julbaz.mediamonitoring.am

Լիտվայի ֆինանսների նախարար Տաուրիմաս Վալիսը Rapporteur պարբերականին տված հարցազրույցում հույս է հայտնել, որ Ուկրաինայի դեմ Ռուսաստանի պատերազմը կավարտվի հենց այս ձմռանը։

Նրա կարծիքով՝ դրան կարող են հանգեցնել ռուսական բանակի հսկայական կորուստները, Մոսկվայի տարածքային աննշան ձեռքբերումները և ԱՄՆ նախագահ Դոնալդ Թրամփի ճնշումը։

«Հուսով եմ՝ Ուկրաինայում պատերազմը կդադարի այս ձմռանը։ Ներքին կանխազգացում ունեմ, որ այն կավարտվի»,- հայտարարել է Վալիսը։

Նախկինում նա զբաղեցրել է Լիտվայի փոխարտգործնախարարի պաշտոնը։

Որպես փաստարկներից մեկը՝ նախարարը վկայակոչել է ՆԱՏՕ-ի գնահատականները, ըստ որոնց՝ Ռուսաստանն Ուկրաինայի դեմ մարտերում ամեն ամիս կորցնում է մոտ 40 հազար զինծառայող։ Ըստ Վալիսի՝ անցած ամիս այդ ցուցանիշը հասել է 52 հազարի։

Վալիսը մեկ այլ հնարավոր ուղենիշ է համարել հիշարժան ամսաթվերին մեծ նշանակություն տալու Ռուսաստանի հակվածությունը։ Նրա կարծիքով՝ պատերազմը կարող է ավարտվել մինչև հաջորդ տարվա փետրվարի 24-ը՝ Ուկրաինայում պատերազմի մեկնարկի հինգերորդ տարելիցը։

Վալիսը կարծում է նաև, որ Թրամփը շահագրգռված է իր նախագահական ժամկետի մնացած երկու տարիներին արտաքին քաղաքականության ոլորտում արդյունքներ գրանցելու հարցում։ Ըստ նրա՝ Իրանի կողմից Հորմուզի նեղուցի փակումը և դրա հետևանքով էներգակիրների համաշխարհային գների աճը կարող են ԱՄՆ նախագահին մղել Թեհրանի և Մոսկվայի միջև կապերը թուլացնելու փորձի։

Նախարարը հիշեցրել է, որ Իրանը Ռուսաստանին անօդաչու թռչող սարքեր է մատակարարում, որոնք օգտագործվում են Ուկրաինայի դեմ պատերազմում։ Նրա կարծիքով՝ Մոսկվայի և Թեհրանի հարաբերությունները կարող են դառնալ Վաշինգտոնի հետագա որոշումների վրա ազդող գործոններից մեկը։

Վալիսը նշել է նաև, որ Լիտվան, հաշվի առնելով իր աշխարհագրական դիրքն ու Ռուսաստանի հետ պատմական հարաբերությունները, կարող է ներդրում ունենալ խաղաղ գործընթացում։ Հունվարին երկիրը Իռլանդիայից կստանձնի ԵՄ խորհրդի նախագահությունը՝ վեց ամիս ժամկետով։ Նախարարը հնարավոր է համարում, որ հակամարտության կարգավորումը կդառնա Լիտվայի նախագահության թեմաներից մեկը։

Միաժամանակ նա զգուշացրել է, որ Եվրամիությունը պետք է Ուկրաինային անվտանգության և ֆինանսական աջակցության առավելագույն հնարավոր երաշխիքներ տրամադրի, ինչպես նաև արագացնի նրա անդամակցությունը ԵՄ-ին։ Վալիսի կարծիքով՝ առանց նման երաշխիքների Ուկրաինան վտանգում է կրկնել Վրաստանի սցենարը, որը 2008 թվականին Ռուսաստանի հետ պատերազմից հետո հայտնվեց երկարատև սառեցված հակամարտության պայմաններում և հետագայում կրկին մերձեցավ Մոսկվայի հետ։

Նախարարն ընդգծել է, որ Ուկրաինան չպետք է ընկալվի բացառապես որպես պատերազմի զոհ կամ Եվրոպայի համար ֆինանսական բեռ։ Ընդհակառակը, ըստ նրա՝ երկիրն ունի Եվրոպայի ամենաուժեղ բանակը, մարտական պայմաններում փորձարկված տեխնոլոգիաներ և ռազմական փորձի ու մշակումների արտահանման զգալի ներուժ։

ՌԴ ԱԳՆ պաշտոնական ներկայացուցիչ Մարիա Զախարովան «հորինվածք» է անվանել Հայաստանի Անվտանգության խորհրդի քարտուղար Ալեն Սիմոնյանի հայտարարություններն, ըստ որոնց ՀԱՊԿ-ը չի պատասխանել Երևանի հարցումներին։

Այսպես է Զախարովան Лента.ру-ին մեկնաբանել հայ պաշտոնյայի հրապարակած եռատողը, որում քննադատվում է Հավաքական անվտանգության պայմանագրի կազմակերպությունը։

«Իրականում դա քառատող է։ Վերջին տողն այսպես է հնչում. «Մի հորինվածք հորինեց Սիմոնյանը»»,- հայտարարել է Ռուսաստանի արտաքին քաղաքական գերատեսչության ներկայացուցիչը։

Նոյեմբերի 11-ին ՌԴ նախագահի մամուլի քարտուղար Դմիտրի Պեսկովը հայտնել է, որ ՀԱՊԿ անդամ պետությունների ղեկավարները Հայաստանին զրկել են կազմակերպությունում ձայնի իրավունքից։ Նա հավելել է, որ Երևանը մի քանի տարի շարունակ չի կատարել համապատասխան պարտավորությունները։

Ի պատասխան, Ալեն Սիմոնյանը թելեգրամյան ալիքում հրապարակել է եռատող ոտանավորը.

«Մեզ զրկեցին ձայնից այնտեղ,

Որտեղ շատ բարձր էին բոլորը լռում,

Երբ մեզ համերաշխորեն սպանում էին»։