julbaz.mediamonitoring.am

Իրանագետ Վարդան Ոսկանյանի թելեգրամյան գրառումը․ «ԱՄՆ-ի նախագահ Թրամփի կողմից «Ազատություն ծրագիր» անվանումով գործողության մեկնարկի մասին հայտարարությունից հետո ամերիկյան ռազմանավերը փորձել են ապահովել Հորմուզի նեղուցով բեռնափոխադրումների իրականացումն՝ առանց Իրանի հետ համաձայնեցման և թույլատրության, ինչը հանգեցրել է լարվածության նկատելի աճի։

Իրանական կողմը, վերջին 24 ժամվա ընթացքում անցնելով կոշտ գործողությունների, ԱԹՍ-ներով, հրթիռներով և արագընթաց մոտորանավակներով գրոհել է ամերիկյան ուղեկցող և այլ երկրների բեռնափոխադրող նավեր, ինչպես նաև հարձակում իրականացրել ԱՄԷ-ի կարևորագույն նավթային հանգուց Ֆուջեյրա նավահանգստի վրա։

Իրանի խորհրդարանի նախագահ Ղալիբաֆը, «X» սոցիալական ցանցի իր էջում այսօր առավոտյան գրառում է կատարել որում նշել է, որ Հորմուզի նեղուցի իրանական վերահսկողությունն ամրապնդման փուլում է։

«Լավ գիտենք, որ առկա իրավիճակի շարունակությունն ԱՄՆ-ի համար անտանելի է, մինչդեռ մենք առայժմ նույնիսկ չենք էլ սկսել»,- նշել է Ղալիբաֆը»։

Տասնամյակներ շարունակ մենք կարծում էինք, թե մեկուսի մնալով հաջողությամբ խուսափում ենք փոթորիկներից և պահպանում սովորական դարձած մեր հարմարավետության գոտին։ Այս մասին հայտարարել է ՀՀ ԱԳ նախարար Արարատ Միրզոյանը՝ «Երևանյան երկխոսություն» խորագրով համաժողովում ունեցած ելույթի ժամանակ։

«Սակայն երբ եկավ ճգնաժամը և այդ երևակայական անվտանգությունը փլուզվեց, մենք հայտնվեցինք մի հորձանուտում, որտեղ չնայած մեր համառ ջանքերին, մեզ ձգում էին դեպի անդունդ և այդ ժամ, ինչ որ պահի մենք որոշեցինք դուրս գալ այդ արատավոր շրջապտույտից, չհետևել այն ուղուն, որ ուրիշներն էին կանխորոշել մեզ համար, այլ ստանձնել պատասխանատվություն մեր սեփական ճակատագրի վերաբերյալ ինքնիշխան որոշումներ կայացնելու համար, չմնալ անցյալում, այլ նայել առաջ՝ կառուցելու ժամանակակից ժողովրդավար և զարգացած հասարակություն իրական ինքնիշխանությամբ և հստակ սահմանված տարածքային ամբողջականությամբ մի պետություն՝ այս իրողությունների պայմաններում որդեգրած խաղաղ կենսակերպով և հենց այդ պահին է, որ ծնունդ առավ իրական Հայաստանի գաղափարը»։

«Մայր Հայաստան» կուսակցության անդամ Դերենիկ Մալխասյանի ֆեյսբուքյան գրառումը․ «Եվրոպացիները արդեն 3-րդ անգամ են միլիարդներ խոստանում, իսկ գետնի վրա ոչ մի տեղաշարժ չի նկատվում: Ըստ էության եվրաչինովնիկները զբաղված են Փաշինյան Նիկոլի համար նախընտրական քարոզ անելով: Հաշվի առնելով եվրաչինովնիկների հաշվենկատությունը` կարելի է ենթադրել, որ ժողկոնցլագերի պահակը լուրջ պարտավորությններ է վերցրել իր վրա: Փորձը ցույց է տալիս, որ Փաշինյան Նիկոլի պարտավորությունները հակասում են Հայաստանի կենսական շահերին, բայց նպաստում են իր իշխանության պահպանմանը»: