Իրանի ԱԳՆ պաշտոնական ներկայացուցիչ Էսմայիլ Բաղային հայտնել է, որ Հորմուզի նեղուցի և հարակից ջրատարածքների էկոլոգիական անվտանգությունը պետք է դառնա նեղուցի կառավարման վերաբերյալ ապագա ցանկացած պայմանավորվածության անբաժանելի մասը։
Նրա խոսքով՝ վերջին օրերին սոցցանցերում տարածվել են Քեշմ կղզու ափերի մոտ նավթային աղտոտման տեսագրությունները։ Նավթամթերքները Պարսից ծոցից դուրս են բերվել ափ։ Նախնական տվյալները որպես աղտոտման հնարավոր աղբյուր մատնանշում են օտարերկրյա բեռնատար նավը։ Նավթի հետքեր հայտնաբերվել են առնվազն առափնյա գծի երեք հատվածներում, ինչպես նաև ծովի մակերեսի առանձին հատվածներում։
Բաղային նշել է, որ այս միջադեպը միայն վերջին տասնամյակների ընթացքում Պարսից ծոցի և Օմանի ծովի ջրերին ու նրանց ծովային էկոհամակարգերին վնաս հասցրած լայնածավալ աղտոտման տեսանելի դրսևորումներից մեկն է։
«Ո՞վ պետք է փոխհատուցի այս վնասը։ Մեր տարածաշրջանից արտահանվող էժան էներգիան սպառող երկրնե՞րը, նավագնացությունը սպասարկող ապահովագրական ընկերություննե՞րը, թե՞ ագրեսորներն ու նրանց գործընկերները, որոնք Պարսից ծոցն ու Օմանի ծովը վերածել են ռազմական գործողությունների և խիստ կործանարար զենքի փորձարկումների հարթակի»,- գրել է դիվանագետը X սոցցանցում։
Why must addressing the environmental condition of the Strait of Hormuz and its surrounding waters form an integral part of any future administration of the Strait?
In recent days, videos have circulated showing oil pollution along the shores of Qeshm Island. This pollution… pic.twitter.com/UpSWlqePvd
— Esmaeil Baqaei (@IRIMFA_SPOX) August 12, 2026
Բաղային ընդգծել է, որ Իրանը, որն ունի ամենաերկար առափնյա գիծը Պարսից ծոցի և Օմանի ծովի երկայնքով, չի կարող անտարբեր մնալ տեղի ունեցողի նկատմամբ։
«Յուրաքանչյուր կողմ, որը շահում է Հորմուզի նեղուցով իրականացվող առևտրային նավագնացությունից, կրում է ինչպես իրավական, այնպես էլ բարոյական պարտավորություն՝ մասնակցելու Պարսից ծոցին և Օմանի ծովին հասցված էկոլոգիական վնասի վերացմանը»,- հայտարարել է Իրանի ԱԳՆ ներկայացուցիչը։