Լիբանանի հարավի գլխավոր առափնյա ավտոմայրուղու վրա տեղադրված իսրայելական դրոշները խախտում են ՄԱԿ-ի Անվտանգության խորհրդի բանաձևը, հայտարարել է Լիբանանում ՄԱԿ-ի խաղաղապահ առաքելությունը՝ բոլոր կողմերին կոչ անելով խուսափել «սադրիչ գործողություններից»։
Իսրայելական զինված ուժերն այս տարվա սկզբին ներխուժել էին Լիբանանի հարավի մի հատված՝ ստեղծելով ինքնահռչակ անվտանգության գոտի, որը, նրանց բնորոշմամբ, նախատեսված է Իսրայելի հյուսիսը հարձակումներից պաշտպանելու համար։
Կիրակի օրը իսրայելական հեռուստատեսության 12-րդ ալիքի լրագրող Ամիտ Սեգալի հրապարակած տեսանյութում երևում են իսրայելական դրոշներ, որոնք ծածանվում են Նաքուրա-Տյուր առափնյա ճանապարհի երկայնքով․ այն Լիբանանի հարավի գլխավոր մայրուղին է և երթուղի, որն օգտագործում են Լիբանանում ՄԱԿ-ի ժամանակավոր ուժերը։
Կադրերն, ըստ ամենայնի, նկարահանվել են ռազմական մեքենայից։
Խաղաղապահները լիբանանյան տարածքում նկատել են մի քանի իսրայելական դրոշ, դրանց թվում՝ վերջերս առափնյա ճանապարհին և Նաքուրա գյուղում, հայտնել է ՄԱԿ-ի ժամանակավոր ուժերի պաշտոնական ներկայացուցիչ Քենդիս Արդիելը։
Նա նշել է, որ իսրայելական դրոշները խախտում են ՄԱԿ-ի Անվտանգության խորհրդի 1701 բանաձևը, որը վերջ դրեց 2006 թվականի պատերազմին Իսրայելի և «Հըզբոլլահի» միջև։
«Ինչպես միշտ, մենք Իսրայելի պաշտպանության բանակին և բոլոր կողմերին կոչ ենք անում դադարեցնել բանաձևի խախտումները և խուսափել ցանկացած սադրիչ գործողությունից, որը կարող է մեծացնել լարվածությունը կամ նոր խախտումներ հրահրել»,- հավելել է Արդիելը։
Իսրայելի պաշտպանության նախարար Իսրայել Կացն անցյալ շաբաթ հայտարարել էր, որ Իսրայելը չի հեռանա Լիբանանի հարավից, քանի դեռ «Հըզբոլլահը» չի զինաթափվել։
ԱՄՆ-ի միջնորդությամբ Լիբանանի և Իսրայելի կառավարությունների միջև կնքված համաձայնագիրը նախատեսում է իսրայելական զորքերի աստիճանական դուրսբերում՝ այն կապելով «Հըզբոլլահի» հաստատված զինաթափման հետ։
Շաբաթ օրը Իսրայելի հարվածների հետևանքով Լիբանանի հարավում առնվազն 11 մարդ է զոհվել, հայտնել է Լիբանանի առողջապահության նախարարությունը․ այդ հարվածները վերջին շաբաթների ամենամահաբերներից էին։