julbaz.mediamonitoring.am

Ամերիկացի զինվորականներն օգոստոսի 25-ին Կարիբյան ծովում հերթական հարվածն են հասցրել ենթադրաբար թմրանյութեր փոխադրող նավին:

ԱՄՆ զինուժից տեղեկացրել են, որ հարվածի հետևանքով զոհվել է չորս մարդ։ «Հաստատված հետախուզական տվյալները  վկայել են, որ նավն օգտագործվել է թմրանյութերի մաքսանենգության համար», – նշվում է հրապարակնան մեջ։

Ամերիկյան զանգվածային լրատվամիջոցների տվյալներով՝ 2025 թվականի աշնանից ի վեր թմրանյութեր ետղափոխելու մեջ կասկածվող նավերին ԱՄՆ զինված ուժերի հարվածների զոհ է դարձել ավելի քան 220 մարդ։

Հայաստանի Հանրապետությունում Բուլղարիայի Հանրապետության դեսպանությունը հայտնում է, որ 2026 թվականի նոյեմբերի 7-ից կվերսկսվեն Սոֆիա–Երևան–Սոֆիա ուղիղ չվերթները։

Ինչպես հաղորդում է «Արմենպրես»-ը, դեսպանատնից հայտնել են, որ չվերթի գործարկումը դեսպան Նիկոլա Նիկոլովի ջանքերի և «GullivAir» ավիաընկերությունը ներկայացնող կապիտան Յանկո Իվանովի բացառիկ աջակցության արդյունքն է։

«Սույն չվերթն անմիջական շփումների նոր հնարավորություններ է ստեղծում Բուլղարիայի և Հայաստանի քաղաքացիների միջև, ինչպես նաև բիզնեսի, մշակույթի, սպորտի, զբոսաշրջության և փոխադարձ հետաքրքրություն ներկայացնող այլ նախաձեռնությունների ու ծրագրերի ոլորտներում՝ երկկողմ համագործակցության զարգացման համար»,- նշվել է հաղորդագրության մեջ։

Դեսպան Նիկոլովն իր անկեղծ երախտագիտությունն է հայտնել բուլղարական կառույցներին՝ Հայաստանի Հանրապետության հետ երկկողմ հարաբերությունների աշխուժացման հարցում ցուցաբերած ըմբռնման և աջակցության համար։

«Սոֆիա–Երևան–Սոֆիա ուղիղ օդային հաղորդակցության վերականգնումը կարևոր քայլ է երկու ժողովուրդների միջև շփումների խորացման ուղղությամբ և նոր հնարավորություններ է բացում երկկողմ երկխոսության զարգացման ու ամրապնդման համար»,- նշվում է դեսպանատան հաղորդագրության մեջ։ 

Տեղեկացնում ենք, որ «Սյունիք» ՖԱ-ի հետ պայմանագիր է կնքել 24-ամյա պաշտպան Արսեն Գալստյանը։

Գորիսում ծնված ֆուտբոլիստը հանդես է գալիս աջ և ձախ եզրային պաշտպանի դիրքերում։ Իր կարիերայի ընթացքում Գալստյանը ներկայացրել է «ԲԿՄԱ», «Նոա», «Ալաշկերտ» և «Վան» ֆուտբոլային ակումբները։

Բարի գալուստ «Սյունիք» ՖԱ, Արսե՛ն։ Մաղթում ենք հաջող մրցաշրջան, կայուն ելույթներ, ամուր պաշտպանություն և բազմաթիվ հաղթանակներ՝ «Սյունիք» ՖԱ-ի կազմում։

Հայ ծանրորդները շարունակում են հաջող ելույթների շարքը Եվրոպայի պատանեկան առաջնությունում: Այս մասին հայտնում է ֆեդերացիան։
 
Կոսովոյում ընթացող առաջնության 85 կգ քաշային պատանիների պայքարում Հայաստանի հավաքականից Հարություն Ավետիսյանը պոկում վարժությունում ունեցել է երեք հաջող մոտեցում` բարձրացնելով 133, 138 և 141 կգ: Այս վարժությունում նա դարձել է ոսկե մեդալակիր:
 
Հրում վարժությունում հայ ծանրորդը գլխավերևում պահել է 160 և 168 կգ: Այս ձևում նա երրորդն է: Երկամարտի 309 կգ արդյունքով Հարություն Ավետիսյանը դարձել է Եվրոպայի առաջնության բրոնզե մեդալակիր

Դոնալդ Թրամփը հայտարարել է, որ պատերազմի նախարար Փիթ Հեգսեթին հրամայել է կրճատել Հարավային Կորեայի հետ համատեղ զորավարժությունները: ԱՄՆ նախագահի խոսքով՝ նման վարժանքները ոչ միայն թանկ են, այլև թշնամական ազդանշան են ուղարկում Հյուսիսային Կորեային, որի առաջնորդը բարյացակամ է տրամադրված իր նկատմամբ և սպառնալիք չի ներկայացնում Միացյալ Նահանգների համար:

Միևնույն ժամանակ Թրամփն ընդգծել է, որ Հարավային Կորեան հրաժարվել է օգնել ԱՄՆ-ին Իրանի հետ հակամարտության հարցում:

Նախորդ շաբաթ Սպիտակ տան ղեկավարը հայտարարել էր, որ Միացյալ Նահանգները զգալիորեն կկրճատի Հարավային Կորեայի հետ համատեղ զորավարժությունները: Թրամփը նշել էր, որ դրա պատճառներից մեկը Հյուսիսային Կորեայի առաջնորդ Կիմ Չեն Ընի հետ իր «շատ լավ հարաբերություններն» են:

Երևանի քաղաքապետարանի աջակցությամբ և «Կանտատա» ՀԿ-ի նախաձեռնությամբ Մերգելյանի այգում մեկնարկել է «Երևանի գիշերները» բացօթյա համերգաշարը։ Առաջին երեկոն դասական երաժշտության հնչյուններով էր, իսկ ծրագրի շրջանակում նախատեսվում է ևս 5 համերգ՝ 2 դասական և 3 ջազային։

Այսօր Վահագն Դավթյանի անվան այգում տեղի կունենա ջազային համերգ՝ Վահագն Հայրապետյանի գլխավորությամբ։

Դասական համերգներ

Օգոստոսի 31 — Սիրահարների այգի
Սեպտեմբերի 14 — Վահագն Դավթյանի անվան այգի

Ջազային համերգներ

Օգոստոսի 26 — Վահագն Դավթյանի անվան այգի
Օգոստոսի 27 — Սիրահարների այգի
Սեպտեմբերի 11 — Մերգելյանի այգի

Սկիզբը՝ ժամը 20:00-ին
Մուտքն ազատ է։

Օգոստոսի 25-ին՝ ժամը 09։20-ի սահմաններում, Հյուսիսային ավտոկայանի հարակից տարածքում երեխան գրկին մի քաղաքացի մոտեցել է պարեկային ծառայողներին և հայտնել, որ երեխայի ինքնազգացողությունը վատացել է։

Պարեկներն անմիջապես ծառայողական մեքենայով երեխային տեղափոխել են բժշկական կենտրոն։ Նրա կյանքին վտանգ չի սպառնում։

ՆԳՆ ոստիկանության ծառայողները հասարակական կարգը պահպանելուց բացի, անհրաժեշտության դեպքում միշտ քաղաքացու կողքին են՝ օպերատիվորեն արձագանքելով յուրաքանչյուր ահազանգի։

Ուկրաինական անօդաչու թռչող սարքերը չորեքշաբթիի գիշերը՝ օգոստոսի 26-ին, հարվածել են Տամբովի մարզի Կոտովսկ քաղաքում գտնվող Wildberries-ի լոգիստիկ համալիրին։ Պահեստին հասցված հարվածն ու բռնկված հրդեհը հաստատել է նահանգապետ Եվգենի Պերվիշովը։ Նրա փոխանցմամբ՝ ՀՕՊ համակարգերը և «ԲԱՐՍ-Տամբով» շարժական կրակային խմբերը ոչնչացրել են հակառակորդի 16 անօդաչու։ Հարվածների հետևանքով լոգիստիկ կենտրոնում հրդեհ է բռնկվել, որի մակերեսը կազմել է 40 000 քառակուսի մետր։

Նահանգապետը նշել է նաև, որ հարձակման հետևանքով տուժել է պահեստի մեկ աշխատակից, իսկ ԱԹՍ-ի անկման պատճառով նաև մասնավոր տուն է այրվել։

Կոտովսկում Wildberries-ի լոգիստիկ համալիրի ընդհանուր մակերեսը 108 000 քառակուսի մետր է։ Այս օբյեկտն արդեն ենթարկվել էր ԱԹՍ-ների հարձակման։ Հուլիսի 18-ի գիշերը անօդաչուի հարվածից պահեստային համալիրում խոշոր հրդեհ էր բռնկվել, ինչի հետևանքով 7 մարդ զոհվել էր, ևս 25-ը՝ տուժել։

Միևնույն ժամանակ, Նիժնի Նովգորոդի մարզի Կստովո քաղաքի բնակիչները սոցցանցերում կադրեր են հրապարակել, որոնցում երևում է տեղի «Լուկոյլ-Նիժեգորոդնեֆտեօրգսինտեզ» նավթավերամշակման գործարանի տարածքում բռնկված հրդեհը։

Այդ տարածաշրջանում գիշերը գործել է օդային տագնապի ռեժիմ, սակայն տեղական իշխանությունները ԱԹՍ-ների հարձակման հետևանքների մասին օպերատիվ տեղեկություններ չեն հայտնել։ Կստովոյի այս գործարանը Ռուսաստանի նավթավերամշակման գործարանների դեմ ուկրաինական հարվածների ալիքի սկզբից ի վեր բազմիցս է ենթարկվել հարձակումների։

Մասնավորապես, հուլիսի 2-ի գիշերը ձեռնարկության տարածքում խոցվել էր նավթի առաջնային վերամշակման ԱՎՏ-6 տեղակայանքը, ինչի մասին հայտնել էր Ուկրաինայի զինված ուժերի գլխավոր շտաբը։

Կստովոյի ձեռնարկության նախագծային հզորությունը տարեկան կազմում է մոտ 15 միլիոն տոննա նավթ, այն Ռուսաստանի հինգ խոշորագույն ՆՎԳ-ներից մեկն է։ Ինչպես ավելի վաղ նշել էր Astra պարբերականը, այս գործարանը վառելիքով է ապահովում Մոսկվան ու Մոսկվայի մարզը։

Իրանն ու Օմանը բանակցություններ են վերսկսել Օրմուզի նեղուցում համատեղ ժամանակավոր նավագնացային միջանցք ստեղծելու և տարածքն ականազերծելու շուրջ։

Թեհրանում կայացած հանդիպման ժամանակ Իրանի և Օմանի արտաքին գործերի նախարարներ Աբբաս Արաղչին և Բադր ալ-Բուսաիդին քննարկել են փուլային շրջանակային ծրագիր, ըստ որի՝ Պարսից ծոց մտնող երթուղին ամբողջությամբ անցնելու է Իրանի տարածքային ջրերով, իսկ դուրս եկողը՝ Իրանի և Օմանի ջրերով։

Կողմերը նաև համաձայնության են եկել նեղուցն ականներից մաքրելու համատեղ առաքելության շուրջ, ինչը հակասում է ԱՄՆ նախագահ Դոնալդ Թրամփի ավելի վաղ արված հայտարարություններին, թե ամերիկյան ռազմածովային ուժերն արդեն լիովին վերացրել են ականային սպառնալիքը միջազգային ջրերում։

Երկու երկրների տեխնիկական խմբերը առաջիկա 30-ից 60 օրվա ընթացքում կշարունակեն քննարկել երթևեկության կառավարման և անվտանգության մանրամասները։

Օրմուզի նեղուցը, որով մինչև 2026 թվականի փետրվարի պատերազմը փոխադրվում էր համաշխարհային նավթի և հեղուկ գազի մեկ հինգերորդ մասը, դեռևս փակ է առևտրային նավերի համար։ ԱՄՆ-ն պաշտպանում է նավերը Օմանի ափերով անցնող հարավային ուղում, իսկ Իրանը պնդում է հյուսիսային երթուղու տարբերակը և հրաժարվում է բացել նեղուցը, քանի դեռ ամերիկյան պատժամիջոցները չեն չեղարկվել։

Իրավիճակը սրում է նաև Վաշինգտոնի կոշտ դիրքորոշումը․ Դոնալդ Թրամփն ավելի վաղ սպառնացել էր հարվածել Օմանին, եթե վերջինս խանգարի ամերիկյան ծրագրերին։ Բացի այդ, ԱՄՆ ֆինանսների նախարարությունն այս շաբաթ խստացրել է տնտեսական պատժամիջոցները Իրանի դեմ՝ սպառնալով պատժել բոլոր այն երկրներին, որոնք կշարունակեն առևտուր անել Թեհրանի հետ։

Այնուամենայնիվ, ձգձգվող խաղաղության բանակցությունների ֆոնին, ԱՄՆ-ն սկսել է զգուշորեն վերադարձնել դիվանագետներին Մերձավոր Արևելքի հեռացված ներկայացուցչություններ, ինչը հուշում է մոտ ապագայում լարվածությունը նվազեցնելու ցանկության մասին։