julbaz.mediamonitoring.am

Ըստ կանխատեսումների՝ մինչև 2027 թվականի վերջը Հրազդանի տվյալների կենտրոնը կհասնի 300 մեգավատի հզորության, իսկ կենտրոնում տեղադրված Nvidia-ի առաջադեմ արհեստական բանականության չիպերի քանակը կգերազանցի 70․000-ը։

Bloomberg-ը, հղում անելով Firebird ստարտափին, հաղորդում է, որ Հայաստանի կառավարության և Nvidia-ի միջև կնքված գործարքը կարող է երկիրը վերածել արհեստական բանականության (ԱԲ) կենտրոնի։

Հրազդանում անցյալ ամիս բացված տվյալների կենտրոնը, ըստ կանխատեսումների, կարող է դառնալ տարածաշրջանի և Եվրոպայի ամենամեծ հաշվողական կլաստերներից մեկը։

Գործակալությունը նշում է, որ համալիրի հաշվողական հզորության մեկ հինգերորդը նախատեսված է ներքին օգտագործման համար՝ հետազոտությունների, կառավարական և Firebird-ի էկոհամակարգերի համար։ Մնացածը բաշխվում է արտասահմանյան ընկերությունների միջև, այդ թվում՝ ամերիկյան ընկերությունների, ինչպիսին է Perplexity AI-ը։

Հոդվածում նշվում է, որ Nvidia չիպերի դերը այս համաձայնագրում ԱՄՆ նախագահ Դոնալդ Թրամփի «արհեստական բանականության դիվանագիտության» մոտեցման առավել «անսովոր» օրինակներից մեկն է։

Ինչպես նշում է Bloomberg-ը, տվյալների կենտրոնը դեր է խաղացել Հայաստանի և Ադրբեջանի միջև խաղաղության համաձայնագրի ապահովման գործում։

Հայաստանը Nvidia-ի հետ իր համագործակցությունը սկսել է 2019 թվականին, երբ Նիկոլ Փաշինյանը այցելել է չիպեր արտադրողի գրասենյակ Սանտա Կլարայում։ 2023 թվականին Nvidia-ի գործադիր տնօրեն Ջենսեն Հուանգը այցելել է Հայաստան՝ հիմք դնելով Firebird-ի ստեղծմանը։

Թուրքիան և Միացյալ Նահանգներն աջակցում են Հայաստանի և Ադրբեջանի միջև խաղաղության գործընթացին և ամեն ջանք գործադրում են Կովկասում ու Սև ծովում լարվածության սրման ռիսկը նվազեցնելու համար։

Թուրքիայի արտաքին գործերի նախարար Հաքան Ֆիդանն այս մասին հայտարարել է Նյու Յորքում կայացած «Թուրք-ամերիկյան հարաբերությունները 100 տարվա շեմին» խորհրդաժողովում։

Իր ելույթում Ֆիդանն ընդգծել է Անկարայի և Վաշինգտոնի միջև համագործակցության կարևորությունը համաշխարհային խաղաղության և կայունության պահպանման գործում։ Նա հավելել է, որ երկու երկրների գործընկերությունը նոր հնարավորություններ է ստեղծում տարածաշրջանային զարգացման և խաղաղության պահպանման համար։

Ֆիդանը նաև նշել է, որ սևծովյան տարածաշրջանը չպետք է դառնա խնդիրների աղբյուր, այլ՝ միջազգային համագործակցության հարթակ։

Ռուս-ուկրաինական խաղաղության գործընթացի համատեքստում՝ Ֆիդանը նշել է, որ Անկարան շարունակում է ակտիվորեն կապեր պահպանել ինչպես Կիևի, այնպես էլ Մոսկվայի հետ։

«Մենք աջակցում ենք երկխոսությանը և դիվանագիտությանը՝ Ուկրաինայում կայուն խաղաղության հասնելու համար», – նշել է թուրք նախարարը։

Ֆիդանն ընդգծել է, որ, ներկայիս աշխարհաքաղաքական փոփոխությունները հաշվի առնելով, անհրաժեշտ է կառուցել արդյունավետ գործընկերություն համաշխարհային տերությունների և առաջատար տարածաշրջանային դերակատարների միջև։

Թուրքիայի արտաքին գործերի նախարարը նշել է, որ նախագահ Ռեջեփ Թայիփ Էրդողանը հույս ունի, որ իր ամերիկացի գործընկեր Դոնալդ Թրամփի հետ իր հարաբերությունները կնպաստեն տարածաշրջանային համագործակցության հետագա զարգացմանը։

Հիշեցնենք, որ Թուրքիայի նախագահ Ռեջեփ Թայիփ Էրդողանը ելույթ կունենա Նյու Յորքում սեպտեմբերի 22-ին կայանալիք ՄԱԿ-ի 81-րդ Գլխավոր ասամբլեայի նստաշրջանում։