Կանադայի Վիկտորիա քաղաքից Տորոնտո ուղևորվող Porter Airlines ավիաընկերության չվերթը չեղարկվել է այն բանից հետո, երբ երեխան հրաժարվել է նստել իր նստատեղին և ամրացնել անվտանգության գոտին, հայտնում է Sky News-ը։
Ինքնաթիռն արդեն լքել էր Վիկտորիայի միջազգային օդանավակայանի տերմինալը և շարժվում էր դեպի թռիչքուղի, սակայն երեխան շարունակում էր կանգնած մնալ իր տեղում։ Ավիաընկերության տվյալներով՝ ծնողը և անձնակազմի անդամները մի քանի անգամ փորձել են ամրացնել նրան, բայց ապարդյուն։
Ի վերջո ինքնաթիռը վերադարձրել են տերմինալ, որից հետո ծնողին և երեխային՝ ուղեբեռի հետ միասին, իջեցրել են։ Մնացած ուղևորները նույնպես ստիպված են եղել լքել սրահը, մինչ անձնակազմը ձևակերպում էր անհրաժեշտ փաստաթղթերը և նորից կազմում թռիչքի պլանը։
Ուշացման պատճառով ինքնաթիռը չի հասցրել մեկնել մինչև թռիչքուղու փակվելը՝ ժամը 00:30-ին։ Արդյունքում ուղևորները ստիպված են եղել գիշերել Բրիտանական Կոլումբիայում։ Հաջորդ օրը նրանց տեղափոխել են մեկ այլ չվերթով։
Porter Airlines-ում հայտարարել են, որ երեխան «կանգնած էր իր տեղում»՝ ստեղծելով թռիչքի համար վտանգավոր պայմաններ, և ներողություն են խնդրել ուղևորներից պատճառված անհարմարությունների համար։
Միևնույն ժամանակ ականատեսները կանադական CBC հեռուստաընկերությանը պատմել են, որ երեխան, իրենց կարծիքով, ոչ թե քմահաճույք էր անում, այլ վախեցել էր։ Ուղևորներից մեկը հայտնել է, որ երեխան թաքնվում էր նստատեղի տակ և սահում էր դրա տակից, երբ մեծահասակները փորձում էին նրան ամրացնել։
Այլ ուղևորներ բողոքել են երկար սպասումից և ավիաընկերության կողմից տեղեկատվության պակասից։ Ոմանք չվերթի չեղարկումից հետո ստիպված են եղել ինքնուրույն հյուրանոց փնտրել։