Հյուսիսային Կորեան դատապարտել է Հարավային Կորեայի և ԱՄՆ-ի առաջիկա համատեղ Ulchi Freedom Shield զորավարժությունները՝ նախազգուշացնելով, որ կպատասխանի «զսպման նոր մակարդակով»: «Արմենպրես»-ի փոխանցմամբ՝ այս մասին հաղորդում է Կորեայի կենտրոնական լրատվական գործակալությունը՝ հղում անելով երկրի Արտաքին գործերի նախարարությանը։
«ԱՄՆ-ն պաշտոնապես հայտարարել է, որ ներկայիս համատեղ զորավարժությունները հստակորեն տարբերվում են նախորդներից…., իսկ զորավարժությունների նպատակը պատերազմ վարելու մարտական պատրաստվածության մշակումն է…. Այսպիսով, նրանք չեն թաքցրել, որ այդ զորավարժությունները միտված են մեր պետության դեմ իրական ռազմական առճակատման նախապատրաստությունների ավարտին», – ասվում է ԿԺԴՀ արտգործնախարարության ներկայացուցչի հայտարարության մեջ:
Նշվում է, որ զորավարժությունները «Կորեական թերակղզում և շրջակա տարածաշրջանում առաջացնում են իրավիճակի աննախադեպ մակարդակի ապակայունացում» և «անվտանգության լուրջ սպառնալիք» են ստեղծում ԿԺԴՀ-ի ու ամբողջ տարածաշրջանի համար։ «Նոր մակարդակի զսպման ուժերի կիրառում՝ ի պատասխան նոր մակարդակի սպառնալիքի. այսպիսին է անվտանգության ապահովման մեր մշտական սկզբունքը», – հայտարարել է Փհենյանը։
Ulchi Freedom Shield զորավարժությունները կմեկնարկեն օգոստոսի 17-ին և կտևեն մինչև օգոստոսի 27-ը։