julbaz.mediamonitoring.am

Vարչապետ Նիկոլ Փաշինյանի որոշմամբ` Արամ Խաչատրյանը նշանակվել է Հայաստանի Հանրապետության էկոնոմիկայի նախարարի տեղակալ։

Արամ Խաչատրյանի կենսագրությանը

Ծննդյան տարեթիվ, ամսաթիվ, ծննդավայր

1985թ., 6 հոկտեմբեր, Հայաստանի Հանրապետություն, ք․ Երևան

Կրթություն

2002-2006 թթ.՝ Իրավագիտության բակալավր | Երևանի պետական համալսարան

2009–2011 թթ.՝ Իրավագիտության մագիստրոս (LL.M.) | Հայաստանի ամերիկյան համալսարան Հիմնական ուղղություններ՝ հարկային, եվրոպական, մտավոր սեփականության և միջազգային հանրային իրավունք

2015–2016 թթ.՝ Արբիտրաժային և գործարար իրավունքի հետբուհական մագիստրոս (LL.M.) | Էրազմուս համալսարան Ռոտերդամ, Նիդերլանդներ NFP MA կրթաթոշակառու։ Հիմնական ուղղություններ՝ միջազգային կորպորատիվ և գործարար իրավունք, պայմանագրերի մշակում, առևտրային արբիտրաժ և միջազգային վեճերի լուծում

Աշխատանքային գործունեություն

2026 թվականի օգոստոսի 13-ից ՀՀ էկոնոմիկայի նախարարի տեղակալ

2012 թ. սեպտեմբեր – 2026 թ. օգոստոս՝ Գլխավոր իրավաբան | «Ձեռնարկությունների ինկուբատոր» հիմնադրամ

•    Ղեկավարել է պետական մարմինների, միջազգային կազմակերպությունների, դոնորների և մասնավոր գործընկերների մասնակցությամբ տեխնոլոգիական ու ինժեներական ոլորտների զարգացման ծրագրերի իրավական ապահովումը։

•    Խորհրդատվություն է տրամադրել ստարտափներին, ՓՄՁ-ներին և ծրագրային թիմերին՝ կորպորատիվ կառուցվածքի, պայմանագրերի, կարգավորող պահանջների, ռիսկերի կառավարման և միջազգային շուկաներ մուտք գործելու հարցերով։

•    Մասնակցել է ՏՏ և գործարար ոլորտներին առնչվող օրենսդրության, կառավարության որոշումների, քաղաքականության փաստաթղթերի և ինստիտուցիոնալ կառավարման գործընթացների մշակմանը։

•    Մշակել և բանակցել է ներդրումային, նորարարական և էկոհամակարգային ծրագրերին աջակցող համագործակցության, դրամաշնորհային, ծառայությունների, խորհրդատվական և առևտրային պայմանագրեր։

•    2022թ-ից հանդիսանում է Ձեռնարկությունների ինկուբատոր հիմնադրամի ներկայացուցիչ (խորհրդի անդամ) ՓՄՁ Զարգացման խորհրդում։

2010 թ. փետրվար – 2026 թ. Օգոստոս (համատեղությամբ)՝ Փաստաբան / իրավական խորհրդատու

•    Հայաստանյան ընկերություններին և ձեռնարկատերերին խորհրդատվություն է տրամադրել կորպորատիվ, առևտրային, պայմանագրային, վեճերի լուծման հարցերով։

•    Աջակցել է տեխնոլոգիական և ինժեներական ընկերություններին շուկա մուտք գործելու, գործառնական մոդելների, առևտրային գործընկերությունների և կարգավորող պահանջների պահպանման հարցերում։

•    Ոլորտային զարգացման նախաձեռնություններին տրամադրել է իրավական և կորպորատիվ կառուցվածքի վերաբերյալ աջակցություն։

•    Ներկայացրել է վստահորդների շահերը դատարաններում, վարչական մարմիններում և արբիտրաժային տրիբունալներում, վարել բանակցություններ ու բարդ առևտրային գործեր։

2011 թ. փետրվար – 2012 թ. սեպտեմբեր՝ Իրավախորհրդատու | «Կասկադ Ինշուրանս» / «ԻՆԳՈ Արմենիա» ԱՓԲԸ

•    Խորհրդատվություն է տրամադրել պայմանագրերի, ապահովագրական կարգավորման, հատուցումների, վեճերի և իրավական ռիսկերի հարցերով, ներկայացրել է ընկերությունը պետական մարմիններում ու դատարաններում։

2008 թ. սեպտեմբեր – 2011 թ. փետրվար՝ Իրավաբանական վարչության դատական բաժնի մասնագետ | ՀՀ անշարժ գույքի կադաստրի պետական կոմիտե

•    Համակարգել է վարչական և քաղաքացիական գործերով դատարաններում Կոմիտեի շահերի ներկայացուցչության ապահովման աշխատանքները և ներկայացրել Կադաստրի շահերը դատական վարույթներում։

Մասնագիտական միություններին անդամակցություն, դասավանդում

Արբիտրաժային ոլորտ` ՀՀ արբիտրների ասոցիացիայի համահիմնադիր և խորհրդի անդամ, 2023 թվականից՝ նախագահ

Մասնագիտական կարգավիճակ` ՀՀ փաստաբանների պալատի անդամ 2010թ-ից, փաստաբանի արտոնագիր՝ № 1033

Դասավանդում և հրապարակումներ` 2022 թվականից՝ Արբիտրաժային ամենամյա ամառային դպրոցի դասախոս, արբիտրաժայն ոլորտին առնչվող հրապարակումների հեղինակ։

Անձնական տվյալներ

Ամուսնացած է

Ունի երեք զավակ

Այլ տվյալներ

Տիրապետում է ռուսերեն և անգլերեն լեզուներին

Թվային հմտություններ՝ Microsoft Office, Google Workspace, ԱԲ գործիքներ

2006 – 2008թթ․՝ Պարտադիր զինվորական ծառայություն ՀՀ ԶՈՒ-ում

Մասնավոր իրավունքի ոլորտներում ավելի քան 15 տարվա փորձ ունեցող մասնագետ՝ տնտեսական կարգավորման, տեխնոլոգիական ու ինժեներական ոլորտների զարգացման, կորպորատիվ կառավարման, ներդրումային ծրագրերի և պետություն–մասնավոր հատված համագործակցության ուղղություններով։ Ունի ՓՄՁ-ներին և նորաստեղծ ընկերություններին աջակցելու, կարգավորող դաշտի բարելավման, բարդ գործընկերությունների բանակցման և քաղաքականության նպատակները գործնական լուծումների վերածելու փորձ։

Հակամարտության գոտիներում, ներառյալ՝ Ուկրաինայում և Գազայում, բժշկական հաստատությունների, բուժաշխատողների ու բուժառուների վրա հարձակումները 2026 թվականին շարունակում են աճել՝ հասնելով օրական միջինում ավելի քան չորս դեպքի, հայտնել են Առողջապահության համաշխարհային կազմակերպությունից։

ԱՀԿ-ի տվյալներով, որոնք Ժնևում ներկայացրել է գործակալության հումանիտար աղետների և արտակարգ իրավիճակների կառավարման վարչության տնօրեն Ալթաֆ Մուսանին, ընթացիկ տարվա հունվարից օգոստոս ընկած ժամանակահատվածում տեղի է ունեցել ավելի քան 900 հարձակում, որոնց հետևանքով զոհվել է առնվազն 900 մարդ, իսկ ավելի քան 1400-ը վիրավորվել են։

Մուսանիի տվյալներով՝ գրանցված դեպքերի ամենամեծ բաժինը բաժին է ընկնում Ուկրաինային, Լիբանանին և օկուպացված պաղեստինյան տարածքներին, թեև հարձակումներ արձանագրվել են նաև Իրանում, Սուդանում, Մյանմայում, Սիրիայում, Նիգերիայում և Կոնգոյի Դեմոկրատական Հանրապետությունում։

«Մենք տեսնում ենք բռնության ամենատարբեր ձևերը»,- նշել է Մուսանին՝ հիշատակելով ծանր զենքի կիրառումը, բժշկական օբյեկտների ավերումը, ինչպես նաև բուժաշխատողների և բուժառուների ձերբակալություններն ու առևանգումները։ Այդ ժամանակահատվածում ձերբակալվել է 94 բուժաշխատող։

Գազայում վնասվել են բոլոր 36 հիվանդանոցները, և դրանցից միայն մոտ կեսն է շարունակում մասամբ գործել, մինչդեռ Սուդանում այս տարի, ըստ զեկույցների, չեն գործում բժշկական հաստատությունների 37%-ը։ Ուկրաինայում ԱՀԿ-ն պատերազմի սկզբից ի վեր վավերացրել է ավելի քան 3100 հարձակում։

ԱՀԿ-ի ուսումնասիրությունը, որն ընդգրկել է Սիրիայի հյուսիս-արևմուտքում տեղի ունեցած 69 հարձակում, ցույց է տվել, որ ամբուլատոր խորհրդատվությունների թիվը հարձակումից անմիջապես հետո կրճատվել է 51%-ով և ավելի քան մեկ ամիս մնացել ցածր մակարդակի վրա։

Հարձակումները նաև խաթարում են հիվանդությունների բռնկումների դեմ պայքարի միջոցառումները, նշել է Մուսանին։ Կոնգոյի Դեմոկրատական Հանրապետությունում մայիսին Էբոլայի բռնկման մասին հայտարարությունից ի վեր առողջապահության ոլորտի վրա վավերացված 12 հարձակում խաթարել է համաճարակաբանական հսկողությունը, շփումների հետագծումը, բուժումն ու բնակչության շրջանում տեղեկատվական-լուսավորչական աշխատանքը։ Նմանատիպ միջադեպերը դժվարացնում են հիվանդությունների բռնկումների հայտնաբերումն ու զսպումը, հավելել է նա։

ԱՀԿ-ի մոնիթորինգի համակարգի գործարկումից ի վեր՝ 2018 թվականից, 29 երկրներում և տարածքներում վավերացվել է ավելի քան 10 հազար 400 հարձակում, որոնց հետևանքով զոհվել է մոտ 5700 մարդ, իսկ ավելի քան 8500-ը վիրավորվել են, հայտնել է Մուսանին։

Միաժամանակ նա ընդգծել է, որ մինչ այժմ ավելի քան 10 հազար հաստատված հարձակումներից ոչ մեկը չի հասել մեղավորներին իրական պատասխանատվության ենթարկելու մեխանիզմի։

Բժշկական հաստատությունները պաշտպանված են միջազգային հումանիտար իրավունքի նորմերով և Ժնևյան կոնվենցիաներով, հիշեցրել է ԱՀԿ ներկայացուցիչը։

Ազգային ժողովի նիստերի դահլիճում պատգամավոր Էդգար Ղազարյանի տեղափոխությունը պլանային տեխնիկական գործընթաց է և չպետք է շահարկումների առարկա դառնա: Դրա մասին օգոստոսի 14-ին լրագրողների հետ զրույցում հայտարարել է «Հզոր Հայաստան» դաշինքի խորհրդարանական խմբակցության քարտուղար Տիգրան Աբրահամյանը՝ մեկնաբանելով ընդդիմության և իշխող մեծամասնության միջև լարվածության հերթական ալիքից հետո խմբակցությունում տեղերի վերադասավորումները։

Նրա խոսքով՝ նստատեղերի վերադասավորման որոշումը, այդ թվում՝ Էդգար Ղազարյանի տեղափոխությունը, նախապես քննարկվել և նախապատրաստվել է խմբակցությունում, իսկ փոփոխությունների մոտ 90%-ը ծրագրված է եղել դեռևս մինչև դահլիճում տեղի ունեցած վերջին միջադեպերը:

«Պետք չէ խորհրդարանի աշխատանքը չափել կենցաղային կամ դպրոցական չափանիշներով՝ ով ում հետ է նստում: Մեր խմբակցությունը նստելակարգի վերաբերյալ որոշում է ընդունել ներքին քննարկումների արդյունքում: Մարդիկ այստեղ են գալիս օրենսդրական գործունեությամբ, փորձագիտական աշխատանքով և քաղաքացիների կյանքի բարելավմամբ զբաղվելու, այլ ոչ թե քննարկելու, թե ով որտեղ է նստած: Եթե որևէ մեկը դժգոհություն ունի պատգամավորների արտահայտությունների կամ բարեվարքության կանոնների վերաբերյալ, դրա համար գոյություն ունի Էթիկայի հանձնաժողով, ուր յուրաքանչյուրը կարող է դիմել սահմանված կարգով»,- ընդգծել է Տիգրան Աբրահամյանը:

Խմբակցության քարտուղարը միաժամանակ գործընկերներին ու մամուլին կոչ արեց վերջ դնել անձնական հակամարտությունների շուրջ անվերջանալի վեճերին և ուշադրությունը կենտրոնացնել հասարակության առանցքային խնդիրների վրա, մասնավորապես՝ երկրի մարզերում աղքատության բարձր մակարդակի վրա:

Ռուսաստանից Հայաստան Ադրբեջանի տարածքով տարանցիկ ուղարկվել է ցորենի հերթական խմբաքանակը, հայտնել են ադրբեջանական լրատվամիջոցները։

Նախօրեին «Ադրբեջանի երկաթուղիներ» ՓԲԸ-ի «Բիլյաջարի» կայարանից դեպի «Բյոյուք-Քյասիկ» կայարան է ուղարկվել վեց վագոնից բաղկացած գնացք՝ 420 տոննա ցորենով։

Այսօրվա դրությամբ Ադրբեջանով տարանցիկ Ռուսաստանից Հայաստան տեղափոխվել է ավելի քան 40 հազար տոննա հացահատիկ, շուրջ 9 հազար տոննա պարարտանյութ, 1 136 տոննա պրոպան, 133 տոննա ալյումին, 1 114 տոննա ածուխ և 67 հազար տոննա փայտանյութ։

Բացի դրանից, Ադրբեջանից Հայաստան մինչ օրս արտահանվել է մոտ 15 հազար տոննա դիզելային վառելիք և մոտ 5 հազար տոննա ԱԻ-92 և ԱԻ-95 մակնիշների բենզին։

Իրանը Խորմոզգան նահանգի երկնքում ամերիկյան MQ-9 Reaper անօդաչու թռչող սարք է խոցել։ Գործողության մասին հայտնել է Fars-ը։

Անօդաչու թռչող սարքը խոցվել է Իսլամական հեղափոխության պահապանների կորպուսի հակաօդային պաշտպանության նոր համակարգով։

Իսպանական իշխանությունները վանքից, որին սպառնում էր անտառային հրդեհը, դուրս են բերել XI դարում Արագոնի տարածաշրջանը կառավարած երեք թագավորների աճյունները։

Ինչպես հայտնել է հյուսիսարևելյան տարածաշրջանի փոխնախագահ Մար Վակերոն, աճյունները տեղափոխվել են վանքից 80 կմ հարավ Ուեսկայի նահանգային թանգարան,  որպեսզի ապահովվի դրանց անվտանգությունը մինչև իրավիճակի բարելավումը։

Երբ երկուշաբթիից մոլեգնող անտառային հրդեհը հինգշաբթի ուշ երեկոյան սկսեց մոտենալ X դարում կառուցված Սան Խուան դե լա Պենյա վանքին, մտավախությունը, որ այն կարող է հայտնվել կրակի մեջ, իշխանություններին ստիպեց փրկարարական գործողություն սկսել։

Արտակարգ իրավիճակների ռազմական ստորաբաժանման խումբը կարողացել է ներթափանցել լեռնազանգվածում գտնվող վանք և վերցնել այնտեղ թաղված XVIII դարի կոմսի արարողակարգային հագուստը, նախքան կրակի մոտենալը նրանց ստիպել է նահանջել։

Թիմը երկրորդ անգամ վերադարձել է ոստիկանության աշխատակիցների և մշակութային ժառանգության պահպանության մասնագետների ուղեկցությամբ և վանքի դամբարանից դուրս է բերել Արագոնի՝ 1035-1104 թվականներին իշխած առաջին երեք թագավորների աճյունները, ինչպես նաև մի քանի պատմական նկարներ։

Անտառային հրդեհը հինգշաբթի ավելի վաղ ուժգնացել էր բարձր ջերմաստիճանի և ուժեղ քամու պատճառով։ Այն ոչնչացրել է ավելի քան 9000 հեկտար և ստիպել տարհանել 16 բնակավայր, թեև ուրբաթ առավոտվա դրությամբ բուն վանքը չէր տուժել։

Մինչ այդ Իսպանիայի հարավում մեկ այլ՝ անհամեմատ ավելի լայնածավալ անտառային հրդեհի հետ կապված իրավիճակը նույնպես վատթարացել է։ Ներկա պահին Ուելվայի նահանգում այրվել է 31 հազար հեկտար անտառ և հանգեցրել մոտ 700 մարդու տարհանման։