Լեհաստանի Կոնոտոպե գյուղում, որտեղ բնակվում է 150-ից պակաս մարդ, շաբաթ օրը հանդիսավորությամբ բացվել է 55,6 մետր բարձրությամբ Սուրբ Կույս Մարիամի հսկայական արձանը, հայտնում է Associated Press-ը։
Հուշարձանը, որը համարվում է Եվրոպայում նմանատիպ ամենաբարձր կառույցը, ֆինանսավորել է երկրի ամենահարուստ ընտանիքներից մեկը։
Քանդակային ամբողջ կոմպոզիցիայի բարձրությունը կազմում է 55,6 մետր՝ ներառյալ թագի տեսքով 15-մետրանոց պատվանդանը։ Այսպիսով, արձանը բարձրությամբ գերազանցում է Ռիո դե Ժանեյրոյի հայտնի Քրիստոս Փրկչի արձանին, որը պատվանդանի հետ միասին հասնում է մոտ 38 մետրի։ Այն նաև ավելի բարձր է Լեհաստանի Սվեբոձին քաղաքում գտնվող Քրիստոս Թագավորի արձանից, որը հիմքի հետ միասին բարձրանում է մոտ 52 մետր։
Միևնույն ժամանակ, աշխարհում գոյություն ունեն Սուրբ Կույս Մարիամի ավելի բարձր արձաններ։ Օրինակ՝ Ֆիլիպիններում գտնվող հուշարձանը հասնում է մոտ 98 մետրի։ Սակայն լեհական արձանը համարվում է ամենամեծը Եվրոպայում։
Հուշարձանը պատվիրել են տեղի միլիոնատերեր Ռոման և Գրաժինա Կարկոշիկները, որոնք ապրում են Կոնոտոպեից մի քանի կիլոմետր հեռավորության վրա գտնվող պալատում։ Ռոման Կարկոշիկը հարստացել է ձեռնարկատիրական գործունեության և Վարշավայի ֆոնդային բորսայում ներդրումների շնորհիվ։
Ամուսինները հայտարարել են, որ արձանը Աստծուն ուղղված իրենց երախտագիտության արտահայտությունն է։ Նրանց վկայությամբ, կառուցման գաղափարը ծագել է Ռոման Կարկոշիկի հիվանդությունից հետո։
Պատվանդանի ներսում կառուցվել է դիտահարթակ։ Տեղական իշխանությունները հույս ունեն, որ հուշարձանը դեպի փոքր գյուղ կգրավի ուխտավորների և զբոսաշրջիկների ու կդառնա կրոնական զբոսաշրջության նոր կենտրոն։
Լեհաստանը մնում է Եվրոպայի ամենակաթոլիկ երկրներից մեկը, թեև վերջին տարիներին եկեղեցու ազդեցությունը հասարակական կյանքի վրա աստիճանաբար նվազում է, հատկապես երիտասարդության և խոշոր քաղաքների բնակիչների շրջանում։ Գյուղական վայրերում և ավագ սերնդի շրջանում Կաթոլիկ եկեղեցին դեռևս զգալի ազդեցություն է պահպանում։