Ամերիկայի Քենտուկի նահանգում հորդառատ անձրևների և բազմաթիվ ամպրոպների հետևանքով առաջացած ջրհեղեղների պատճառով առնվազն երեք մարդ է զոհվել, հայտնել են տեղական իշխանությունները։ Նահանգապետ Էնդի Բեշիրը հայտարարել է արտակարգ դրություն։
Տեսաուղերձում Բեշիրը նահանգի բնակիչներին նախազգուշացրել է մթնելուց հետո ճանապարհ դուրս չգալու անհրաժեշտության մասին՝ նշելով, որ վարորդներից մեկին ջրի հոսքը քշել է, և նա զոհվել է։
«Մենք գիտենք, որ արդեն կորցրել ենք Քենտուկիի առնվազն մի քանի բնակիչների։ Ես չեմ ուզում, որ մենք ևս մեկին կորցնենք։ Զգույշ եղեք», — ասել է նա։
Մեդիսոն շրջանի կորոներ Ջիմի Քորնելիսոնը հայտնել է, որ այդ շրջանում զոհվել է երեք չափահաս։ Նրանց անուններն առայժմ չեն հրապարակվում։ Նա պարզաբանել է, որ մեկ մարդ զոհվել է եղանակային պայմանների հետ կապված ճանապարհատրանսպորտային պատահարի հետևանքով, իսկ մյուս երկուսը՝ տղամարդ և կին, մահացած են հայտնաբերվել ջրով լցված նկուղում։ Երեքի տարիքը գնահատվում է մոտավորապես 40-ից 59 տարեկան։
Բեշիրը հայտնել է, որ նահանգի որոշ շրջաններում տեղացել է մինչև 6–7 մատնաչափ տեղումներ, ինչը գերազանցել է կանխատեսումները։ Ակնկալվում է, որ ինտենսիվ անձրևները կդադարեն տեղական ժամանակով ժամը 23:00-ին, սակայն իշխանությունները նախազգուշացնում են ողողված ճանապարհների, տապալված ծառերի և բեկորների վտանգի մասին։ Մի քանի շրջաններում ջրհեղեղի նախազգուշացումը շարունակում է գործել։
Փրկարար ծառայությունները տարհանումներ և ջրափրկարարական գործողություններ են իրականացնում, այդ թվում՝ մարդկանց ավտոմեքենաներից և տներից դուրս բերելը։ Հինգ շրջաններում՝ Բուլիթ, Մեդիսոն, Միդ, Մերսեր և Սփենսեր, հայտարարվել է արտակարգ դրություն։
Բուլիթ շրջանում ավելի վաղ հայտարարվել էր ամբարտակի ճեղքման սպառնալիքի մասին, ինչը հանգեցրել էր Լեբանոն-Ջանքշըն շրջանի մի մասի բնակիչների շտապ տարհանմանը։ Ավելի ուշ իշխանությունները հայտնել են, որ ջրի մակարդակը սկսել է իջնել, սակայն վտանգը պահպանվում է։
Օդերևութաբանները նշում են, որ ցանկացած տարածք կարող է ենթարկվել հանկարծակի վարարումների, որոնք առաջանում են ուժեղ տեղումներից հետո ընդամենը մի քանի րոպեի կամ ժամվա ընթացքում։ Նշվում է նաև, որ կլիմայի փոփոխության հետ կապված ավելի ինտենսիվ տեղումները նպաստում են նման երևույթների հաճախացմանն ու ուժգնացմանը։