Ամերիկյան ֆոնդային ինդեքսները հինգշաբթի օրվա առևտրաշրջանն ավարտել են զգալի աճով․ ներդրողները վերլուծում էին թարմ տնտեսական տվյալները, ընկերությունների ֆինանսական հաշվետվությունները և Դաշնային պահուստային համակարգի (ԴՊՀ)՝ նախօրեին ավարտված նիստի արդյունքները։
Չորեքշաբթի օրը ԱՄՆ Կենտրոնական բանկը դաշնային վարկային միջոցների տոկոսադրույքը թողել է նույն մակարդակում՝ 3.5–3.75% միջակայքում, ինչը լիովին համընկնում է վերլուծաբանների կանխատեսումների հետ։ Ընդ որում, ԴՊՀ Բաց շուկաների դաշնային կոմիտեի (FOMC) 12 անդամներից 9-ը կողմ են քվեարկել դրույքաչափը պահպանելուն, իսկ 3-ը կողմ են արտահայտվել այն անհապաղ 25 բազիսային կետով բարձրացնելուն։
Միևնույն ժամանակ, հինգշաբթի օրը հայտնի է դարձել, որ ԱՄՆ տնտեսությունը երկրորդ քառորդում տարեկան կտրվածքով աճել է 1.5%-ով։ Աճի տեմպը դանդաղել է առաջին քառորդի համեմատ (երբ կազմում էր 2.1%), թեև վերլուծաբանները կանխատեսում են, որ ՀՆԱ-ի աճի նախկին տեմպերը կպահպանվեն։
Հունիսին ԱՄՆ բնակչության եկամուտներն ավելացել են 0.2%-ով, իսկ ծախսերը՝ 0.3%-ով։ Trading Economics-ի հարցված փորձագետները սպասում են, որ երկու ցուցանիշի 0.3 տոկոսային աճ կգրանցվի։
Ինֆլյացիայի հիմնական ցուցանիշը (PCE Core ինդեքսը), որին հատուկ հետևում է ԴՊՀ-ն, անցյալ ամիս ամսական կտրվածքով աճել է 0.1%-ով, իսկ տարեկան՝ 3.3%-ով (մայիսին աճը կազմել էր համապատասխանաբար +0.3% և +3.4%):
ԱՄՆ Աշխատանքի նախարարության տվյալներով՝ գործազրկության նպաստի առաջնային դիմումների թիվն անցած շաբաթ ավելացել է 9 հազարով՝ հասնելով 197 հազարի։ Վերլուծաբանները կանխատեսում էին մինչև 200 հազարի աճ։
Microsoft Corp.-ի բաժնետոմսերը թռիչքաձև աճել են 15.5%-ով՝ գրանցելով 2008 թվականից ի վեր ամենաբարձր տեմպը։ Ամերիկյան ծրագրային ապահովման հսկան ֆինանսական չորրորդ քառորդում մաքուր շահույթն ավելացրել է 31%-ով, իսկ հասույթը՝ 18%-ով․ սրան մեծապես նպաստել է ամպային ծառայությունների սեգմենտի վստահ աճը։
Միևնույն ժամանակ Qualcomm Inc.-ի բաժնետոմսերն ընկել են 2.6%-ով։ Անլար կապի կիսահաղորդչային բաղադրիչների աշխարհի խոշորագույն արտադրողներից մեկը նախորդ քառորդում, ծախսերի ավելացման ֆոնին, մաքուր շահույթը կրճատել է 25%-ով, իսկ հասույթը նվազել է 4%-ով։
Meta Platforms-ի բաժնետոմսերի գնանշումները նվազել են 8%-ով։ Երկրորդ քառորդում ընկերության հասույթն աճել է 28%-ով, սակայն մաքուր շահույթը նվազել է 14%-ով՝ զգալիորեն զիջելով շուկայի սպասումներին։
Starbucks Corp.-ի կապիտալիզացիան աճել է 1.6%-ով։ Աշխարհի խոշորագույն սրճարանների ցանցի սեփականատերը 2026 ֆինանսական տարվա երրորդ քառորդում մաքուր շահույթը համարյա կրկնապատկել է։
Արագ սննդի ռեստորանների ամերիկյան օպերատոր Yum! Brands Inc.-ը երկրորդ քառորդում ավելացրել է մաքուր շահույթն ու հասույթը․ ընդ որում, ճշգրտված շահույթը գերազանցել է շուկայի կանխատեսումները, իսկ հասույթը փոքր-ինչ զիջել է դրանց։ Ընկերության բաժնետոմսերը թանկացել են 3.4%-ով։
Mastercard Inc.-ի բաժնետոմսերի գինն աճել է 2.5%-ով։ Վճարային համակարգերի խոշորագույն օպերատորներից մեկը 2026-ի երկրորդ քառորդում ավելացրել է մաքուր շահույթն ու հասույթը, ընդ որում՝ ճշգրտված շահույթն ու հասույթը գերազանցել են շուկայի սպասումները։
Altria Group-ի շուկայական արժեքն ընկել է 9.3%-ով։ Աշխարհի խոշորագույն ծխախոտային ընկերություններից մեկը երկրորդ քառորդում կրճատել է մաքուր շահույթը, իսկ ճշգրտված ցուցանիշը եղել է փոքր ինչ ավելի լավը, քան կանխատեսում էին վերլուծաբանները։
Robinhood Markets-ի բաժնետոմսերի գնանշումները նվազել են 3.6%-ով, թեև ֆոնդային և կրիպտոարժույթների շուկաների հայտնի հարթակի օպերատորը նախորդ քառորդում մաքուր շահույթն ավելացրել էր 48%-ով՝ հասցնելով 573 մլն դոլարի։ Ճշգրտված շահույթը կազմել է 48 ցենտ՝ մեկ բաժնետոմսի դիմաց՝ գերազանցելով LSEG-ի հարցված վերլուծաբանների կանխատեսած 44 ցենտը։
Dow Jones Industrial Average ինդեքսն աճել է 1.19%-ով՝ հասնելով 52 208.06 կետի։
Standard & Poor’s 500-ն ավելացել է 1.66%-ով՝ հասնելով 7437.63 կետի։
Nasdaq Composite-ն ավելացրել է 2.78% և ավարտել առևտրաշրջանը 25 122.18 կետի վրա։