Կովկասյան երկու առանցքային պետություն Հայաստանն ու Վրաստանը գտնվում են քաղաքական ցնցումների մեջ, և առաջին հայացքից իրավիճակը երկու երկրներում բավականին նման է. գրում է The Christian Science Monitor-ը։
Ինչպես նշվում է, խորհրդային անցյալ ունեցող երկու պետություններն էլ ձգտում են դիվերսիֆիկացնել իրենց միջազգային հարաբերությունները՝ արձագանքելով Ուկրաինայում Ռուսաստանի սկսած պատերազմի հետևանքներին։ Երկուսն էլ բախվում են ներքին դիմադրության, ինչը նրանց դրդում է «իրավական պայքարի» միջոցով հակազդել հզոր քաղաքական ընդդիմությանը և փորձել ստիպել իրենց ազգային եկեղեցիներին հետևել կառավարության քաղաքականությանը։
Չնայած մարտավարության նմանությանը՝ Հայաստանն ու Վրաստանը շարժվում են հակադիր ուղղություններով. Հայաստանը ձգտում է անդամակցել Եվրոպական միությանը, իսկ Վրաստանը երես է թեքում Եվրոպայից և վերականգնում կապերը Ռուսաստանի հետ։ Եվ ոչ մեկին չի հաջողվել գտնել առաջընթացի հաջող ուղի՝ շարժվելով ավելի անկայուն դարձող աշխարհակարգում։
Հայաստանի մայրաքաղաք Երևանում լարվածությունը եռում է։
«Հայաստանի ղեկավարությունը հայտարարում է, որ դուրս է գալիս ԵԱՏՄ-ից, սակայն ցանկանում է անորոշ ժամանակով շարունակել օգտվել դրանից ստացվող բոլոր առավելություններից։ Սա վիրավորական է։ Եթե ուզում եք դուրս գալ, ապա դուրս եկեք։ Բայց մի՛ ակնկալեք, որ մենք կհոգանք ծախսերը»,- նշել է Մոսկվայում իշխող «Միասնական Ռուսաստան» կուսակցության պաշտոնյա Անդրեյ Կլիմովը։
Հունիսին կայացած խորհրդարանական ընտրություններում Փաշինյանի հաղթանակից հետո առնվազն 300 ընդդիմադիր գործիչ, ակտիվիստ, լրագրող և գործարար (այդ թվում՝ նախկին նախագահ) ձերբակալվել են, ենթարկվել ճամփորդական սահմանափակումների կամ ունեցվածքի բռնագրավման։
Պարբերականը նկատում է, որ ըմբոստ հոգևորականությանը սանձելու Փաշինյանի ջանքերը խնդիրների են բախվել։ Մինչ այժմ 4 դատավոր ինքնաբացարկ է հայտնել՝ հրաժարվելով քննել Գարեգին Բ կաթողիկոսի դեմ հարուցված գործը, իսկ մեկ դատախազ հրաժարական է տվել, սակայն Եկեղեցու ղեկավարությունը փոխելու ջանքերը, ամենայն հավանականությամբ, կշարունակվեն։