julbaz.mediamonitoring.am

Մի երկիր, որը Սաֆարով է փառաբանում, ինչպե՞ս կարող է մեզ համար լավ բան ցանկանալ․ Հայաստանի Հանրապետության Սահմանադրության հետ ի՞նչ գործ ունի Ադրբեջանը»։ Այս մասին գրել է ՀՀ ԱԺ փոխխոսնակ, «Ուժեղ Հայաստան» խմբակցության պատգամավոր Արամ Վարդևանյանը։

«Անկախության հռչակագրում տեղ գտած բոլոր այն դրույթները, օրինակ՝ հայ ժողովրդի հարատևությունը, բարեկեցությունը, միջազգային իրավունքին հավատարմությունը․ ահա հենց դրանք է ուզում հանել Ալիևը։

Դուք աշխարհում չեք տեսնի մեկ այլ օրինակ, երբ մի երկիր մեկ այլ երկրի ասի՝ քո Սահմանադրությունը ուզում եմ այսպես փոխվի։

Հայաստանի Հանրապետության քաղաքացիները, Քաղաքացիական պայմանագրի ներկայացրած բոլոր հնարավոր վախերի պայմաններում, մերժել են իշխող ուժի ցանկությունը՝ ստանալ սահմանադրական մեծամասնություն։ Ուղղակի մերժել են։

Ամեն ինչ էլ կլինի․ ուժեղ Հայաստանը կլինի, Հայաստանում փոփոխություններ կլինեն, Ալիևի պարտադրած սահմանադրական փոփոխությունները կտապալվեն»։

Իրանի նախագահ Մասուդ Փեզեշքիանը երկրի բոլոր մզկիթներին կոչ է արել ավելի ակտիվորեն մասնակցել սոցիալական խնդիրների լուծմանը և նպաստել էներգառեսուրսների խնայողությանը, հայտնում է Tasnim-ը։

Ըստ նրա, գազի և էլեկտրաէներգիայի խելամիտ սպառումն անհրաժեշտ է արդյունաբերության անխափան աշխատանքն ապահովելու համար։

Ինչպես հայտնում է գործակալությունը, Փեզեշքիանն այս կոչով հանդես է եկել շաբաթ երեկոյան՝ Թեհրանի հարավում գտնվող մզկիթ այցելության ժամանակ։

Նախագահը նշել է, որ Իրանում շուրջ 80 հազար մզկիթ կա, որոնք կարող են դառնալ տեղական խնդիրների լուծման կարևոր կենտրոններ։ Դրա համար, նրա կարծիքով, անհրաժեշտ է բնակիչներին ավելի ակտիվորեն ներգրավել հանրային նախաձեռնություններում և զարգացնել համագործակցությունը «Բասիջի» ուժերի՝ Իսլամական հեղափոխության պահապանների կորպուսի հետ կապված կամավորական կազմավորումների հետ։

Փեզեշքիանն ընդգծել է, որ մզկիթների աշխատանքի համակարգումը մշակութային, կրոնական և հասարակական կազմակերպությունների հետ թույլ կտա ավելի արդյունավետ արձագանքել այն բազմաթիվ մարտահրավերներին, որոնց բախվում են տեղական համայնքները։

Պետության ղեկավարն առանձին կոչ է արել մզկիթներին վառելիքի և էներգիայի խնայողաբար օգտագործման օրինակ ծառայել՝ հատկապես տարվա ցուրտ եղանակին։ Նա նշել է, որ գազի արդյունահանման խափանումներն ավելի են մեծացնում էներգառեսուրսների խնայողության անհրաժեշտությունը։

Փեզեշքիանի համոզմամբ, էներգիայի սպառման կրճատմանը բնակչության մասնակցությունը սկզբունքային նշանակություն ունի արդյունաբերական ձեռնարկություններին գազի և էլեկտրաէներգիայի մատակարարումների սահմանափակումները կանխելու համար։ Նման խափանումները կարող են վնաս հասցնել արտադրությանը և բացասաբար անդրադառնալ երկրի տնտեսության վրա։

Վիրաբույժ Մատեուշ Վերդակը, որը հայտնվել էր Կրակովի կենտրոնում տեղի ունեցած զանգվածային հրաձգության վայրում, «անկասկած» փրկել է կրծքավանդակի շրջանում հրազենային վիրավորում ստացած ոստիկանի կյանքը։ Այս մասին պատմել է նրա գործընկերը՝ պրոֆեսոր Միխալ Պենձիատվիրը, որը Վերդակի հետ օգնություն էր ցուցաբերում տուժածներին, գրում է Fakt պարբերականը։

Երկու բժիշկներն իրենց ընտանիքների հետ ճաշում էին քաղաքի կենտրոնում, երբ կրակոցներ լսեցին։ Պենձիատվիրի վկայությամբ, որդին վազել է իր մոտ և ասել. «Հայրի՛կ, այնտեղ մարդկանց վրա են կրակում, մարդիկ գետնին են ընկնում»։

Վիրաբույժներն անմիջապես ուղղվել են դեպքի վայր։ Նրանք օգնություն են ցուցաբերել ինչպես տուժածներին, այնպես էլ ենթադրյալ հարձակվողին։ «Երբ խոսքը կյանքեր փրկելու մասին է, նշանակություն չունի, թե ով ով է»,— ընդգծել է Պենձիատվիրը Fakt-ին տված հարցազրույցում։

Կրակոցները դադարելուց հետո Պենձիատվիրը սկսել է օգնություն ցուցաբերել մյուս տուժածներին և ենթադրյալ հանցագործին, որը նույնպես օգնության կարիք ուներ։ Վերդակն այդ ընթացքում օգնում էր փոխհրաձգության ժամանակ կրծքավանդակի շրջանում հրազենային վիրավորում ստացած ոստիկանին։

«Պարզ ասած՝ նա կրծքավանդակի վերքը լցրել է ձեռքի տակ եղած բոլոր վիրակապերով և ձեռքերն էլ մտցրել այնտեղ»,— պատմել է Պենձիատվիրը։ Նրա համոզմամբ, առանց այդ գործողությունների ելքը կարող էր այլ լինել, քանի որ շտապօգնությանը ստիպված են եղել երկար սպասել։

Պենձիատվիրը նաև զանգահարել է Հովհաննես Պողոս II-ի անվան հիվանդանոց, որտեղ գործում է կրծքային և սրտային վիրաբուժության բաժանմունք։ Նա պնդել է, որ վիրավորին հենց այնտեղ տեղափոխեն, քանի որ կարծում էր՝ նման վնասվածքների մասնագետների շնորհիվ այդ բուժհաստատությունում ոստիկանի ողջ մնալու հավանականությունն ավելի մեծ է։

Վերդակը Կրակովում հայտնի է որպես փորձառու վիրաբույժ։ Պենձիատվիրը ղեկավարում է Կրակովի համալսարանական կլինիկական հիվանդանոցի ընդհանուր, ուռուցքաբանական, նյութափոխանակային և անհետաձգելի վիրաբուժության բաժանմունքը։

Կրակովի շուկայի հրապարակում տեղի ունեցած հրաձգության հետևանքով զոհվել է վեց մարդ՝ չորս կին և երկու տղամարդ։ Զոհվածներից չորսը Լեհաստանի քաղաքացիներ են, մեկը՝ Մեծ Բրիտանիայի քաղաքացի, ևս մեկի քաղաքացիությունը դեռ չի պարզվել։ Եվս 16 մարդ վիրավորվել է, այդ թվում՝ երկու ոստիկան՝ Յակուբ Կուլիկը և Արթուր Մորանսկին։

Բացի այդ, ենթադրյալ հրաձիգի բնակարանում հայտնաբերվել են երեք մարդու դիեր, որոնց ոստիկանությունը նույնականացրել է որպես նրա ծնողներ և քույր։ Լեհաստանի ազգային դատախազությունը հետաքննություն է սկսել, որին ներգրավվել է ահաբեկչական բնույթի հանցագործությունների քննության մեջ մասնագիտացած ստորաբաժանումը։

Տուժածներին օգնություն են ցուցաբերել նաև Իռլանդիայի Դուբլինի քաղաքացիական պաշտպանության ծառայության վեց կամավորներ։ Նրանք զբոսաշրջային այցով Կրակովում էին և հրաձգության պահին գտնվում էին գլխավոր հրապարակի մերձակայքում։ Առաջին օգնության դասընթացներ անցած կամավորները սիրտ-թոքային վերակենդանացում էին կատարում և դադարեցնում արյունահոսությունները։

Մեծ Բրիտանիայի զինված ուժերի ղեկավար Ռիչարդ Նայթոնը Financial Times-ին տված հարցազրույցում հայտարարել է, որ երկիրը հետ է մնում եվրոպացի դաշնակիցներից՝ Ռուսաստանից բխող աճող սպառնալիքին դիմակայելու հարցում։

Ըստ նրա, Մոսկվան գնալով ավելի պատրաստակամ է ռիսկի դիմելու, իսկ Եվրոպայում Ռուսաստանի ենթադրյալ գործողությունների մասշտաբներն այլևս թույլ չեն տալիս սահմանափակվել «հիբրիդային գործունեություն» հասկացությամբ։

«Սա ամենավտանգավոր ժամանակաշրջանն է, որ հիշում եմ իմ չափահաս կյանքի ընթացքում», — հայտարարել է Նայթոնը։

Նա նշել է, որ Ռուսաստանից և, ավելի լայն իմաստով, այլ պետություններից բխող սպառնալիքը շարունակում է աճել։

Զորահրամանատարի կարծիքով, Մեծ Բրիտանիան պետք է «հասնի եվրոպացի դաշնակիցներին», որոնք «ավելի լավ են գիտակցում ռիսկային գործողությունների դիմելու Կրեմլի պատրաստակամությունը»։

Նայթոնն ընդգծել է, որ խոսքը թիրախային սպանությունների, դիվերսիաների և կիբեռհարձակումների մասին է։

Նա նշել է, որ կան ապացույցներ, որ Ռուսաստանն առնչություն ունի Եվրոպայում և, որոշ չափով, հենց Մեծ Բրիտանիայում նման գործողությունների հետ։ Մոսկվան ավելի վաղ հերքել էր իր առնչությունը եվրոպական տարածքում հիբրիդային հարձակումներին։

Եվրոպական հատուկ ծառայությունները, մինչդեռ, հետաքննում են ավիաընկերություններին և լրատվական կազմակերպություններին ուղղված պայթյունների սպառնալիքների մի շարք դեպքեր։

Ինչպես Financial Times-ին հայտնել են հետախուզական գերատեսչությունների ներկայացուցիչները, մի քանի երկրներ համատեղ հետաքննություն են անցկացնում՝ պարզելու սպառնալիքների աղբյուրը։

Միևնույն ժամանակ, մեղավորների վերաբերյալ վերջնական եզրակացություններից դեռ հեռու են։ Հետախուզական հանրության որոշ ներկայացուցիչներ Ռուսաստանին համարում են ամենահավանական կազմակերպիչը։

Նայթոնը նաև հայտարարել է, որ բրիտանական իշխանությունները պետք է բնակչությանը բացատրեն ռուսաստանյան սպառնալիքի բնույթը և հիմնավորեն պաշտպանական ծախսերն ավելացնելու անհրաժեշտությունը։