ԵՐԵՎԱՆ, 13 մայիսի․/ԱՌԿԱ/․ 2025 թ․-ի արդյունքներով Հայաստանի աուդիտորական ընկերությունների ընդհանուր հասույթը (աուդիտորական և այլ ծառայությունների համախումբը) կազմել է շուրջ 16,2 միլիարդ դրամ՝ նախորդ տարվա համեմատ արձանագրելով մոտ 18% աճ։ Այս մասին հայտնում է «Գրանթ Թորնթոն Արմենիա» ընկերության մամուլի ծառայությունը՝ իր կողմից պատրաստված Հայաստանի 2025 թվականի աուդիտորական շուկայի վերլուծության հիման վրա։
Ուսումնասիրության համաձայն՝ 2026 թ․-ի մայիսի դրությամբ ՀՀ-ում աուդիտորական գործունեություն իրականացնելու իրավունք ունեն 33 կազմակերպություններ։ Դրանցից 30-ը հրապարակել են ֆինանսական հաշվետվություններ, իսկ 29-ը՝ նաև աուդիտի ենթարկված կազմակերպությունների վերաբերյալ տվյալներ։
Ընդ որում, շուկայում ընդհանուր հասույթի ավելի քան 10 տոկոս մասնաբաժին ունեցող կազմակերպություններն են՝ «Գրանթ Թորնթոն Հայաստան»-ը, (2025 թվականի արդյունքներով հասույթը՝ 4,35 մլրդ դրամ, աճը՝ 18%), «Էրնսթ ընդ Յանգ Արմենիա»-ն, (2,62 մլրդ դրամ, աճը՝ 9%), «Քեյ-Փի-Էմ-Ջի Արմենիա»-ն (2,48 մլրդ դրամ, աճը՝ 15%) և «Բի-Դի-Օ Արմենիա»-ն (1,86 մլրդ դրամ, աճը՝ 25%)։
Վերլուծությունն իրականացվել է՝ հիմնվելով աուդիտորական գործունեություն ծավալող կազմակերպությունների պաշտոնական կայքերում հրապարակված ֆինանսական հաշվետվությունների և աուդիտորական ծառայությունների հաճախորդների (աուդիտի ենթարկված կազմակերպություններ) ցանկերի, ինչպես նաև հասանելի այլ տվյալների հիման վրա։
Ուսումնասիրությունը նաև արձանագրում է, որ աուդիտորական գործունեությանը զուգահեռ ոլորտում շարունակվում է հարակից մասնագիտական ծառայությունների զարգացումը։ Շատ կազմակերպություններ օրենքով սահմանված շրջանակներում, մատուցում են նաև հաշվապահական, հարկային, իրավաբանական և խորհրդատվական ծառայություններ։