Դուշանբեում տարեսկզբից մայրաքաղաքի ոստիկանության աշխատակիցները ձերբակալել են 10 մարդու, որոնք կասկածվում են այլ քաղաքացիներին ՄԻԱՎ-ով դիտավորությամբ վարակելու մեջ, հայտնել են Տաջիկստանի ՆԳՆ-ից։
Գերատեսչության տվյալներով, քննության ընթացքում պարզվել է, որ կասկածյալները ինտիմ հարաբերությունների մեջ են մտել այլ մարդկանց հետ՝ նրանց ենթարկելով վարակման վտանգի։ Ընդհանուր առմամբ, ինչպես պնդում է ՆԳՆ-ն, նրանց գործողություններից տուժել է ավելի քան 60 մարդ։
Գերատեսչությունը հայտնել է նաև 25-ամյա մի կնոջ մասին, որն, ըստ քննության տվյալների, ինտիմ հարաբերությունների մեջ է մտել ավելի քան 20 երիտասարդների հետ՝ նրանց ենթարկելով ՄԻԱՎ-ով վարակման վտանգի։
Կասկածյալների նկատմամբ հարուցվել են քրեական գործեր Տաջիկստանի քրեական օրենսգրքի 125-րդ հոդվածով։ Նյութերն ուղարկվել են դատարան։
Տաջիկստանի ՆԳՆ-ն քաղաքացիներին կոչ է արել պատասխանատվությամբ վերաբերվել սեփական և շրջապատի առողջությանը։