Մենք ձեր աչքերն ու ականջներն ենք, մենք ձեր լավագույն ընկերն ենք ԵՄ-ում: Այդ մասին ՀՀ ԱԳ նախարար Արարատ Միրզոյանի հետ համատեղ ասուլիսի ժամանակ ասաց Էստոնիայի ԱԳ նախարար Մարգուս Ցահքնան:
«Մեր գործնական քայլը մուտքի ազատականացումն է հայերի համար: Մենք իսկապես մեծ ջանքեր ենք ներդնում՝ հասնելու այդ քայլին: Ուրախ կլինենք, որ շատ բարձր մակարդակով եվրոպական ներկայացվածություն լինի այստեղ՝ Հայաստանում»,- ասաց նա:
Էստոնիայի ԱԳ նախարարը նաև շնորհակալություն հայտնեց հայ ժողովրդին, ապա, դիմելով Արարատ Միրզոյանին, ամփոփեց խոսքը. «Էստոնիայում մենք ունենք երկու կարևոր սկզբունքներ, ինչը համաձայնեցրել ենք 90-ականներին՝ անկախություն ձեռք բերելուց հետո:
Առաջինը, ինչ էլ լինի, ով էլ գա մեր դեմ ագրեսիայով, մենք կռվելու ենք՝ 1940 թվականը հիշելով, և երկրորդ սկզբունքը, որ շատ կարևոր է, այն է, որ երբեք մենակ չենք լինելու այլևս: Սա այն սկզբունքն է, որը մենք ուզում ենք՝ ոչ միայն մերը լինի, այլև մենք պատրաստ ենք ուրիշներին ընկերություն առաջարկել: Մենք մեր ընկերությունն առաջարկում ենք ձեզ»: