ԱՄՆ-ը Ֆիլիպիններին է ուղարկել արտահանձնման հարցում՝ կապված կրոնական առաջնորդ Ապոլո Կարեոն Կիբոլոյի հետ, որը նախկին նախագահ Ռոդրիգո Դուտերտեի ազդեցիկ խորհրդականն էր, հայտնում է Associated Press-ը՝ հղում անելով ֆիլիպինյան պաշտոնյաներին։
Հարցումը ստացել է Ֆիլիպինների արտաքին գործերի նախարարությունը և փոխանցել երկրի արդարադատության նախարարությանը։ Ավելի վաղ իշխանությունների ներկայացուցիչները հայտնել էին, որ ամերիկյան կողմը դիմումն ուղարկել էր հուլիսին։
Արտահանձնման համար անհրաժեշտ է Ֆիլիպինների երկու դատարանի հավանությունը, որոնք քննում են Կիբոլոյի գործերը՝ կապված մարդկանց թրաֆիքինգի և երեխաների նկատմամբ դաժան վերաբերմունքի մեղադրանքների հետ։ Աղբյուրների տվյալներով՝ հարցումը կքննարկվի՝ հաշվի առնելով ԱՄՆ-ի և Ֆիլիպինների միջև 1994 թվականից գործող արտահանձնման պայմանագիրը։
76-ամյա Կիբոլոն 1985 թվականին Դավաո քաղաքում հիմնադրված «Հիսուս Քրիստոսի Թագավորություն» եկեղեցու հիմնադիրն ու ղեկավարն է։ Կազմակերպությունը հայտարարում է, որ ունի հետևորդներ Ֆիլիպիններում և արտերկրում, մասնավորապես՝ ԱՄՆ-ում։
Քաղաքական ազդեցության շրջանում Կիբոլոն համարվում էր երկրի ամենաազդեցիկ կրոնական գործիչներից մեկը և Ռոդրիգո Դուտերտեի մերձավոր դաշնակիցը, որը Ֆիլիպինների նախագահի պաշտոնը զբաղեցրել է 2016-ից 2022 թվականներին։ Կիբոլոն իրեն անվանում էր «Աստծո ընտրյալ որդի» և բազմիցս արել է հայտարարություններ, որոնք արժանանում էին ընդդիմախոսների քննադատությանը։
2021 թվականին ամերիկացի դաշնային դատախազները Կիբոլոյին մեղադրանքներ առաջադրեցին երեխաների սեռական շահագործման նպատակով թրաֆիքինգի, խարդախության, փողերի լվացման և այլ հանցագործությունների համար։ Ըստ քննության վարկածի՝ նա կանանց և անչափահաս աղջիկներին ստիպում էր ենթարկվել սեռական շահագործման՝ նրանց սպառնալով պատժով և «հավերժական անեծքով»։
Մեղադրանքների առաջադրումից հետո Կիբոլոն ներառվել է FBI-ի ամենափնտրվող անձանց ցուցակում։
2024 թվականին ֆիլիպինյան իշխանությունները նրան հայտարարեցին հետախուզման մեջ այն բանից հետո, երբ դատարանը ձերբակալության օրդեր էր տվել երեխաների նկատմամբ սեռական բռնության և մարդկանց թրաֆիքինգի մեղադրանքներով։ Կիբոլոն հերքում էր մեղադրանքները՝ հայտարարելով, որ դրանք կեղծվել են իր կրոնական կազմակերպության նախկին անդամների և քննադատների կողմից։
2024 թվականի սեպտեմբերին նա հանձնվեց իշխանություններին՝ Դավաոյում իր եկեղեցական համալիրի տարածքում իրականացված լայնածավալ ոստիկանական գործողությունից հետո։ Այդ ժամանակից ի վեր նա գտնվում է կալանքի տակ։