Month: April 2026

Ադրբեջանագետ Տաթևիկ Հայրապետյանի ֆեյսբուքյան գրառումը. «Շատ ուրախ եմ, որ Ծաղկազարդի գործով 18-ամյա Դավիթ Մինասյանի կալանքը վերացվել է։ Նրա նկատմամբ կիրառվել է բացակայելու արգելք խափանման միջոցը, հայտնել են Դատախազությունից։
     Սա պետք է տեղի ունենար ի սկզբանե, քանի որ երիտասարդը այնպիսի բան չէր արել, որ արժանանար կալանքի պատժի։ Թե՛ Դավիթը, թե՛ նրա ընտանիքն անցան շատ բարդ հոգեբանական ու մարդկային փորձության միջով։
     Պատիժը հանվեց հենց հանրային ճնշման միջոցով․ այն մարդկանց, որոնք չզլացան անդրադառնալ հարցին, հանրային աղմուկ բարձրացնել դրա շուրջ, չզլացան աջակցել ընտանիքին, լինել Դատախազության մոտ, բողոքել, խոսել, ուղղակի ՉԼՌԵԼ։ Մեր օրերում դա ամենաբարդ ու ամենակարևոր բանն է՝ չհարմարվելը, չլռելը, անարդարության հանդեպ անտարբեր չմնալը։ Ընդ որում՝ արդեն որերորդ դեպքն է, որ հանրային ճնշումը ստիպում է իշխանությանը հետ քայլ անել։ Հանրությունը՝ հավաքական առումով, շատ ավելի զորեղ է, քան կարծում է․ ուղղակի պետք է դա կիրառելու կամք ու խելք ունենա։
     Առողջություն եմ մաղթում Դավիթին»։

ՀՀ հակակոռուպցիոն կոմիտեն տեսանյութ է հրապարակել՝ կից հայտնելով․ «ՀՀ հակակոռուպցիոն կոմիտեի օպերատիվ–հետախուզական ստորաբաժանումների կողմից իրականացված միջոցառումների արդյունքում փաստական տվյալներ են ստացվել այն մասին, որ ՀՀ Ազգային ժողովի հերթական ընտրությունները նշանակելու մասին ՀՀ նախագահի հրամանագրի՝ 2026 թվականի փետրվարի 7-ին ուժի մեջ մտնելուց հետո՝ բարեգործություն իրականացնելու օրենսդրական արգելքի պայմաններում, համապետական ընտրություններին մասնակցող ՀՀ տարբեր բնակիչների, բարեգործության անվան տակ, «Ուժեղ Հայաստան» կուսակցության անդամի կողմից այլ անձի օժանդակությամբ 2026 թվականի մարտ ամսվա ընթացքում մի դեպքում անհատույց տրամադրվել է դրամական միջոց, մեկ այլ դեպքում՝ արտոնյալ պայմանով խոստացվել է ծառայության մատուցում։
     Դեպքի առթիվ ՀՀ քրեական օրենսգրքի համապատասխան հոդվածով նախաձեռնվել է քրեական վարույթ, հանրային քրեական հետապնդում է հարուցվել երկու անձի նկատմամբ, ովքեր ձերբակալվել են։
     ՀՀ հակակոռուպցիոն կոմիտեն կրկին հորդորում է զերծ մնալ բարեգործության վերաբերյալ օրենսդրական արգելքը խախտելու հանցավոր վարքագծից, իսկ քաղաքացիներին կոչ է արվում խուսափել ընտրական հանցագործությունների կամ դրանց հետ առնչվող կասկածելի գործողությունների մեջ ներգրավվելուց»։