Իրանի նախագահ Մասուդ Փեզեշքիանը Ֆրանսիայի նախագահ Էմանուել Մակրոնի հետ հեռախոսազրույցի ընթացքում կոչ է արել Եվրոպային ավելի ակտիվ դերակատարում ստանձնել՝ Միացյալ Նահանգներին համաձայնության մղելու հարցում։
Փեզեշքիանը շեշտել է, որ Թեհրանը պատրաստ է շարունակել բանակցությունները միջազգային կանոնների շրջանակում, սակայն գործընթացին խոչընդոտում են ամերիկյան բարձրաստիճան պաշտոնյաների «չափազանցված պահանջներն ու քաղաքական կամքի բացակայությունը»։
Իրանի առաջնորդի համոզմամբ՝ սպառնալիքների, ճնշումների և ռազմական գործողությունների վրա հիմնված մոտեցումներն անարդյունավետ են և միայն ավելի են բարդացնում առկա խնդիրները։ Նա վերահաստատել է, որ դիվանագիտությունը մնում է նախընտրելի ուղին, և Իրանը պատրաստ է երկխոսության՝ սեփական ազգային շահերի պաշտպանության պայմանով։
Անդրադառնալով տարածաշրջանային անվտանգությանը՝ Փեզեշքիանը նշել է, որ Իրանը մշտապես ձգտել է ապահովել անվտանգ նավագնացությունը Հորմուզի նեղուցում։ Նա միևնույն ժամանակ զգուշացրել է, որ այդ ջրային ուղու նկատմամբ ցանկացած սպառնալիք կարող է աղետալի հետևանքներ ունենալ համաշխարհային առևտրի համար։
