Ասում են, թե ՔՊ-ն մտավախություն ունի, որ կարող է պարտվել հունիսի 7-ին։ Նույնիսկ կասկած էր շրջում, թե պարտությունից խուսափելու համար կարող են Մոլդովայի օրինակով՝ չգրանցել ռուսամետ ուժերին։ Սակայն ՔՊ-ն գնացքից ցատկելու խիզախություն չունի և գնում է մանր քայլերով, դանդաղ շտապելով։
Ապրիլի 7-ին ԱԺ հրատապ նիստում Ընտրական օրենսգրքում լրացումներ և փոփոխություններ կատարվեցին: Փոփոխությամբ՝ կուսակցությունների դաշինքի անվանումը չի կարող պարունակել անձնանուն, պետական և տեղական ինքնակառավարման մարմինների անուններ կամ դրանց շփոթելու աստիճան նման անվանումներ կամ դրանց հոլովաձևեր։ Դաշինքի անունը չի կարող պարունակել նաև վիրավորական կամ զրպարտչական բնույթի բառեր, արտահայտություններ։
Ընդդիմությունը քննադատեց այս փոփոխությունները։ Հանրային խոսույթում տարածված գնահատականն այն էր, թե նախագիծն ուղղված էր հատկապես Սամվել Կարապետյանի դեմ, քանի որ նրա առաջնորդած դաշինքը կոչվելու էր «Ուժեղ Հայաստան Սամվել Կարապետյանի հետ»։
Ինչո՞ւ են վախենում Սամվել Կարապետյան անձնանունից։ Եվ ի՞նչ կլիներ, եթե այս անունը մնար դաշինքի անվան մեջ։
Լավատեսները կարծում են, թե ԸՕ այս փոփոխությունը չի անդրադառնա ընդդիմադիրների շանսերի վրա, և նրանք գուցե կհաղթեն հունիսի 7-ին, եթե հաստատապես կանգնեն անկախության ու ժողովրդավարության դիրքերում։ Լավատեսորեն ենթադրելի է նաև, որ այս փոփոխությունից հետո ասպարեզից դուրս կմղվեն ապաքաղաքական, անձնակենտրոն, պոպուլիստական միավորները, առաջին հերթին՝ ՔՊ-ն, տեղ կբացվի գաղափարական, քաղաքական, մշակութային բանավեճերի համար։ Սակայն ընդդիմադիրների բուռն արձագանքն ու ցույցերը նաև հոռետեսական ենթադրությունների տեղիք են տալիս։
Նախքան կալանավորվելը՝ Սամվել Կարապետյանը քաղաքական գործիչ չէր, գործարար ու բարերար էր, ժողովուրդը նրան ճանաչում էր որպես հաջողակ գործարար, առատաձեռն բարերար։ Նրա բարձր վարկանիշը ցույց է տալիս, որ մարդիկ սիրում են, հարգում, վստահում հաջողակ գործարարին, բարերարին՝ անկախ քաղաքացիությունից։ Այսինքն՝ նրա ներկայիս բարձր վարկանիշը պայմանավորված է նախևառաջ գործարարի և բարերարի բարի համբավով։
Տրամաբանական է, որ եթե դաշինքը ժողովրդին ներկայանար Սամվել Կարապետյանի անունը ներառելով, ապա շատ քվե կարող էր ստանալ, գուցե նաև հաղթել։ Ուստի՝ պրագմատիկ որոշում էր նրա անունը դաշինքի անվան մեջ ներառելը։
Կա նաև քաղաքակրթական խնդիր։ Վերջին տարիներին Կրեմլի հակահայ քայլերի արդյունքում, ռուսամետ քաղաքական գործիչների վարկանիշը նվազում է։ Օրեր առաջ, Սամվել Կարապետյանն՝ անդրադառնալով Փաշինյան-Պուտին հանդիպմանը՝ բարկացավ Փաշինյանի վարքի վրա, հանդիմանեց նրան։ Այս հայտարարությունը բավարար հիմք է նրա ռուսամետությունն ապացուցելու համար։
Եվ այս հայտարարությանն անմիջապես հաջորդեց ԸՕ փոփոխության նախաձեռնությունը։ ՔՊ-ն չէր կարող այսպես կոպիտ կտրել իր գլխավոր մրցակցի դաշինքի անունը, ենթադրաբար՝ նվազեցնել նրա հաղթելու շանսը, եթե չունենար ապացույց, որ Սամվել Կարապետյանը ռուսական շահերի ջատագով է։ Եվ հիմա՝ եթե որևէ միջազգային դիտորդ հարց տա, թե ընտրություններից 2 ամիս առաջ ինչո՞ւ այսպիսի կոպիտ քայլ արեցիք մրցակցի դեմ, ապա ՔՊ-ն կարող է մատնացույց անել Կարապետյանի ռուսամետ հայտարարությունը և արդարացնել ԸՕ փոփոխությունը։
ԸՕ-ում այս նոր փոփոխությունը կարող է անդրադառնալ նաև «Հայաստան» անվան վրա, քանի որ արգելվելու է նաև պետության անունն օգտագործել կուսակցության կամ դաշինքի անվան մեջ։ Այսպիսով՝ «Ուժեղ Հայաստան Սամվել Կարապետյանի հետ» անվանումից կմնա միայն «Ուժեղը»։
Կարճ ասած՝ ապրիլի 7-ի ԸՕ փոփոխությունը անսպասելի հարված էր ընդդիմադիր այն միավորներին կամ դաշինքներին, որոնք իրենց առաջնորդների անվան ու բարձր վարկանիշի շնորհիվ հույս ունեին շատ ձայն հավաքել, գուցեև հաղթել հունիսի 7-ին։ Հետևաբար՝ մրցակիցները նոր մարտավարություն պետք է կիրառեն, որ շահագործեն իրենց առաջնորդի բարձր հեղինակությունը և հասնեն արդյունքի։
Թաթուլ Մկրտչյան