Նոյեմբերի 7-ին՝ ժամը 16։43-ին, ՆԳՆ 112 օպերատիվ կառավարման կենտրոն ահազանգ է ստացվել, որ Հրազդանի կիրճում՝ ժայռից մեծ քար է պոկվել և ընկել ճանապարհի վրա։
Դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ։
Փրկարարները քարը հեռացրել են ճանապարհի երթևեկելի հատվածից․ երթևեկությունը երկկողմանի վերականգնվել է։
Արաքսի սահմանապահ գոտիներում բացահայտվել են բնապահպանական իրավախախտումներ, հայտնում են ԲԸՏՄ-ից:
«Բնապահպանության և ընդերքի տեսչական մարմնի, ՀՀ ազգային անվտանգության ծառայության աշխատակիցների և ՌԴ սահմանապահ զորքերի ծառայողների համատեղ իրականացրած միջոցառումների ընթացքում Արմավիրի մարզում՝ Արաքս գետի սահմանապահ գոտիներում արձանագրվել են բնապահպանական օրենսդրության խախտումներ։
Քաղաքացի Գ.Մ.-ն Արաքս գետից ինքնակամ տեղադրված մակերևութային ջրի պոմպերի միջոցով իրականացրել է ապօրինի ջրառ՝ ոռոգման նպատակով։ Տեսուչների կողմից ապօրինի տեղադրված խողովակաշարն ու պոմպերն ապամոնտաժվել և ի պահ են հանձնվել սահմանապահ զորքերի ծառայողներին։ Իրավախախտը ենթարկվել է վարչական պատասխանատվության՝ 200.000 ՀՀ դրամի չափով։
Սահմանապահ ուղեկալներից 2-ի տարածքներում հայտնաբերվել է վայրի կենդանիների ապօրինի որսի համար նախատեսված ինքնաշեն 4 որսածուղակ։ Դրանցից մեկում հայտնաբերվել է անկած աղվես։ Ապօրինի որս կատարելու փաստով քաղաքացի Վ.Մ.-ն ենթարկվել է վարչական պատասխանատվության՝ 150․000 ՀՀ դրամի չափով։
Շրջայցերի ընթացքում Արաքս գետի ջրային ավազանից դուրս են բերվել ապօրինի ձկնորսության համար նախատեսված ինքնաշեն սարքեր, որոնք սահմանված կարգով վնասազերծվել և առգրավվել են։
Համատեղ միջոցառումները շարունակվում են»,- նշված է հաղորդագրության մեջ:
Երկրաբաններին առայժմ չի հաջողվել պարզել Սթոունհենջի զոհասեղանի վեց տոննա կշռող քարի ծագումը, սակայն նոր հետազոտությունը թույլ է տվել նեղացնել որոնումների շրջանակը։ Նմուշների վերլուծությունը ցույց է տվել, որ քարը, ամենայն հավանականությամբ, բերվել է ոչ թե հյուսիսարևելյան Շոտլանդիայից, ինչպես նախկինում ենթադրում էին գիտնականները, այլ Շոտլանդիայի մեկ այլ շրջանից, հյուսիսային Անգլիայից կամ, հնարավոր է, Իռլանդիայից։
«Սթոունհենջի զոհասեղանի քարի ծագման որոնումները» (Searching for the origin of the Stonehenge altar stone) հետազոտությունը հրապարակվել է Journal of the Geological Society ամսագրում։
2024 թվականին Մեծ Բրիտանիայի և Ավստրալիայի մասնագետները ենթադրել էին, որ ավազաքարը, որից կազմված է զոհասեղանի քարը, ծագում է հյուսիսարևելյան Շոտլանդիայից։ Այս բացահայտումը հետաքրքրություն էր առաջացրել այն հարցի շուրջ, թե ինչպես են նոր քարի դարի մարդիկ կարողացել բազմատոննանոց քարաբեկորը տեղափոխել ավելի քան 640 կիլոմետր հեռավորության վրա՝ ցամաքո՞վ, թե՞ ծովով։
Վարկածը ստուգելու համար հետազոտողների միջազգային խումբն ուսումնասիրել է քարի կազմը, այդ թվում՝ թանգարաններում պահվող ութ բեկորները։ Այնուհետև գիտնականները մեկնել են հյուսիսարևելյան Շոտլանդիա և լաբորատոր վերլուծության համար հավաքել ապարների շուրջ 70 նմուշ։
Արդյունքները ցույց են տվել, որ հայտնաբերված ապարները չեն համապատասխանում զոհասեղանի քարի բնութագրերին։ Հետազոտության ղեկավար, Հարավային Ուելսի համալսարանի պատվավոր պրոֆեսոր Դունկան Փիրին հայտնել է, որ քարի ծագումը մնում է առեղծված։ Միաժամանակ, նա ընդգծել է, որ այս հետազոտությունը զոհասեղանի քարի մինչ օրս իրականացված ամենածավալուն երկրաբանական ուսումնասիրությունն է։
Գիտնականները նշել են, որ ծագման ենթադրյալ վայրերի բացառումը պակաս կարևոր չէ, քան համապատասխան ապարների հայտնաբերումը․ դա աստիճանաբար նեղացնում է որոնումների տարածքը։
Ճշգրիտ վայրը պարզելը, թե որտեղից է բերվել քարը, կարևոր է ոչ միայն երկրաբանության համար։ Դա կօգնի ավելի լավ հասկանալ, թե ինչպես էին ապրում Սթոունհենջը կառուցած մարդիկ, ինչ տարածքներ էին յուրացնում և որքան հեռու էին տարածվում նրանց կապերը։
Ներկայացնում ենք տարադրամի փոխարժեքները՝ ըստ rate.am-ի:
ԱՄՆ դոլարի առքի առավելագույն արժեքն է 358.50 դրամ, վաճառքի նվազագույն արժեքը՝ 362 դրամ:
Եվրոյի առքի առավելագույն արժեքն է 399.5 դրամ, վաճառքի նվազագույն արժեքը՝ 404.5 դրամ:
Ռուսական ռուբլու առքի առավելագույն արժեքն է 4.34 դրամ, վաճառքի նվազագույն արժեքը՝ 4.49 դրամ։
Նոյեմբերի 9-14-ը Հայաստան կժամանեն Սևծովյան տնտեսական համագործակցության խորհրդարանական վեհաժողովի սոցիալական և հումանիտար քաղաքականության հարցերի հանձնաժողովի 67-րդ նիստին մասնակցող պատվիրակությունները։
Այս մասին համապատասխան կարգադրություն է ստորագրել Ազգային ժողովի նախագահ Ռուբեն Ռուբինյանը։
Կարգադրության համաձայն՝ պատվիրակություններին կընդունի ԱԺ տնտեսական հարցերի մշտական հանձնաժողովի նախագահ Բաբկեն Թունյանը։
Պատվիրակությունների ընդունելության կազմակերպումը հանձնարարվել է ԱԺ աշխատակազմի ղեկավար-գլխավոր քարտուղար Դավիթ Համբարյանին։
Երկու լցանավ ականների վրա պայթել և հրդեհվել են՝ փորձելով Հորմուզի նեղուցի շրջանում անցնել չթույլատրված երթուղով։
Այս մասին հայտարարել են Իրանի Իսլամական հեղափոխության պահապանների կորպուսի (ԻՀՊԿ) ռազմածովային ուժերը, փոխանցում է Mehr-ը։
ԻՀՊԿ-ի տվյալներով, լցանավերից մեկը գտնվել է նեղուցից արևելք, մյուսը՝ անմիջապես նեղուցում։ Երկու նավերն էլ պայթյունից հետո հրդեհվել են։
ԻՀՊԿ-ի ռազմածովային ուժերի մամուլի ծառայության հայտարարության մեջ ասվում է, որ լցանավերը բազմիցս խախտել են սահմանված կանոնները և անջատել նավիգացիայի ու տեղորոշման համակարգերը՝ նախքան այն երթուղով անցնելու փորձը, որը Թեհրանը համարում է չթույլատրված։
Իրանցի զինվորականները նախազգուշացրել են, որ այն նավերը, որոնք համագործակցում են ամերիկացի զինվորականների հետ և խախտում Հորմուզի նեղուցով անցնելու՝ Իրանի սահմանած կանոնները, վտանգում են պայթել ականների վրա։
Փարիզի ծայրամասում հնագետները հայտնաբերել են մոտ 6500 տարվա հնության գերեզմանոց՝ տասնմեկ թաղումով, երեսուն հսկայական քարով և գրեթե տասը տոննա կշռող քարե արձանով, գրում է La Brújula Verde-ն։
Հայտնագործությունն արվել է Ֆրանսիայի մայրաքաղաքից հարավ-արևելք գտնվող Շամպինյի սյուր Մառն համայնքում՝ բնակելի համալիրի կառուցմանը նախորդող պեղումների ժամանակ։ Այս մասին հայտնել է Ֆրանսիայի կանխարգելիչ հնագիտության ազգային ինստիտուտը։
Գլխավոր գտածոն մարդու կերպարանքով երեք մետրանոց քարե արձանն է։ Այն կողքի վրա ընկած էր մի փոսում, որտեղ ժամանակին կանգնեցված է եղել ուղղահայաց դիրքով։ Արձանի մակերեսին հետազոտողները հայտնաբերել են գոտու պատկեր և մարդու ձեռքով արված փոքր փոսիկներ։ Քարի վրա նկատվել են նաև սև ու սպիտակ հետքեր, որոնք կարող են ներկի մնացորդներ լինել։ Եթե դա հաստատվի, կնշանակի, որ արձանն ի սկզբանե ներկված է եղել։
Հնագետները հայտնաբերել են տասնմեկ գերեզման։ Դրանց մեծ մասում հանգուցյալները թաղված էին մեջքի վրա պառկած դիրքով, իսկ մարմինների կողքին կային մշակված կայծքարե գործիքներ, ծայրապանակներ և այլ առարկաներ։ Առանձնանում էր նեղ, կլոր փոսում կատարված թաղումը, որտեղ չափահաս մարդու հուղարկավորել էին նստած դիրքով։ Նրա սրունքներն ու ոտնաթաթերն ամբողջությամբ պատված էին կալցիտով՝ հանքանյութով, որն առաջանում է ջրից նյութերի նստեցման հետևանքով։ Թաղման այս անսովոր ծեսի պատճառը դեռ հայտնի չէ։
Մեկ այլ անակնկալ էր հնագույն շինանյութի հայտնաբերումը, որը հետազոտողներն անվանում են պարզունակ ցեմենտ։ Մարդիկ կալցիումի միացություններով հարուստ տեղական ավազն ու տիղմը խառնել են մանրախճի և ջրի հետ։ Չորանալուց հետո խառնուրդը կարծրացել է։ Դրա հետքերը պահպանվել են գերեզմանների, քարե հուշարձանների և մի հողաթմբի մոտ, որի նշանակությունը դեռ առեղծված է մնում։
Նման քարե արձաններ հայտնի են Ֆրանսիայում, սակայն հիմնականում՝ երկրի հարավում։ Փարիզի շրջանում արված հայտնագործությունն ընդլայնում է հնագետների պատկերացումները նեոլիթի դարաշրջանում նման հուշարձանների տարածվածության մասին։
Մասնագետները նախատեսում են վերլուծել հնագույն ԴՆԹ-ն և ոսկորներում ու ատամներում պարունակվող իզոտոպները։ Դա կօգնի պարզել թաղվածների ծագումը, սննդակարգի առանձնահատկությունները, առողջական վիճակն ու տեղաշարժերը։ Հետազոտությունները պետք է նաև լույս սփռեն տարածաշրջանի հնագույն բնակիչների թաղման սովորույթների և շինարարական տեխնոլոգիաների վրա։
COVID-19-ի PJ.2.1 նոր շտամի ախտանշանները կարող են նման լինել մրսածության կամ գրիպի, հարկավոր է թեստավորում անցկացնել։
Այս մասին ՌԻԱ Նովոստիին հայտնել են Առողջապահության համաշխարհային կազմակերպությունից:
«COVID-19-ի, գրիպի և այլ շնչառական վարակների ախտանշանները կարող են համընկնել։ Հետևաբար, միայն ախտանշանների հիման վրա անհնար է վստահաբար որոշել, թե կոնկրետ որ շնչառական վիրուսն է առաջացրել վարակը»,- գործակալությանը ասել են ԱՀԿ-ում։
Կազմակերպությունում նաև նշել են, որ այն դեպքերում, երբ հիվանդության պատճառի պարզումը կարող է ազդել բուժման մարտավարության կամ հանրային առողջապահության ոլորտում որոշումների կայացման վրա, կարող է թեստավորման անհրաժեշտություն առաջանալ։
Ճապոնիայի արևմուտքում՝ Շիզուոկա նահանգի մոտակայքում, նոյեմբերի 8-ի գիշերը գրանցվել է 5.7 մագնիտուդով երկրաշարժ։ Այս մասին հաղորդել է Kyodo լրատվական գործակալությունը։
Երկրաշարժի էպիկենտրոնը գտնվել է 40 կիլոմետր խորության վրա։ Ստորգետնյա ցնցումները խափանել են երկաթուղային հաղորդակցությունը, այդ թվում՝ «Շինկանսեն» արագընթաց գնացքների։ Ճապոնական միջուկային օբյեկտներում ցնցումների պատճառով արտակարգ իրավիճակների մասին հաղորդագրություններ չեն եղել։
Երկրաշարժի հետևանքով վիրավորվել է ավելի քան 20 մարդ։ Գործակալությունը պարզաբանել է, որ վնասվածքները հիմնականում կապտուկներ և քերծվածքներ են եղել ընկնելուց հետո։ Տուժածների կյանքին վտանգ չի սպառնում։
