Երբ մարդն անցնում է թոշակի, պետությունը նրան հասկացնում է, թե ինքն այլևս պետք չէ, սակայն մենք չենք կարող հրաժարվել այդ ներուժից։ Մենք պետք է այդ մարդկանց ներգրավենք պետության զարգացման գործում, որպեսզի նրանք իրենց գիտելիքները փոխանցեն երիտասարդներին ու բուհերին՝ դրանով իսկ ապահովելով սերունդների կապը։ Այս մասին «Ֆեյսբուքի» իր էջում մայիսի 18-ին հայտնել է Հայաստանի նախկին օմբուդսմեն Արման Թաթոյանը, որը գլխավորում է «Միասնության թևեր» կուսակցության պատգամավորության թեկնածուների համամասնական ցուցակը։
Նա դա անվանել է սխալ մոտեցում․ «Մենք իրավունք չունենք նմանատիպ ճոխություն թույլ տալու», – հավելել է Թաթոյանը։
Նրա խոսքով՝ ներկայիս մոտեցման պատճառով տարբեր ոլորտների բազմաթիվ մասնագետներ, ովքեր իրենց կյանքը նվիրել են պետության շենացմանը, իրենց ավելորդ են զգում, թեև նրանցից շատերը ցանկանում են շարունակել իրենց առաքելությունը։