julbaz.mediamonitoring.am

Ֆրանսիայի՝ Եվրոպայի և արտաքին գործերի նախարարության եվրոպական հարցերով լիազոր նախարար Բենժամեն Հադադն ապրիլի 14-ին այցելել է Հայոց ցեղասպանության հուշահամալիր և թանգարան: Ինչպես տեղեկացրին Հայոց ցեղասպանության թանգարան-ինստիտուտից, նախարարին ուղեկցել են ՀՀ-ում Ֆրանսիայի արտակարգ և լիազոր դեսպան Օլիվիե Դըկոտինյին և այլ պաշտոնատար անձինք: Հյուրերին դիմավորել և այցի ընթացքում ուղեկցել է ՀՑԹԻ տնօրենի ժամանակավոր պաշտոնակատար Հրաչյա Թաշչյանը:

Բենժամեն Հադադը ծաղկեպսակ է դրել հուշահամալիրի պատին, ապա պատվիրակության անդամները ծաղիկներ են դրել անմար կրակի մոտ, մեկ րոպե լռությամբ հարգել Հայոց ցեղասպանության զոհերի հիշատակը:

Պատվիրակությունը շրջել է հուշահամալիրի տարածքում, դեսպան Օլիվիե Դըկոտինյինի առաջարկով մոտեցել Հուշապատին, որի հետնամասում հատուկ խորշերի մեջ ամփոփված են 19-րդ դարավերջին և 20-րդ դարասկզբին թուրքական կառավարության իրագործած հայերի զանգվածային կոտորածների և ցեղասպանության դեմ իրենց բողոքի ձայնը բարձրացրած օտարազգի մի շարք հասարակական, քաղաքական գործիչների, մտավորականների և միսիոներների գերեզմաններից վերցված հողով լի փոքր սափորները: Հյուրերը կանգ են առել Անատոլ Ֆրանսի և Լուի Դարթիժ դյու Ֆուռնեի հուշաքարերի մոտ:

Այնուհետև պատվիրակությունն այցելել է Հայոց ցեղասպանության թանգարան, էքսկուրսավար Հասմիկ Մարտիրոսյանի ուղեկցությամբ ծանոթացել մշտական և ժամանակավոր ցուցադրություններին: Բենժամեն Հադադը գրառում է կատարել պատվավոր հյուրերի հուշամատյանում, հետո շրջել նաև թանգարանի վերջին սրահում՝ բացօթյա ներքին բակում, որի կիսաշրջանաձև, տասներկու հավասար հատվածների բաժանված բազալտե պատի վրա փորագրված են ակնառու պետական գործիչների, դիվանագետների, գիտնականների, գրողների` Հայոց ցեղասպանությունը դատապարտող խոսքերը:

Վերջում ՀՑԹԻ տնօրենի ժամանակավոր պաշտոնակատար Հրաչյա Թաշչյանը պարոն Հադադին է նվիրել ՀՑԹԻ ֆրանսերեն պատկերագիրք և Ռայմոնդ Գևորգյանի «Հայոց ցեղասպանությունը և դրա հետևանքները» գրքույկը:

Առաջարկվում է խստացնել թմրամիջոցների ապօրինի շրջանառության հետ կապված մի շարք հանցագործությունների պատժաչափերը: Այդ մասին օրենսդրական նախաձեռնությունն Ազգային ժողովի՝ ապրիլի 14-ի նիստին ներկայացրեց ԱԺ «Քաղաքացիական պայմանագիր» խմբակցության պատգամավոր Հայկ Սարգսյանը:

Ըստ այդմ՝ իրացնելու նպատակով թմրամիջոց արտադրելը, պատրաստելը, վերամշակելը, ձեռք բերելը, պահելը, տեղափոխելը, առաքելը, տարածելը, գովազդելը և իրացնելը, եթե դա տեղի է ունենում ՏՏ-ի միջոցով, օրինակ՝ «Տելեգրամ» ալիքով, ապա պատիժն առաջարկվում է խստացնել՝ 3-6 տարվա փոխարեն նախատեսելով 4-8 տարվա պատիժ:

«Համանման պատժի խստացում եմ առաջարկում իրականացնել նաև արարքն անօգնական վիճակում գտնվող անձի նկատմամբ կատարելու դեպքում: Իսկ նույն հանցագործությունն անչափահասի ներգրավմամբ կամ անչափահասի նկատմամբ կատարելու դեպքում, այսինքն՝ անչափահասին թմրամիջոց վաճառելու կամ վաճառքի մեջ անչափահասի ներգրավելու դեպքում առաջարկում եմ առավել խիստ պատիժ սահմանել, և 3-6 տարի ազատազրկման փոխարեն նախատեսել 6-12 տարվա պատիժ»,- ասաց նա:

Պատգամավորը ներկայացրեց նաև թեմայի վերաբերյալ միջազգային փորձը: Ըստ այդմ՝ բազմաթիվ երկրներում թմրամիջոցների ապօրինի շրջանառության համար խիստ պատիժներ են սահմանվում: Մի շարք երկրներում նախատեսվում է անգամ մահապատիժ: Այդ երկրներն են Չինաստանը, Իրանը, Սաուդյան Արաբիան, Ինդոնեզիան, Սինգապուրը, Թաիլանդը, Վիետնամը, Միացյալ Արաբական Էմիրությունները:

Բազմաթիվ զարգացած երկրներում էլ նախատեսվում է մինչև ցմահ ազատազրկում: Այդպիսի երկրներ են Հնդկաստանը, Պակիստանը, Եգիպտոսը, Քուվեյթը, Օմանը, Հարավային Կորեան, Ճապոնիան, Ավստրալիան, Նոր Զելանդիան, ԱՄՆ-ը, Կանադան, Ֆրանսիան և Գերմանիան:

Պաշտպան Արամ Վարդևանյանը լրագրողների հետ զրույցում պնդում է կատարել, որ Սամվել Կարապետյանի վերաբերյալ վարույթի քննության որոշակի փուլում Քննչական կոմիտեի նախագահի տեղակալը, որին մակագրված է եղել նշված վարույթը, հրաժարական է տվել:

Այդ կապակությամբ ՔԿ խոսնակ Կիմա Ավդալյանը պարզաբանում է, որ քրեական վարույթի նախաքննության ընթացքում Քննչական կոմիտեի նախագահի որևէ տեղակալ հրաժարական չի ներկայացրել:

«Պաշտպանը հարցազրույցի ընթացքում պնդել է նաև, որ իրենք վարույթի քննության 4-րդ ամսում միջնորդել են մաս անջատել և ուղարկել դատարան, սակայն Քննչական կոմիտեն պարզաբանել է, որ նման գործիքակազմ չկա:

Ասվածի կապակցությամբ հարկ է նշել, որ վարույթի սկզբնական փուլում վերջիններս միջնորդել են քրեական վարույթից անջատել «կոչի» դրվագը և այն ուղարկել դատարան, սակայն նման իրավական հնարավորություն Քրեական դատավարության օրենսգրքով նախատեսված չէ՝ հաշվի առնելով այն հանգամանքը, որ Սամվել Կարապետյանի նկատմամբ քրեական հետապնդում է իրականացվել ոչ միայն այդ, այլ նաև փողերի լվացման, խարդախության, հարկեր վճարելուց խուսափելը կազմակերպելու դրվագներով: Այսինքն՝ առկա չէ իրավական ընթացակարգ, որը թույլ կտար միևնույն անձի նկատմամբ իրականացվող քրեական հետապնդումը տրոհել մասերի և մի մասով շարունակել նախաքննությունը, իսկ մյուս մասով ուղարկել դատարան:

Պաշտպանի մյուս հայտարարության հետ կապված, թե ի վերջո վարույթից մաս է անջատվել, պետք է նշել, որ այս դեպքում խոսքը Սամվել Կարապետյանի նկատմամբ իրականացվող քրեական հետապնդման ամբողջ ծավալով նոր վարույթ անջատելու, այլ ոչ թե մեղադրանքը տրոհելու մասին է:

Հետևաբար՝ պաշտպանի հայտարարությունները հիմնազուրկ են և չփաստարկված»,- գրել է նա: