ԱՄՆ նախագահ Դոնալդ Թրամփի վարչակազմը սպառնացել է քանդել Վաշինգտոնում գտնվող Ջոն Քենեդու անվան Կատարողական արվեստների կենտրոնը, եթե դատարանը թույլ չտա իրականացնել շենքի վերակառուցումը։ Այս մասին ասվում է դատական փաստաթղթերում, հայտնում է BBC News-ը։
ԱՄՆ արդարադատության նախարարության փաստաբանները նաև պահանջել են վերականգնել կենտրոնի ճակատամասում տեղակայված Թրամփի անունն այն բանից հետո, երբ հունիսին այն հեռացվել էր դատարանի որոշմամբ։
Արդարադատության նախարարության ներկայացուցիչների կարծիքով՝ կենտրոնի խորհրդի գործողությունների արգելքը կարող է հանգեցնել նրան, որ հովանավորները հրաժարվեն համագործակցությունից, ֆինանսավորումը դադարի, իսկ վերակառուցումը կանգ առնի։
Թրամփի իրավաբանները պնդում են, որ առանց վերանորոգման կենտրոնը կշարունակի քայքայվել և ի վերջո կվերածվի վտանգավոր ու անպիտան շինության, որը ստիպված կլինեն քանդել։ Նրանք շենքն անվանել են «մայրաքաղաքի խայտառակություն»։
Շենքի քանդման դեպքում իշխանությունները կորոշեն, թե ինչ կառուցել դրա տեղում։ Հնարավոր տարբերակների շարքում Արդարադատության նախարարության փաստաբան Բրանթլի Մայերսը նշել է մեծ բացօթյա ամֆիթատրոնը, որտեղից տեսարան կբացվի դեպի Պոտոմակ գետը։
Քանդման սպառնալիքը հնչել է այն բանից հետո, երբ Քենեդու կենտրոնի խորհուրդը քվեարկել էր Թրամփի անունը ճակատամասին վերադարձնելու օգտին և հաստատել էր հաստատության երկամյա փակումը՝ վերակառուցման համար։ Այս որոշումները պաշտպանած խորհրդի անդամների մեծամասնությանը նշանակել էր հենց Թրամփը։
Մայիսի վերջին ամերիկյան դատարանը վճռել էր, որ նախագահի անունը կենտրոնի անվանմանն ավելացվել էր անօրինական կերպով, քանի որ դրա համար պահանջվում է Կոնգրեսի հավանությունը։ Դրանից հետո՝ հունիսին, Թրամփի անունը հեռացվել էր ճակատամասից։
Քենեդու կենտրոնը ազգային հուշահամալիր է՝ նվիրված նախագահ Ջոն Քենեդուն, և դրա անվանումն ամրագրված է դաշնային օրենքով։
Սա Վաշինգտոնում առաջին խոշոր օբյեկտը չէ, որը Թրամփը որոշել է վերակառուցել Սպիտակ տուն վերադառնալուց հետո։ Վարչակազմը զբաղվում է Ազգային մոլի ավազանի վերակառուցմամբ, նախատեսում է տեղադրել 76-մետրանոց հաղթական կամար և պարահանդեսային դահլիճ կառուցել Սպիտակ տան քանդված արևելյան թևի տեղում։ Բացի այդ, Թրամփի անունն արդեն հայտնվել է մի շարք հաստատությունների վրա (այդ թվում՝ Քենեդու կենտրոնում և ԱՄՆ Խաղաղության ինստիտուտում)։