Քիշնևի (Մոլդովա) օդանավակայանում ապրիլի 10-ին տագնապ է հայտարարվել ենթադրյալ տեղադրված ռումբի մասին հաղորդման պատճառով, ինչի հետևանքով ուղևորներն ու անձնակազմը տարհանվել են շենքից։ Այս մասին հայտնում է NewsMaker-ը։
Մոլդովայի սահմանապահ ոստիկանությունը նշել է, որ ուղևորների գրանցման գործընթացը ժամանակավորապես կասեցված է, իսկ չվերթների չվացուցակը կարող է փոփոխվել։ Հատուկ ծառայություններն իրականացնում են ստուգումներ։
«Խնդրում ենք ըմբռնումով մոտենալ և պահպանել հանգստություն։ Մենք լրացուցիչ տեղեկատվությամբ հանդես կգանք ավելի ուշ», — հայտնել են սահմանապահ ոստիկանությունից։
Օդանավակայանի մամուլի ծառայությունից հայտարարել են, որ համագործակցում են իրավապահ մարմինների հետ՝ աշխատանքը հնարավորինս շուտ վերսկսելու համար։ Ուղևորներին խորհուրդ է տրվում չվերթների կարգավիճակը ստուգել airport.md կայքում։