julbaz.mediamonitoring.am

«Ժողովուրդ» օրաթերթը գրում է. «ՀՀ առողջապահության նախարարության համակարգում ձևավորվել է նոր պրակտիկա, ըստ որի՝ պետական ենթակայության մի շարք բժշկական կենտրոնների տնօրեններ ընդունվել են ՀՀ ԱՆ «Ակադեմիկոս Ս․ Ավդալբեկյանի անվան առողջապահության ազգային ինստիտուտի» կլինիկական օրդինատուրա՝ «Հանրային առողջապահություն» մասնագիտությամբ՝ միաժամանակ շարունակելով իրենց կառավարչական պաշտոնավարումը։

ՀՀ առողջապահության նախարարության օրենսդրական փոփոխություններից հետո, երբ հիվանդանոցների տնօրենների համար բժշկական կրթությունն այլևս պարտադիր չէ, առողջապահական համակարգում ձևավորվել է նոր, ուշագրավ պրակտիկա․ պետական ենթակայության մի շարք բժշկական կենտրոնների ղեկավարներ ընդունվել են ՀՀ ԱՆ «Ակադեմիկոս Ս․ Ավդալբեկյանի անվան առողջապահության ազգային ինստիտուտի» կլինիկական օրդինատուրա՝ «Հանրային առողջապահություն» մասնագիտությամբ։

Խոսքը 1 տարի 2 ամիս տևողությամբ առկա ուսուցման մասին է, որի ընթացքում, ըստ գործող կարգի, ուսանողները պետք է մասնակցեն կրթական գործընթացներին՝ միաժամանակ շարունակելով իրենց մասնագիտական և վարչական պարտականությունները, ղեկավարելով բժշկական կենտրոններ, իսկ որոշ դեպքերում նաև ներգրավված լինելով քաղաքական գործընթացներում։

Այս համատեքստում բարձրացված հարցերին ի պատասխան՝ «Առողջության իրավունք» ՀԿ նախագահ Անուշ Պողոսյանի կողմից հնչեցված մտահոգություններին անդրադառնալով, Առողջապահության ազգային ինստիտուտը պարզաբանել է, որ կրթական գործընթացները կազմակերպվում են «ուշ ժամերին» և հանգստյան օրերին։ Անգամ նախօրեին Ալեքսանդր Բազարչյանի ղեկավարած ինստիտուտը ռիլ է հրապարակել դասապրոցեսից, թե ինչպես են մարդիկ դասերին նստած։

Սակայն հենց այս պարզաբանումը, ըստ էության, չի փակում հարցերը, այլ նոր հարցեր է առաջացնում՝ ինչպես է իրականում կազմակերպվում առկա ուսուցումը, եթե ուսանողները միաժամանակ զբաղեցնում են բարձր պատասխանատվության կառավարչական պաշտոններ։

«Ժողովուրդ» օրաթերթի հարցերին ի պատասխան՝ առողջապահության նախարար Անահիտ Ավանեսյանը նշել է, որ նման իրավիճակն ընդունելի չէ և պետք է մանրամասն ուսումնասիրվի։

«Պետք է ծառայողական քննությամբ և այլ ձևերով պարզաբանվի, պետք է ճշտվի»,– արձագանքել է նախարարը՝ անդրադառնալով հարցին, թե արդյոք ընդունելի է հիվանդանոց ղեկավարելու ընթացքում առկա կրթական գործընթացում ձևական կամ ոչ լիարժեք մասնակցությունը։

Նախարարը նաև նշել է, որ օնլայն ուսուցման հարթակներ գոյություն ունեն, որոնք պահպանվել են դեռևս քովիդի ժամանակաշրջանից և շարունակում են կիրառվել, սակայն ընդգծել է, որ․

«Եթե ինչ-որ մեկը առկա դասընթացի մեջ չի մասնակցում, դա անընդունելի է»։

Միևնույն ժամանակ, բարձրացված հարցերից առանցքայինը մնում է անպատասխան․ ինչպես է ապահովվում, որ «առկա» համարվող կրթությունը իրականում համապատասխանում է իր բովանդակությանը, ինչ մեխանիզմներով է վերահսկվում հաճախելիությունը, և արդյոք կրթական գործընթացը չի վերածվում ձևական որակավորման համակարգի։

Այս պահին, ըստ նախարարի արձագանքի, հարցը տեղափոխվում է ծառայողական քննության դաշտ, ինչը փաստացի նշանակում է, որ համակարգը թեման պարզաբանելու կարիք ունի»։

Առավել մանրամասն թերթի այսօրվա համարում

«Իրավունք» թերթը գրում է. «Հունվար ամսին Նիկոլ Փաշինյանը հայտարարում էր, որ գումար չկա թոշակ բարձրացնելու համար, թե բա՝ թոշակառուն ի՞նչ է անելու այդքան գումարը: Սա լսել են բոլորը, սակայն ամիսներ անց, չգիտես, ում «բշտոցի» շնորհիվ, Փաշինյանի միտքը փոփոխվում է ու որոշում է, որ այդ 10 հազար դրամով կփրկվի թոշակառուն: Ու ամեն անգամ թոշակառու տեսնելիս հարցնում է. «Ներսես ախպար, տժվժիկը աղե՞գ էր»:

Անցնենք հաջորդներին. մեծ քանակով դպրոցների իբր վերանորոգում, մանկապարտեզների կառուցում եւ այլն, դե դա էլ կլասիկայի ժանրից է: Չմոռանանք հրաշքներ գործող ասֆալտը: Բայց կարեւորն այստեղ այլ կառույցի ֆունկցիան է՝ ընտրություններից ամիսներ առաջ կալանավորների եւ ձերբակալվածների մեծ մասի խափանման միջոցը փոխվում է առնվազն տնային կալանքով:

Հիմա կասեք՝ ինչ վատ բան կա դրանում, մենք էլ կասենք՝ բնավ, բայց… Հայաստանում  ներկայում գործում է 10 քրեակատարողական հիմնարկ (կալանավայր/ՔԿՀ)։ 2026 թվականի պաշտոնական տվյալներով՝ Հայաստանի ՔԿՀ-ներում պահվում է մոտ 2869 անձ: Ստացվում է, որ թեթեւացնելով բանտախցերը՝ նոր կալանավորների եւ դատապարտյալների տեղ են ազատում:

Ասվածի ապացույցն այն է, որ 2026 թվականի փետրվարի 7-ից մինչ օրս ընտրական հանցագործությունների վերաբերյալ նախաձեռնվել է 43 քրեական վարույթ, որոնցից 14-ով ձերբակալվել է 67 անձ, քրեական հետապնդում է հարուցվել 75 անձի նկատմամբ, երկու մեղադրյալ նկատմամբ հայտարարվել է հետախուզում, 32 մեղադյրալի նկատմամբ ընտրվել են անազատության հետ կապված կալանք եւ տնային կալանք խափանման միջոցներ, 29-ի նկատմամբ՝ այլընտրանքային խափանման միջոցներ։ Էլ չասենք, որ 14 քրեական վարույթով իրականացվել է 134 խուզարկություն

Այսինքն՝ թվացյալ ուրախությունն այդքան էլ ուրախալի չէ, քանի, որ բանտախցերը ազատելով՝ իշխանությունը պատրաստվում է նոր կալանավորների «ընդունելությանը»:

Ի դեպ, ակամայից հիշեցինք 2020 թվականի պատերազմը, երբ կալանավայրերից բազում կալանավորներ դիմում նամակով խնդրել էին համապատասխան մարմիններին՝ ցանկություն հայտնելով, որպեսզի գոնե ժամանակավորապես իրենց ազատեն, պատերազմին մասնակցելու նպատակով, եւ 18 տարեկան անփորձ զինվորի փոխարն իրենք մեկնեն առաջնագիծ: Դիմում  նամակները մերժել են: Հետեւապես, հարց է առաջանում՝ ինչո՞ւ այն ժամանակ բանտախցերը չէին թեթեւացնում, իսկ այժմ արագ տեմպերով դատարկվում է: Մնում է ասել՝ «Золотой свободы » բոլորին…»։

Առավել մանրամասն թերթի այսօրվա համարում

Ամերիկացի զինվորականները «ինքնապաշտպանության նպատակով հարվածներ» են հասցրել իրանական հրթիռային արձակման հարթակներին և նավակներին Հորմուզի նեղուցի շրջանում։ Այդ մասին հայտնել են ԱՄՆ ԶՈւ Կենտրոնական հրամանատարությունից (CENTCOM)՝ ընդգծելով, որ գործողությունն իրականացվել է գործող հրադադարի ռեժիմի և պատերազմի ավարտի շուրջ շարունակվող բանակցությունների ֆոնին։

«Այսօր ամերիկյան ուժերը հարվածներ են հասցրել Իրանի հարավում՝ ինքնապաշտպանության նպատակով, որպեսզի պաշտպանեն մեր զինծառայողներին իրանական զինված ուժերից բխող սպառնալիքներից», — CNN հեռուստաալիքին հայտարարել է CENTCOM-ի պաշտոնական ներկայացուցիչ Թիմոթի Հոքինսը՝ մեկնաբանելով Հորմուզի նեղուցի շրջանում պայթյունների մասին հաղորդագրությունները։

«Խոցված թիրախների թվում են հրթիռների արձակման դիրքերը, ինչպես նաև իրանական նավակները, որոնք փորձել են ծովային ականներ տեղադրել։ ԱՄՆ Կենտրոնական հրամանատարությունը շարունակում է պաշտպանել իր ուժերը՝ միաժամանակ զսպվածություն ցուցաբերելով գործող հրադադարի համաձայնագրի պայմաններում», — հավելել է Հոքինսը։