Լեհաստանում օգոստոսի 15-ին անցկացվում են Լեհական բանակի օրվան նվիրված միջոցառումներ։ Գլխավոր իրադարձությունները դարձան Վարշավայի զորահանդեսը և Գդինի ծովային շքերթը, հայտնել է PAP-ը։
Զորահանդեսի մեկնարկից առաջ Լեհաստանի նախագահ Կարոլ Նավրոցկին 21 սպայի շնորհել է գեներալական կոչումներ։
Մասնավորապես, երկրորդ գեներալական աստղ՝ գեներալ-մայորի կոչում, ստացել է Կիբեռտարածության պաշտպանության զորքերի վերջերս նշանակված հրամանատար Մարիուշ Խմելևսկին։ Առաջին գեներալական կոչում՝ բրիգադի գեներալի, ստացել է Վարշավայի 1-ին զրահատանկային բրիգադի հրամանատար, գնդապետ Ռենարտ Սկշիպչակը՝ անցյալ տարի մահացած հայտնի լեհ գեներալ Վալդեմար Սկշիպչակի որդին։
Վարշավայի երկնքում անցկացվել է շքերթի ավիացիոն հատվածը՝ լեհական F-16-ների և նորագույն F-35-ների մասնակցությամբ, որոնցից առաջինները երկիր են ժամանել մայիսին։ Ներկայացվել են նաև AH-64 Apache հարվածային ուղղաթիռներ, բազմաֆունկցիոնալ AW149-ներ, տրանսպորտային և ուսումնական ինքնաթիռներ, ներառյալ M-346 Master-ը։
Շքերթին մասնակցել են նաև դաշնակից երկրների զինծառայողներ։ Վարշավայի օդում թռել են գերմանական Eurofighter Typhoon-ներ, իսպանական և գերմանական A400M-ներ, ինչպես նաև ֆրանսիական A330 MRTT լիցքավորող ինքնաթիռը։ Հեռանկարում Լեհաստանը կարող է ձեռք բերել այս տիպի ինքնաթիռներ, այդ թվում՝ SAFE եվրոպական ծրագրի միջոցների հաշվին։
Օդային հատվածից հետո մայրաքաղաքի փողոցներով անցել են հազարավոր զինծառայողներ, շարժվել է ռազմական տեխնիկայի շարասյունը։ Հանդիսատեսին ներկայացվել են Rosomak զրահափոխադրիչներ, Borsuk հետևակի մարտական մեքենաներ, Leopard 2PL, K2 և Abrams տանկեր, Langusta, Homar-K և HIMARS համազարկային կրակի ռեակտիվ համակարգեր, ինչպես նաև K9 և Krab ինքնագնաց հաուբիցներ։
Զորահանդեսում զգալի տեղ են զբաղեցրել հակաօդային պաշտպանության միջոցները, այդ թվում՝ Patriot և Pilica+ համակարգերը, ինչպես նաև մեծ թվով անօդաչու համակարգեր։ Դրանց թվում էին WB խմբի արտադրության լեհական FlyEye, FT-5 և Warmate, ինչպես նաև Gladius և Wizjer համակարգերը։
Առաջին անգամ դաշնակիցների զորակազմի կազմում շքերթին մասնակցել են կանադացի զինծառայողներ։ Վարշավայում զորահանդեսին մասնակցել են նաև ամերիկացի, բրիտանացի, խորվաթ և ռումինացի զինվորականներ, որոնք մտնում են Լեհաստանում տեղակայված ՆԱՏՕ մարտախմբի կազմի մեջ։ Շքերթին մասնակցել են նաև Ֆրանսիայի Արտասահմանյան լեգեոնի զինծառայողները։
Զուգահեռաբար՝ Գդինում տեղի է ունեցել ծովային շքերթ։ Մասնակցել են Լեհաստանի ռազմածովային ուժերի նավերը, այդ թվում՝ Oliver Hazard Perry տիպի ֆրեգատներ, ORP Kaszub կորվետը, Kormoran II ականորսիչներ, Lublin տիպի ականադեսանտային և այլ նավեր։ Գդանսկի ծոցի վրայով անցել է նաև ռազմածովային ավիացիան, ներառյալ Bryza ինքնաթիռները, AW101 ուղղաթիռները և Saab 340 AEW&C հեռահար ռադիոլոկացիոն հայտնաբերման ինքնաթիռը։
Լեհական բանակի օրը նշվում է օգոստոսի 15-ին՝ ի հիշատակ 1920 թվականին Վարշավայի ճակատամարտում լեհական բանակի տարած հաղթանակի, երբ լեհական զորքերը հակահարձակման ընթացքում բոլշևիկյան ուժերին հետ շպրտեցին մայրաքաղաքից։