Իրաքը և Թուրքիան ստորագրել են համաձայնագիր թուրքական միջերկրածովյան Ջեյհան նավահանգիստ տանող Քիրքուք-Ջեյհան նավթատարով իրաքյան նավթի մատակարարումները մեծացնելու մասին։ Այս կերպ Բաղդադը հույս ունի դիվերսիֆիկացնել արտահանման երթուղիները և նվազեցնել կախվածությունը Հորմուզի նեղուցով ծովային փոխադրումներից, հայտնել է Associated Press-ը։
Պայմանավորվածության համաձայն, որի գործողության ժամկետը մեկ տարի է, խողովակաշարով նախատեսվում է արտահանել օրական առնվազն 750 հազար բարել նավթ։ Զուգահեռաբար կողմերը մտադիր են պատրաստել համագործակցության ավելի լայն համաձայնագիր՝ էներգետիկայի, էլեկտրաէներգետիկայի և ջրային ռեսուրսների ոլորտներում։
Որոշումն ընդունվել է Հորմուզի նեղուցում նավագնացության խափանումների ֆոնին՝ փետրվարին ԱՄՆ-ի և Իրանի միջև պատերազմի սկսվելուց հետո։ Մինչ հակամարտությունը Իրաքն օրական արտահանում էր մոտ 3,5 մլն բարել նավթ, ընդ որում՝ մատակարարումների հիմնական մասը կատարվում էր երկրի հարավային տերմինալներով՝ Պարսից ծոցում։
Քիրքուք-Ջեյհան նավթատարը գործնականում չէր օգտագործվում 2023 թվականից՝ իրաքյան Քուրդիստանից արտահանման դադարեցումից հետո, որը պայմանավորված էր իրավական և առևտրային վեճերով։ Անցյալ տարի մատակարարումները մասամբ վերականգնվեցին, սակայն ներկայիս համաձայնագիրը պետք է զգալիորեն մեծացնի ծավալները։
Իրաքի վարչապետ Ալի ազ-Զաիդին պայմանավորվածությունն անվանել է «կարևոր ռազմավարական քայլ»՝ երկրի նավթային արտահանման կայունությունն ապահովելու և Թուրքիայի հետ տնտեսական համագործակցությունն ամրապնդելու համար։
Իրաքը շարունակում է մնալ Մերձավոր Արևելքի այն երկրներից մեկը, որոնք ամենից շատ են կախված նավթային եկամուտներից. նավթի արտահանումն ապահովում է պետական բյուջեի մուտքերի մեծ մասը։ Հեռանկարում Բաղդադը նաև դիտարկում է նոր նավթատարների կառուցման հնարավորությունը, որոնք կարող են երկրի հարավը՝ արևմտյան շրջաններով, կապել Թուրքիայի և Սիրիայի ծովափի հետ։