ԱՄՆ նախագահ Դոնալդ Թրամփը Պետքարտուղարության շենքում անցկացված միջոցառման ժամանակ կատակով հայտարարել է, որ կարող էր այնտեղից Սպիտակ տան համար ջահ կամ նկար վերցնել։
«Նախագահներին կարելի է ցանկացած շենքից իրեր դուրս տանել։ Ինձ դուր են գալիս ջահերը»,- ասել է Թրամփը՝ զննելով դահլիճը, որտեղ տեղի էր ունենում հանդիպումը արդյունահանող ոլորտի ներկայացուցիչների հետ։
Միջոցառումը տեղի է ունեցել ոչ թե Սպիտակ տանը, այլ Պետքարտուղարության շենքում։ ԱՄՆ առաջնորդը շնորհակալություն է հայտնել պետքարտուղար Մարկո Ռուբիոյին հենց այնտեղ հանդիպումն անցկացնելու հնարավորության համար։
Թրամփը միաժամանակ դրական է արտահայտվել սրահի ինտերիերի մասին՝ հատկապես առանձնացնելով սյուները, սակայն ժպիտով հավելել է, որ «դրանք կտրելը լավ չի լինի»։
Ավելի ուշ նախագահը շարունակել է կատակել. «Երբեմն ես գալիս եմ այստեղ, վերցնում նկարը և կախում Օվալաձև աշխատասենյակում։ Բայց ոչ շատ հաճախ»։
Ի պատասխան՝ Մարկո Ռուբիոն մատնանշել է պետության ղեկավարի թիկունքում կախված նկարը։ Զննելով կտավը՝ Թրամփը կատակել է. «Լավն է, ես այն ինձ հետ տանում եմ»։
Պետքարտուղարը շարունակել է նախագահի կատակը՝ նշելով, որ, հավանաբար, չարժեր Թրամփի ուշադրությունը հրավիրել այդ նկարի վրա։