Թուրքիայի արտաքին գործերի նախարարությունը (ԱԳՆ) հաղորդագրություն է տարածել Եվրոպական խորհրդարանի (ԵԽ) լիագումար նիստում ընդունված «2025 թվականի Թուրքիայի զեկույցի» վերաբերյալ՝ այն որակելով «իրականությունից հեռու»:
ԱԳՆ հաղորդագրության մեջ նշվում է, որ զեկույցը հիմնված է հակաթուրքական շրջանակների անհիմն պնդումների և ապատեղեկատվության վրա: Ըստ թուրքական կողմի՝ փաստաթուղթը պատրաստվել է միտումնավոր և քաղաքական օրակարգի շրջանակներում, որն արտացոլում է ԵԽ որոշ անդամների գաղափարական կարծրատիպերը:
«Այս զեկույցը նպատակ ունի ստվեր գցել առկա դրական օրակարգի վրա այնպիսի ժամանակաշրջանում, երբ Թուրքիա-ԵՄ հարաբերությունների ռազմավարական կարևորությունը աստիճանաբար մեծանում է»,- ասված է հայտարարության մեջ:
Անկարան պնդել է, որ զեկույցում խեղաթյուրվել են թուրքական դատարանների կողմից իրականացվող իրավական գործընթացները: Բացի այդ, գերատեսչությունը նշել է, որ խստորեն մերժում է արդարադատության նախարար Աքըն Գյուրլեքի հասցեին զեկույցում տեղ գտած «անհիմն մեղադրանքները»:
Թուրքիայի արտաքին քաղաքական գերատեսչությունը շեշտել է, որ երկրի դատական համակարգը բաց չէ որևէ միջազգային կառույցի կամ արտաքին դերակատարի միջամտության համար, և ԵԽ-ից ակնկալում է կառուցողական մոտեցում, որը կնպաստի ընդհանուր շահերի վրա հիմնված հարաբերությունների առաջընթացին:
Աղբյուր՝ Ermenihaber