julbaz.mediamonitoring.am

Սպիտակ տունն ամերիկյան տիեզերական ընկերություններին, այդ թվում՝ Իլոն Մասկի SpaceX-ին, կոչ է արել չմասնակցել առաջիկա շաբաթ Փարիզում կայանալիք տիեզերական գագաթնաժողովին, որը հրավիրել է Ֆրանսիայի նախագահ Էմանուել Մակրոնը։ Այս մասին հայտնում է Politico-ն։

Պարբերականի տվյալներով՝ Սպիտակ տան ներկայացուցիչը փակ հեռախոսազրույց է ունեցել SpaceX, Stoke Space, K2 Space և Astra ընկերությունների ներկայացուցիչների հետ։ Ամերիկյան ընկերություններին զգուշացրել են, որ երկօրյա միջոցառմանը նրանց մասնակցությունը կարող է ընկալվել որպես «ԵՄ դիրքորոշման լռելյայն աջակցություն»։

Պաշտոնյան ընդգծել է, որ վերջնական որոշումը կայացնում են հենց ընկերությունները, սակայն ըստ էության հասկացրել է, որ ավելի լավ է չգնալ։ Politico-ի աղբյուրների փոխանցմամբ՝ Սպիտակ տան ներկայացուցիչը նաև նշել է, թե Ֆրանսիան միջոցառումը չի համաձայնեցրել ԱՄՆ-ի հետ, և Փարիզին մեղադրել է «հակամրցակցային գործելաոճի» մեջ։

Բացի այդ, ամերիկյան կողմը դժգոհություն է հայտնել գագաթնաժողովի ծրագրից՝ պնդելով, թե քննարկումները հնարավորություն չեն տալիս լիարժեք ներկայացնել ԱՄՆ դիրքորոշումը և կարող են նվազեցնել ամերիկյան տիեզերական ոլորտի դերակատարումը։

Սպիտակ տունը դեռևս չի մեկնաբանել Politico-ի հրապարակումը։

Ֆրանսիայի բարձրագույն երկրորդական տեխնոլոգիաների, հետազոտությունների և տիեզերքի նախարար Ֆիլիպ Բատիստը հայտարարել է, որ համոզված չէ այս լուրերի իսկության մեջ, և ամերիկյան կողմին հրավիրել է մասնակցելու միջոցառմանը։

«Ուզում եմ հստակ ընդգծել, որ մենք ոչ միայն սպասում ենք ԱՄՆ-ին, այլև իսկապես ցանկանում ենք, որ դուք այստեղ լինեք», — X-ի իր էջում գրել է Բատիստը։

Նրա խոսքով՝ Ֆրանսիան պատրաստ է ընդունել ամերիկյան ընկերություններին, գիտնականներին, NASA-ի, NOAA-ի և ԱՄՆ վարչակազմի ներկայացուցիչներին։ Նախարարը նաև հավելել է, որ սերտ կապի մեջ է Սպիտակ տան Գիտության և տեխնոլոգիական քաղաքականության վարչության տնօրեն Մայքլ Կրացիոսի հետ։

Գագաթնաժողովը տեղի կունենա Փարիզի «Գրան Պալե» ցուցասրահում՝ Ֆրանսիայի և Գերմանիայի համանախագահությամբ։ Միջոցառմանը նախատեսում է մոտ 120 երկրի ներկայացուցչի մասնակցություն։ Օրակարգում տիեզերական տարածության օգտագործման խնդիրներն ու հեռանկարներն են։

Նախագահ Դոնալդ Թրամփի պաշտոնավարման ընթացքում ԱՄՆ-ի և եվրոպական դաշնակիցների հարաբերությունները վերջին շրջանում լարվել են մաքսատուրքերի, ամերիկյան զորքերի տեղակայման և քաղաքական այլ հարցերի շուրջ ծագած տարաձայնությունների պատճառով։

Դեռևս հուլիսին գագաթնաժողովի գլխավոր քարտուղար Ֆիլիպ Ադամը հայտնել էր, որ հանդիպումը մեկտեղելու է պետությունների ու կառավարությունների ղեկավարներին, ինչպես նաև բիզնեսի ներկայացուցիչներին՝ ընդգծելով, որ «ամերիկացիները, բնականաբար, նույնպես պետք է մասնակցեն»։

Քուչակ-Ապարան ավտոճանապարհին ողբերգական վթարից զոհված տաքսու վարորդը՝ Սամսոն Կարապետյանը, 3 երեխա ունի, փոքրը 2,5 տարեկան։

Ընտանիքը 4-րդ երեխային է սպասում, որը մի քանի օրից պետք է լույս աշխարհ գա։

Մեր տեղեկություններով Սամսոնը Ռուսաստանում էր աշխատում, վերջին 3 ամիսներին է «Ֆայտոն» տաքսի ծառայությունում սկսել աշխատել։

Հիշեցնենք, որ երեկ՝ սեպտեմբերի 2-ին, խոշոր ու ողբերգական ավտովթար էր տեղի ունեցել Արագածոտնի մարզում։ Ժամը 17:15-ի սահմաններում Քուչակ-Ապարան ավտոճանապարհին բախվել էին մարդատար «ՊԱԶ» ավտոբուսն ու «Opel Zafira» մակնիշի ավտոմեքենան։

Վթարի հետևանքով 5 հոգի մահացել էին, 11 հոգի տարբեր աստիճանի մարմնական վնասվածքներով տեղափոխվել էին Ապարանի և տարբեր բժշկական կենտրոններ։

NEWS.am–ի տեղեկություններով, նախօրեին Քուչակ-Ապարան ավտոճանապարհին ողբերգական վթարից զոհված 5 անձանցից երկուսը՝ Թմոյան ազգանունով, ամուսիններ են Վանաձորից։ Մյուս զոհերի ազգանուններն են՝ Կարապետյան, Մանուկյան, Պապյան։ Բոլորը «Opel» մակնիշի մեքենայի ուղեւորներն են, 2-ը տղամարդ, 3-ը՝ կին։ Մահացել է նաեւ տաքսու վարորդը՝ մոտ 50 տարեկան տղամարդ։

NEWS.am–ի տեղեկություններով, տաքսին Վանաձորից երեւան էր ուղեւորվում, այն պատկանում էր երթուղին սպասարկող «Ֆայտոն» տաքսի ծառայությանը։ Վարորդը՝ Սամսոնը մոտ մեկ ամիս առաջ էր սկսել ծառայությունում, սակայն նախքան այդ էլ տաքսի էր վարել։ Տղամարդը Վանաձորից է, երկու երեխա ունի, ընտանիքը երրորդ երեխային է սպասում։

Նախնական տեղեկություններով «Opel» տաքսին է եղել վթարի մեղավորը, դուրս է եկել հանդիպակաց երթևեկելի գոտի և ճակատային բախվել Երևան-Արթիկ երթուղին սպասարկող ավտոբուսին։

11 քաղաքացի տարբեր աստիճանի վնասծքներով տեղափոխվել էր Ապարանի բժշկական կենտրոն։ 8-ը դուրս էին գրվել հիվանդոցից, 2–ը տեղափոխվել էին Երեւան՝ «Արմենիա» և «Էրեբունի» բժշկական կենտրոններ։

«Արմենիա» բժշկական կենտրոնում գտնվող տուժածը տղամարդ է, ունի կողերի եւ ազդոսկրի գլխիկի կոտրվածքներ։ ԲԿ–ից հայտնեցին, որ տուժածը վիրահատվել է, կյանքին վտանգ չի սպառնում, կայուն ծանր վիճակում է։

Ողբերգական վթարից տուժածների թիվը հասավ 11–ի. նրանց մեջ 17 տարեկան երեխա կա. նոր մանրամասներ

Բացառիկ. ողբերգական վթարի հետեւանքով զոհված քաղաքացիները Երեւան–Վանաձոր տաքսու ուղեւորներն են եղել

Ի՞նչ վիճակում են ողբերգական վթարից տուժած 11 քաղաքացիները. մանրամասնում է ԲԿ–ի փոխտնօրենը

Գործարար Նարեկ Նալբանդյանին պատկանող «88» սուպերմարկետների ցանցի գործունեության վերաբերյալ հարուցվել է քրեական վարույթ: Այս մասին NEWS.am-ին հայտնեցին Գլխավոր դատախազությունից:

Թե որ հոդվածով է հարուցվել քրեական վարույթը և այժմ որ կառույցում է այն քննվում, Դատախազությունից տեղեկություն չտրամադրեցին:

Նշենք, որ այսօր վարչապետ Նիկոլ Փաշինյանը իրավապահներին հանձնարարեց վարույթներ նախաձեռնել պարզելու համար, թե արդյոք նորահայատ մեծահարուստ գործարար Նարեկ Նալբանդյանն է իրականում փորձում վարչապետի ընտանիքի անունը կապել իր բիզնեսների հետ:

Նալբանդյանը հերքել էր իր կապը որևէ քաղաքական ուժի հետ։

SOTA-ի լրագրող Իլյա Դանիլովը վերադարձել է Վրաստան այն բանից հետո, երբ Հայաստանի իշխանությունները հրաժարվել են նրան արտահանձնել Ռուսաստան, հայտնում է «Ռուսաստանի հակապատերազմական կոմիտեն»։

Դանիլովին ձերբակալել էին օգոստոսի 1-ին՝ Վրաստանից Հայաստան կարճատև այցի ընթացքում։ Պատճառը ռուսական կողմից նրա նկատմամբ հայտարարված հետախուզումն էր։ Ձերբակալությունից հետո լրագրողին ազատ են արձակել, սակայն նա չէր կարող լքել Հայաստանը մինչև ռուսական կողմի հարցման քննության ավարտը։

Ռուսաստանում Դանիլովին հեռակա կարգով կալանավորել են ռուսական բանակի մասին «ֆեյքեր» տարածելու գործով։ Բացի այդ, նրա դեմ հարուցվել է գործ «էքստրեմիստական» կազմակերպության գործունեությանը մասնակցելու մեղադրանքով, իսկ նրա անունը ներառվել է «ահաբեկիչների և էքստրեմիստների» ռեեստրում։

Լրագրողին իրավաբանական օգնություն էր ցուցաբերում «Վանաձոր» Հելսինկյան քաղաքացիական ասամբլեայի փաստաբանը։ «Ռուսաստանի հակապատերազմական կոմիտեի» տվյալներով՝ Դանիլովին իրավապաշտպանների հետ կապ հաստատել օգնել է «Կովչեգ» նախագիծը, իսկ Հակապատերազմական կոմիտեի խորհրդատուները նրան աջակցություն են ցուցաբերել հյուպատոսական և կազմակերպչական հարցերում։

Ինչպես նշում է կոմիտեն, Դանիլովի դեպքը ցույց է տալիս, որ ռուսական հետախուզման մեջ գտնվող մարդիկ պետք է հաշվի առնեն Հայաստան մեկնելիս առկա ռիսկերը, այդ թվում՝ տարանցիկ ուղևորությունների դեպքում. նույնիսկ արտահանձնումը մերժելու պարագայում ռուսական հարցման քննությունը կարող է տևել մի քանի շաբաթ կամ ամիս։