Հաջորդ շաբաթ Շվեյցարիայում կարող է տեղի ունենալ ԱՄՆ և Իրանի բարձրաստիճան ներկայացուցիչների ուղիղ հանդիպումը, հայտնել է ֆրանսիական BFMTV հեռուստաալիքը՝ հղում կատարելով իր աղբյուրներին։
Հեռուստաալիքի տեղեկություններով՝ Պակիստանի արտաքին գործերի նախարարն առաջիկայում կմեկնի Շվեյցարիա՝ բանակցությունների նախապատրաստման համար։ Իսլամաբադն արդեն մի քանի շաբաթ է՝ հանդես է գալիս որպես Վաշինգտոնի և Թեհրանի միջև առանցքային միջնորդներից մեկը։
BFMTV-ի հաղորդագրությունը հրապարակվել է այն հայտարարությունների ֆոնին, որոնցում ԱՄՆ նախագահ Դոնալդ Թրամփն ասել էր, որ Իրանի հետ համաձայնագիրը կարող է ստորագրվել արդեն կիրակի։ Սակայն իրանական կողմը նման ժամկետը չի հաստատել։ Թեհրանում հայտնել են, որ կողմերն իսկապես մոտեցել են պայմանավորվածությունների ձեռքբերմանը և կարող են առաջիկա օրերին համաձայնեցնել խաղաղ համաձայնագրի հիմնական պարամետրերը, սակայն ոչ առաջիկա 24 ժամվա ընթացքում։