Ամերիկացի տնտեսագետ, ռիսկերի վերլուծաբան Նիկոլաս Նասիմ Թալեբի` Ադրբեջանում դասախոսություն կարդալուց հրաժարվելու գրառումը X սոցիալական ցանցում մեծ բանավեճի պատճառ է դարձել։
«Այն փաստը, որ որեւէ կառավարություն հավանում է իմ աշխատանքը, չի նշանակում, որ ես հետաքրքրված եմ դրան փոխադարձ պատասխանել։ Ես անշարժ գույքի գործակալ չեմ»,- գրել է նա։
Ավելի վաղ` տնտեսագետը նույն ցանցում հայտնել էր Բաքու մեկնելուց հրաժարվելու մասին։ «Ինձ հրավիրել էին մեկնել Ադրբեջան՝ դասախոսություն կարդալու։ Ես հրաժարվեցի (նրանք զգալիորեն բարձրացրին հոնորարը՝ կարծելով, որ դա ինչ-որ բան կփոխի եւ չհասկանալով իմ սկզբունքները)։ Ես ոտք չեմ դնի Ադրբեջան, քանի դեռ այնտեղ բանտարկված է Ռուբեն Վարդանյանը»,- գրել էր նա։
Նասիմ Նիկոլաս Թալեբը ամերիկացի էսսեիստ, մաթեմատիկական վիճակագիր, ռիսկերի վերլուծաբան եւ նախկին ֆինանսիստ է, Նյու Յորքի համալսարանի պրոֆեսոր։ Հայտնի են հատկապես նրա անորոշության ու պատահականության մասին նրա ուսումնասիրությունները։
Թալեբին միջազգային ճանաչում է բերել The Black Swan գիրքը, որտեղ ներկայացրել է «սեւ կարապի» գաղափարը՝ նկարագրելով անսպասելի եւ դժվար կանխատեսելի իրադարձություններ, որոնք կարող են լուրջ հետեւանքներ ունենալ։
armradio
