ՀՀ կառավարությունը նախատեսում է ներգրավել 320 միլիոն դոլարի ընդհանուր ծավալով երկու նոր վարկ։ Համապատասխան նախագծերն այսօր հավանության են արժանացել կառավարության նիստի ժամանակ:
150 միլիոն դոլար՝ Ասիական զարգացման բանկից (ԱԶԲ)
BanksNews.am-ը տեղեկացավ, որ առաջին համաձայնագրով նախատեսվում է ԱԶԲ-ից ստանալ 150 մլն դոլարի բյուջետային վարկ՝ 15 տարի ժամկետով և 4.58% լողացող տոկոսադրույքով։ Ծրագիրն ունի երեք հիմնական ուղղություն․
- Հարկաբյուջետային հատված․ հզորացնել պետական պարտքի և ֆինանսական ռիսկերի կառավարումը, ամրապնդել ենթակառուցվածքային ներդրումների կայունությունը։
- Արժեթղթերի շուկա․ կատարելագործել պետական պարտատոմսերի և արժեթղթերի շուկան։
- Ներդրումներ և թափանցիկություն․ ընդլայնել ֆինանսական գործիքներն ու ներդրողների շրջանակը, ինչպես նաև բարձրացնել ընկերությունների թափանցիկությունը։
170 միլիոն դոլար՝ Վերակառուցման և զարգացման միջազգային բանկից (ՎԶՄԲ)
Երկրորդ վարկային համաձայնագիրը կնքվել է ՎԶՄԲ-ի հետ՝ 170 մլն դոլար ծավալով։ Այս վարկը տրամադրվում է 28 տարի ժամկետով՝ տարեկան 3.9% տոկոսադրույքով։ Ֆինանսական միջոցները կուղղվեն ներդրումների խրախուսմանը, առևտրի ազատականացմանը, մրցակցության ուժեղացմանը, ինչպես նաև էկոլոգիապես մաքուր («կանաչ») և դիմակայուն տնտեսական աճի ապահովմանը։