Նոր Զելանդիան օրինագիծ է ներկայացնելու, որով նախատեսվում է արգելել 16 տարեկանից ցածր անձանց օգտվել սոցիալական ցանցերից, հայտնում է BBC-ն։
Առաջարկվող կանոնների համաձայն՝ TikTok-ը, Instagram-ը, Snapchat-ը, Facebook-ն ու նմանատիպ այլ հարթակները ստիպված կլինեն ստուգել օգտատերերի 16 տարին լրացած լինելու փաստը։ Այն ընկերությունները, որոնք չեն հետևի այս պահանջներին, կարող են տուգանվել իրենց համաշխարհային շրջանառության մինչև 10%-ի չափով։
Նոր Զելանդիայի վարչապետ Քրիստոֆեր Լաքսոնը հայտարարել է, որ սոցցանցերը երեխաներին բախում են «վնասակար բովանդակության, կախվածություն առաջացնող տեխնոլոգիաների ու այնպիսի ճնշումների հետ, որոնց նրանք դեռ պատրաստ չեն»։ Այնուամենայնիվ, մի շարք քաղաքական կուսակցություններ արդեն հայտնել են, որ դեմ են քվեարկելու այս նախագծին։
Նոր Զելանդիայի այս նախաձեռնությունը հետևում է Ավստրալիայում ընդունված համանման արգելքին։ Միևնույն ժամանակ, Մեծ Բրիտանիան ու Հունաստանը նույնպես մտադիր են նմանատիպ սահմանափակումներ մտցնել հաջորդ տարի։
Լաքսոնի խոսքով՝ սոցցանցերը բացասաբար են ազդում երեխաների ընտանեկան կյանքի, հոգեկան առողջության, քնի և ուսման առաջադիմության վրա։
Նոր Զելանդիայի կառավարության սահմանած «բարձր ռիսկային» խմբում, սակայն, դեռևս հստակեցված չէ, թե կոնկրետ որ հարթակներն են ներառվելու։