Առողջական լուրջ խնդիրներ են առաջացել ԱՄՆ Անտարկտիկական ծրագրի աշխատակցի մոտ՝ ամերիկյան «Մակ-Մերդո» հետազոտական կայանում։ Տեղական բժշկական ծառայության հնարավորությունները բավարար չեն եղել։ ԱՄՆ Ազգային գիտական հիմնադրամը ահազանգել է և միջազգային օգնություն խնդրել։
Փրկարարական գործողությունը պետք է իրականացվեր մոլորակի ամենադաժան և ամենաանհյուրընկալ վայրերից մեկում։ Հիվանդին պետք էր տարհանել անտարկտիկական ձմռան պայմաններում, որը տևում է ապրիլից սեպտեմբեր և ուղեկցվում է խավարով, սառցե փոթորիկներով ու ծայրահեղ ցածր ջերմաստիճաններով։
Հարցումն ուղարկվել է Skytraders մասնագիտացված ավստրալիական ընկերությանը։ Նույնիսկ Անտարկտիդա թռչող փորձառու օդաչուների համար այս իրավիճակը բացառիկ էր, հաղորդում է Bild-ը։ Առաջին փորձը ստիպված են եղել չեղարկել ձնաբքի պատճառով։ Վերջապես, ընդամենը մի քանի ժամ անց՝ հուլիսի 31-ին, Snowbird 1 կանչանշանով Airbus A319 ինքնաթիռը թռել է դեպի Հարավային բևեռ։
«Մենք թռչում էինք այսպես կոչված նավիգացիոն մթնշաղի պայմաններում։ Դա գրեթե լիակատար մթություն է։ Պայմանները ինքնաթիռի համար թույլատրելիի սահմանագծին էին։ Մինուս 43 աստիճանը ամենացածր ջերմաստիճանն է, որի հետ ես երբևէ բախվել եմ», — ավելի ուշ պատմել է երկրորդ օդաչու Լուիզա Ռոբերթսոնը։
Անձնակազմը ուղևորվել է դեպի «Ֆենիքս» օդանավակայան, որը գտնվում է «Մակ-Մերդո»-ից ոչ հեռու։ Այնտեղ կա մոտ երեք կիլոմետր երկարությամբ թռիչքուղի՝ պատրաստված խտացված ձյունից։ Նախքան Airbus-ը կկարողանար վայրէջք կատարել, ցամաքային ծառայությունները ստիպված են եղել մի քանի ժամ ծախսել թռիչքուղին նախապատրաստելու համար։
Գետնի վրա ամեն ինչ ընթացել է ըստ պլանի։ Ծանր հիվանդ ամերիկացուն տեղափոխել են օդանավ։ Անմիջապես վերալիցքավորումից հետո Airbus-ը օդ է բարձրացել և ուղևորվել դեպի Նոր Զելանդիայի Քրայսթչերչ։ Այնտեղ պացիենտին տեղափոխել են հիվանդանոց։ Իշխանությունները չեն հրապարակում այս մարդու հիվանդության, տարիքի կամ անձի մասին մանրամասներ։ Հայտնի է միայն, որ այժմ ամերիկացին ապաքինման ճանապարհին է։