Category: TopNews.am

«Բարսելոնայի» և Իսպանիայի ազգային հավաքականի հարձակվող Լամին Յամալը գովեստի խոսքեր է հնչեցրել «Ինտեր Մայամիի» հարձակվող Լիոնել Մեսսիի հասցեին՝ վերջինիս համարելով իր համար ուղենիշ։

«Լեո Մեսսին բոլոր ժամանակների լավագույն ֆուտբոլիստն է։ Եթե անգամ նա բոլոր ժամանակների լավագույն մարզիկը չէ, ապա հաստատ այդ շարքում է։ Բոլորը հարգում են նրան այն ամենի համար, ինչին նա հասել է, և ես հուսով եմ, որ կկարողանամ գնալ նրա հետքերով»,- Յամալի խոսքերն է մեջբերում Laureus World Sports Awards մրցանակաբաշխության մամուլի ծառայությունը X սոցիալական ցանցում։

Մեսսին «Ինտեր Մայամիի» գույները պաշտպանում է 2023 թվականից։ Ֆուտբոլիստի գործող պայմանագիրն ակումբի հետ նախատեսված է մինչև 2028 թվականը։ Նրա օգնությամբ «Ինտեր Մայամին» նվաճել է իր պատմության առաջին չորս տիտղոսները՝ 2023 թվականին Լիգաների գավաթը, 2024-ին MLS-ի կանոնավոր առաջնությունը, 2025-ին MLS-ի Արևելյան կոնֆերենցիայի հաղթողի տիտղոսը, ինչպես նաև նախորդ մրցաշրջանում՝ MLS-ի գավաթը։

ԱՄՆ նախկին նախագահ Բարաք Օբաման հայտարարել է, որ իր և Միշել Օբամայի արտադրական ընկերությունը՝ Higher Ground Productions-ը, ավարտում է համագործակցությունը Netflix-ի հետ և անցնում է անկախ գործունեության։

Հայտարարությունը հնչել է Ֆիլադելֆիայում անցկացված միջոցառման ժամանակ՝ նվիրված ԱՄՆ-ի 250-ամյակին։ Օբաման նշել է, որ ութ տարվա համագործակցությունից հետո ընկերությունը աշխատելու է տարբեր կինոստուդիաների հետ՝ այլևս չսահմանափակվելով մեկ հարթակով։ Նա հիշեցրել է, որ Netflix-ի հետ պայմանագիրը կնքվել էր 2018-ին, իսկ 2024-ին այն երկարաձգվել էր first-look ձևաչափով։

Այս ընթացքում Higher Ground Productions-ը թողարկել է «Rustin», «American Symphony», «Crip Camp», «American Factory» ֆիլմերը, ինչպես նաև «Bodkin» և «Leave the World Behind» նախագծերը։ Վերջին շրջանում ընկերությունը սկսել է համագործակցել նաև այլ հարթակների հետ, այդ թվում՝ HBO-ի։

Բրիտանացի Դեյվիդ Հենդերսոն-Սթյուարտը Ռուսաստանում վերականգնել է խորհրդային ժամանակների «Ռակետա» ժամացույցների գործարանը և այն վերածել շքեղ ժամացույցների արտադրողի։ Գործարան այցելելիս նա տեսել է, որ մնացած քիչ ժամագործները աշխատում են հին սարքավորումներով և դժվար պայմաններում։ Չնայած ժամացույցներից մեծ բան չէր հասկանում, խորհրդային դիզայնի հանդեպ հետաքրքրությունը նրան ստիպել է ներդրում անել գործարանում, որը նախկինում ուներ շուրջ 7000 աշխատող և արտադրում էր ժամացույցներ թե՛ տիեզերագնացների, թե՛ զանգվածային շուկայի համար։

2010 թվականին նա գործընկերոջ հետ ստանձնել է գործարանի կառավարումը և Ռուսաստանում մշտական բնակություն հաստատել՝ ունենալով նաև երեք երեխա, որոնք Ռուսաստանի քաղաքացի են։ Նրա ղեկավարությամբ «Ռակետան» սկսել է արտադրել բարձրակարգ ժամացույցներ՝ շեշտադրելով «Made in Russia» գաղափարը։ Արևմտյան պատժամիջոցները 2022 թվականից հետո դժվարացրել են շքեղ ապրանքների ներմուծումը Ռուսաստան, ինչի արդյունքում աճել է տեղական արտադրանքի պահանջարկը, իսկ ընկերությունը շարունակել է վաճառքը նաև Եվրոպայում և Մերձավոր Արևելքում։

2022 թվականին «Ռակետան» լրացուցիչ ուշադրություն ստացավ, երբ Ռուսաստանի նախագահ Վլադիմիր Պուտինը հրապարակային հայտնվեց գործարանի արտադրած ժամացույցով, ինչը որոշ դիտորդներ մեկնաբանեցին որպես աջակցություն տեղական արտադրությանը։ Այդ մոդելի նմանակները հետագայում մեծ պահանջարկ ունեցան։ 2025 թվականին ընկերությունը գրանցել է մոտ 1.43 միլիոն դոլար շահույթ՝ ավելի քան 15 տոկոս աճ նախորդ տարվա համեմատ։

Fastex Պրեմիեր լիգայի 22-րդ տուրում «Արարատ-Արմենիան» հյուրընկալվելիս տպավորիչ հաղթանակ տոնեց «Շիրակի» նկատմամբ:

​Այս վստահ հաղթանակի շնորհիվ «Արարատ-Արմենիայի» ակտիվում գրանցվեց 45 միավոր: «Շիրակը» 12 միավորով շարունակում է մնալ վտանգավոր գոտում՝ զբաղեցնելով 9-րդ՝ նախավերջին տեղը:

Apple-ն ապրիլի 20-ին հայտարարել է, որ սեպտեմբերի 1-ից ընկերության գլխավոր տնօրեն կդառնա Ջոն Թերնուսը։ Թիմ Քուքը, որ Apple-ը ղեկավարում է վերջին 15 տարիներին, կզբաղեցնի գործադիր նախագահի պաշտոնը։ «Ինձ համար կյանքում ամենամեծ պատիվն է լինել Apple-ի գլխավոր տնօրենը եւ օգտվել այն վստահությունից, որը ինձ է վերապահվել որպես այսպիսի բացառիկ ընկերության ղեկավար»,- հայտարարել է 65-ամյա Քուքը։

Նրան փոխարինելու եկող Ջոն Թերնուսն այժմ Apple-ի համակարգչային ճարտարագիտության [ինժեներիայի] գծով ավագ փոխնախագահն է։

Գլխավոր տնօրենի փոփոխության մասին հայտարարվել է ֆոնդային շուկան փակվելուց առաջ։ Փակվելուց հետո բորսայում դեռ ընթացող առեւտրի ժամանակ  Apple-ի բաժնետոմսերը նվազել են 0,86%ով` Երեւանի ժամանակով 1։03-ի դրությամբ։

Քուքը Apple-ում աշխատում է 1998 թվականից։ Նա ընկերությունը ղեկավարում է 2011 թվականի օգոստոսից` փոխարինելով Սթիվ Ջոբսին։

Նրա ղեկավարության ընթացքում Apple-ի շուկայական կապիտալիզացիան 350 միլիարդից հասել է մինչեւ 4 տրիլիոն դոլարի։

Մադրիդի «Ռեալը» դարձավ ՈւԵՖԱ-ի Պատանեկան լիգայի 2025/2026 մրցաշրջանի հաղթող։ Եզրափակիչ լարված խաղում մադրիդցիները մրցեցին բելգիական «Բրյուգեի» հետ։ Հանդիպման հիմնական ժամանակն ավարտվեց 1:1 հաշվով, սակայն հետխաղյա 11-մետրանոց հարվածաշարում «արքայական ակումբի» պատանիներն ավելի դիպուկ գտնվեցին՝ հաղթելով 4:2 հաշվով։

Այս հաղթանակի շնորհիվ «Ռեալը» մոտեցավ կատալոնական «Բարսելոնային», որը համարվում է այս մրցաշարի ռեկորդակիրը։

ՈւԵՖԱ-ի Պատանեկան լիգան հիմնադրվել է 2013 թվականին։ Այս պահին տիտղոսների քանակով առաջատարը «Բարսելոնան» է, որն ունի 3 գավաթ։ «Ռեալն» ու լոնդոնյան «Չելսին» արդեն ունեն 2-ական տիտղոս, իսկ մեկական անգամ պատվո հարթակի ամենավերին աստիճանին կանգնել են «Բենֆիկան», «Ռեդ Բուլ Զալցբուրգը», «Պորտուն», «ԱԶ Ալկմարը» և «Օլիմպիակոսը»։

Հարկ է նշել, որ մի շարք հայտնի ակումբներ, ինչպիսիք են «Շախտյորը», ՊՍԺ-ն, «Հայդուկը», «Միլանն» ու «Տրաբզոնսպորը», նախկինում հասել են մինչև եզրափակիչ, սակայն այդպես էլ չեն տիրացել գավաթին։ Այս մրցաշրջանում այդ ցանկը համալրեց նաև բելգիական «Բրյուգեն»։

Ապրիլի 23-ին՝ ժամը 16։00-ին, Հայաստանի պատմության թանգարանում տեղի կունենա «Դիլդիլյաններ․ լուսանկարչական ժառանգություն Սփյուռքից» խորագրով ցուցահանդեսի բացման արարողությունը՝ նվիրված Հայոց ցեղասպանության 111-րդ տարելիցին։

Դեռևս 19-րդ դարից Դիլդիլյանների մի քանի սերունդների ներկայացուցիչներ Օսմանյան կայսրության տարբեր քաղաքներում՝ Սեբաստիայում, Մարզվանում, Սամսունում և այլուր, զբաղվել են լուսանկարչությամբ։ Բռնագաղթից հետո նրանք հաստատվել են Հունաստանում և ԱՄՆ-ում, որտեղ ևս շարունակել են իրենց գործունեությունը։

Ցուցահանդեսում կներկայացվեն ապակե նեգատիվներ, գծանկարներ, փաստաթղթեր, նամակներ, ինչպես նաև Ցոլակ և Արամ Դիլդիլյանների կողմից շուրջ 34 տարիների ընթացքում արված տասնյակ լուսանկարներ և ընտանեկան ժառանգության այլ ուշագրավ իրեր։ Այս նյութերը հատուկ տեղափոխվել են Հայաստանի պատմության թանգարան և կհամադրվեն թանգարանի ցուցանմուշների հետ։

Ցուցահանդեսը կազմակերպվել է Հայաստանի պատմության թանգարանի և Դիլդիլյան ընտանիքի ժառանգորդ, Հարավային Կոնեկտիկուտ համալսարանի փիլիսոփայության բաժնի պրոֆեսոր Արմեն Մարսուբյանի համագործակցությամբ։

Ցուցահանդեսի մուտքն ազատ է։

ՀՀ ԱԳՆ-ն X-ի իր էջում շնորհավորել է Իսրայելի կառավարությանը և ժողովրդին Անկախության օրվա կապակցությամբ։ 

«Հայաստանը պատրաստ է ընդլայնել ՀՀ-Իսրայել կապերը և ուսումնասիրել համագործակցության նոր հնարավորություններ»։