Պենտագոնն ուրբաթ օրը հրապարակել է չբացահայտված օդային երևույթների վերաբերյալ տեսագրությունների և փաստաթղթերի երկրորդ խմբաքանակը։
Ըստ ԱՄՆ ռազմական գերատեսչության հաղորդագրության, որը հրապարակվել էր այս ամսվա սկզբին, նախկինում գաղտնի կամ հազվադեպ հրապարակվող չբացահայտված օդային երևույթների դիտարկումների վերաբերյալ 162 ֆայլերն արդեն իսկ ավելի քան մեկ միլիարդ դիտում են հավաքել դրանց տեղակայման համար ստեղծված կառավարական կայքում։ Դրա մասին նշված է ռազմական գերատեսչության մամուլի հաղորդագրության մեջ, որը Թրամփի վարչակազմը գերադասում է անվանել Պաշտպանության նախարարություն։
Ուրբաթ օրվա թողարկման մեջ ներկայացված են ևս 50 տեսանյութեր և փաստաթղթեր, դրանց թվում՝ քաղաքացիական անձանց և զինվորականների առաջին դեմքից տրված վկայություններ։
Տեսանյութերից մեկում, որն արվել է Մերձավոր Արևելքում 2019 թվականին և նկարահանվել է «հավանաբար ԱՄՆ Կենտրոնական հրամանատարության պատասխանատվության գոտում գործող ամերիկյան ռազմական հարթակի ինֆրակարմիր սենսորի միջոցով», Պենտագոնի տվյալներով, արձանագրված են Պարսից ծոցի վրայով շարասյունով թռչող երեք անօդաչու թռչող սարքեր։
2022 թվականին արված մեկ այլ տեսանյութում երևում է, թե ինչպես է չորս չնույնականացված օբյեկտներից բաղկացած ևս մեկ կազմ անցնում Իրանի ափերի մոտ նավարկող նավերի կողքով։ Իսկ 2021 թվականին Սիրիայի երկնքում արված կադրերում երևում է մի խորհրդավոր օբյեկտ, որը հեռանում է այնպիսի արագությամբ, որը համեմատելի է գիտաֆանտաստիկ ֆիլմերում ակնթարթային գերլուսային արագացման հետ։
Օբյեկտներից մի քանիսը հիշեցնում են թռչող ափսեներ, սկավառակներ կամ չբացահայտված օդային երևույթների այլ ավանդաբար ընկալվող ձևեր, իսկ 2022 թվականի հոկտեմբերին անհայտ վայրում արված հոլովակներից մեկում երևում է, թե ինչպես է սիգարաձև օբյեկտը սլանում, ըստ ամենայնի, բնակելի թաղամասի վրայով։
Տեսանյութերից և ոչ մեկը չի ուղեկցվում բացատրություններով, և Պենտագոնի Անոմալ երևույթների հետազոտման վարչությունը (AARO) ավելի վաղ հայտարարել էր, որ չունի որևէ ապացույց այն մասին, որ տեսանյութերում հայտնված կամ գրավոր վկայություններում նկարագրված հազարավոր օբյեկտներից որևէ մեկն արտաերկրային ծագում ունի։
