործությունները նվազել են 22,2, իսկ պետական իշխանության, ծառայության և կառավարման կարգի դեմ ուղղված հանցագործությունները՝ 36 տոկոսով։ Աճել են ընտանեկան բռնության դեպքերը, նվազել՝ անչափահասների կողմից կատարված հանցագործությունները։
Համայնքային ոստիկանության Վաղարշապատի բաժնում գրանցվել է հանցագործության 1134 դեպք, բացահայտվել՝ 1076-ը։ Պետական իշխանության, ծառայության և կառավարման կարգի դեմ ուղղված հանցագործությունները նվազել են, ընտանեկան բռնության դեպքերն՝ աճել։ Աճել են տնտեսական գործունեության, սեփականության և մարդու դեմ ուղղված հանցագործությունները։ Կազմվել են չթույլատրված վայրերում ծխելու, հասարակական կարգի պահպանման կանոնների և այլ վարչական իրավախախտումների վերաբերյալ արձանագրություններ։
Համայնքային ոստիկանության Բաղրամյանի բաժնում անչափահասների կողմից կատարված հանցագործության դեպք չի արձանագրվել։ Գրանցվել է հանցագործության 97 դեպք, բացահայտվել՝ 85-ը։ Սեփականության դեմ ուղղված հանցագործությունները նվազել են 41,7 տոկոսով։ Աճել են մարդու դեմ ուղղված, պետական իշխանության, ծառայության և կառավարման կարգի դեմ ուղղված հանցագործությունները։
Պարեկային ծառայության Արմավիրի մարզի գումարտակի ծառայողները 175 հանցագործության դեպք են բացահայտել՝ նախորդ տարվա նույն ժամանակահատվածի համեմատ 152-ով ավելի։ Տարբեր վարչական իրավախախտումներով կազմվել է 41465 արձանագրություն, այդ թվում՝ չամրակապված վարելու 10143, առանց վարորդական իրավունքի վարելու՝ 3417։
Ոստիկանության գվարդիայի Վաղարշապատի պետական պահպանության բաժնի պետը նշել է, որ օբյեկտների պահպանության ու հասարակական կարգի ապահովմանը զուգահեռ Գվարդիայի ծառայողները նաև բացահայտել են մի շարք հանցագործություններ, այդ թվում՝ կանխել սպանության դեպք։
Կատարած աշխատանքի համար շնորհակալություն հայտնելով Արմավիրի մարզի ոստիկաններին՝ նախարար Սարգսյանը բավարար է գնահատել նրանց աշխատանքը՝ միաժամանակ ընդգծելով առկա խնդիրների ուղղությամբ առավել թիրախային ու հետևողական աշխատանքի անհրաժեշտությունը, և ստորաբաժանումներին տվել կոնկրետ հանձնարարականներ։
Խոսելով հանցագործությունների բացահայտման մասին՝ ՆԳ նախարարը հանձնարարել է էապես ակտիվացնել օպերատիվ-հետախուզական աշխատանքը՝ հատուկ ուշադրություն դարձնելով տվյալների իրացման մեխանիզմներին։
Անդրադառնալով քրեական ենթամշակույթի դեմ պայքարին՝ Արփինե Սարգսյանը շեշտել է, որ պետք է լինել հետևողական, իսկ թշնամական հարաբերություններ ունեցող անձանց նկատմամբ ձեռնարկել կանխարգելիչ միջոցներ՝ հնարավոր բախումներն ու ծանր հետևանքները կանխելու նպատակով։
Միայն 6 ամսում Արմավիրի մարզում ոստիկանները ապօրինի հանքարդյունաբերության 4 դեպք են բացահայտել։ Այս ուղղությամբ նախարար Սարգսյանը հանձնարարել է ակտիվացնել հայտնաբերման ու բացահայտման աշխատանքները՝ սերտորեն համագործակցելով պետական մյուս մարմինների հետ։
Նախարար Սարգսյանը հանձնարարել է նաև առավել ակտիվ աշխատանք իրականացնել բնակարանային գողությունների բացահայտման, հետախուզվող անձանց հայտնաբերման ուղղություններով։
Արփինե Սարգսյանը շեշտել է, որ ընտանեկան և կենցաղային բռնության դեպքերով անհրաժեշտ է ապահովել յուրաքանչյուր ահազանգի պատշաճ արձագանք և իրականացնել հետևողական վերահսկողություն։
ՆԳ նախարարը հատուկ ընդգծել է, որ անչափահասների նկատմամբ և նրանց կողմից կատարված հանցագործությունները պետք է առաջնահերթություն դիտարկեն տարածքային բոլոր ստորաբաժանումները՝ ակտիվորեն համագործակցելով գործընկեր կառույցների հետ։
Թմրամիջոցների ապօրինի շրջանառության դեմ պայքարի շրջանակում հանձնարարվել է առավել գործուն միջոցներ ձեռնարկել հատկապես համացանցի միջոցով ապօրինի թմրաշրջանառության ուղղությամբ։
Նախարարն ընդգծել է, որ պետք է էապես ակտիվացնել ոստիկանության շրջիկ ծառայությունները գյուղերում և բակերում, կազմակերպել շրջայցեր և ուժեղացված ծառայություններ՝ բոլոր ստորաբաժանումների ներգրավմամբ։
Արփինե Սարգսյանը հանձնարարել է վերլուծել ճանապարհատրանսպորտային պատահարների պատճառները և կանխարգելման ուղղությամբ ձեռնարկել գործուն միջոցներ։
