ՀՀ պետական գնումների համակարգում արձանագրվել է հերթական պարադոքսը, որն առաջին հայացքից կարող է կոռուպցիայի կամ զավեշտալի պատմության տպավորություն թողնել։ Խոսքը «ՀԻՊՈԿՐԱՏ ԴԵՆՏ» ՍՊԸ-ի շուրջ ստեղծված իրավիճակի մասին է, որի ուսումնասիրությունը վեր է հանում համակարգային լուրջ անհամապատասխանություններ։
Ընկերությունը որը հիմնադրվել է 2025 թվականի սեպտեմբերին, արդեն նույն տարվա նոյեմբերի 20-ին Լոռու մարզպետ Արեն Մկրտչյանի թիվ 751-Ա որոշմամբ ներառվում է գնումների գործընթացին մասնակցելու իրավունք չունեցող մասնակիցների ցուցակում («սև ցուցակ»)։
Եվ մինչ Լոռու մարզպետարանը պաշտոնապես արձանագրում է տնտեսվարողի անբարեխղճությունն ու այսպես ասած «վռնդում» համակարգից, վարչապետի աշխատակազմը ֆինանսական գործարքների մեջ է մտնում նույն անձանց հետ։
Ըստ ՀՀ իրավաբանական անձանց պետական ռեգիստրի տվյալների ընկերությունը գրանցվել է 2025 թվականի սեպտեմբերի 1-ին՝ Կոտայքի մարզի Ձորաղբյուր գյուղում։
Ընկերությունը հաղթել է մարզպետարանի հայտարարած մրցույթում, սակայն սահմանված ժամկետում չի ստորագրել պայմանագիրը և չի ներկայացրել որակավորման ու պայմանագրի ապահովումները։
Ահա այստեղ է սկսվում իսկական քաոսն ու փաստաթղթերի իրարամերժությունը։ Մարզպետի պատժիչ որոշումից ընդամենը շաբաթներ անց՝ 2026 թվականի հունվարի 20-ին, Վարչապետի աշխատակազմը, ի դեմս գործերի կառավարիչ Գարիկ Բոշյանի, հիշյալ ընկերության (տնօրեն՝ Արկադի Մարտիրոսյան) հետ կնքում է ՀՀՎԱ-ԷԱՃԱՊՁԲ-26/23-1 ծածկագրով պայմանագրի թիվ 1 Համաձայնագիրը՝ 435․000 դրամ արժողությամբ։
Ստացվում է ամենահետաքրքիրը. ընկերությունը հասցրել է և՛ նոր բացվել, և՛ արդեն «սև ցուցակում» հայտնվել, և՛ դրանից հետո հանգիստ մասնակցել ու պայմանագիր կնքել երկրի թիվ մեկ պետական գերատեսչության հետ։
Ի վերջո, ու՞մ ատամն են սարքել․ դատելով ընկերության անվանումից («Հիպոկրատ դենտ»)՝ այն ստոմատոլոգիայի բնագավառում է գործունեություն ծավալում։ Բնականաբար տրամաբանական հարց է առաջացնում՝ արդյոք պետության հաշվին ինչ-որ պաշտոնյայի ատամնե՞րն են վերանորոգվել։
Իրավիճակն ավելի աբսուրդային է, երբ փաստաթղթերը հանգամանորեն ուսումնասիրվում են։ Դրանց արդյունքում պարզ է դառնում, որ ատամնաբուժական անվամբ ընկերությունը վարչապետի աշխատակազմին պարտավորվել էր 435․000 դրամի «պետության կարիքների համար ապրանք» մատակարարել։
Այսպիսով, այլ կերպ, քան քաոսը, դժվար է անվանել ՀՀ պետական գնումների համակարգում տիրող իրավիճակը։ Այս պատմությունը ոչ միայն իրավական անհեթեթության և պետական մարմինների միջև փոխկապակցվածության բացակայության ցայտուն օրինակ է, այլև մերկացնում է պետական գնումների ողջ համակարգը։
Անշուշտ, մենք դեռ երկար կգուշակենք, թե «Հիպոկրատ դենտը» պետության հաշվին ո՞ւմ ատամներն է բուժել, որ Նիկոլ Փաշինյանի կառավարությունը վերջինիս հետ պայմանագիր է կնքել՝ հաշվի չառնելով այն հանգամանքը, որ վերջինս Լոռու մարզպետարանի կողմից ներառվել է սև ցուցակում։