julbaz.mediamonitoring.am

ԱՄՆ-ի և Ադրբեջանի ներկայացուցիչները քննարկել են TRIPP նախագիծը։ Ինչպես հայտնում են ադրբեջանկան լրատվամիջոցները՝ հղում կատարելով երկրի թվային զարգացման և տրանսպորտի նախարարությանը, քննարկումը տեղի է ունեցել Ադրբեջանի թվային զարգացման և տրանսպորտի փոխնախարար Ռահման Հումմետովի և ԱՄՆ Պետդեպարտամենտի տնտեսական, էներգետիկայի և բիզնեսի հարցերով բյուրոյի ավագ խորհրդական Ռեբեկա Նեֆի հանդիպման ժամանակ։

«Կարծիքներ են փոխանակվել Ադրբեջանի տարածքով անցնող միջազգային տրանսպորտային միջանցքների, «Թրամփի երթուղի հանուն միջազգային խաղաղության և բարգավաճման» (TRIPP) նախաձեռնության, ինչպես նաև ռազմավարական գործընկերության խարտիայի շրջանակներում տրանսպորտի և արհեստական ինտելեկտի ոլորտում համագործակցության հնարավորությունների շուրջ»,- նշվում է հաղորդագրության մեջ:

Բացի այդ, քննարկվել են ամերիկյան ընկերությունների մասնակցության հնարավորությունները Ադրբեջանում իրականացվող տրանսպորտային ենթակառուցվածքների, արհեստական ​​բանականության, տվյալների կենտրոնների և այլ առաջնահերթ ոլորտներում նախաձեռնությունների նախագծերին։